កីឡាជាតិ
ជាតិ
លោក ប្រាក់ សុវណ្ណារ៉ា៖ សុខផេង ជូនលេខ១០ទៅសុគម្ភៈ បង្ហាញពីការគោរព និងយោគយល់
ប្រភពរូបថត៖ ហ្វេសប៊ុកសហព័ន្ធកីឡាបាល់ទាត់កម្ពុជា
×![]()
លោក ប្រាក់ សុវណ្ណារ៉ា គ្រូបង្វឹកក្រុមកីឡាបាល់ទាត់ជម្រើសជាតិកម្ពុជា បានបង្ហើបឲ្យដឹងថា លោកមានអារម្មណ៍តានតឹងដ៏តូចមួយទាក់ទងនឹងការជ្រើសរើសស្លាកលេខសម្រាប់ក្រុមកីឡាករ។ តែផ្ទុយទៅវិញ លោកមិនឈឺក្បាលនោះឡើយ ដោយសារតែកីឡាកររបស់លោកចេះយោគយល់អធ្យាស្រ័យគ្នា។ គ្រូបង្វឹកវ័យ៤៥ឆ្នាំរូបនេះ បានលើកឡើងពីគំរូភាពរបស់ កែវ សុខផេង និង គួច សុគម្ភៈ លើករណីអាវលេខ១០ ។
ខ្សែប្រយុទ្ធអាហ្សង់ទីន Javier Pastore បានស្ម័គ្រចិត្តប្រគល់អាវលេខ១០ឲ្យទៅខ្សែប្រយុទ្ធប្រេស៊ីល Neymar ដែលបានផ្ទេរទៅកាន់ Paris Saint-Germain ក្នុងតម្លៃខ្លួនជាកំណត់ត្រាដ៏ខ្ពស់បំផុតលើពិភពលោក។ សម្រាប់ Pastore នេះជាកាដូដើម្បីស្វាគមន៍មិត្តរួមក្រុមថ្មី ដោយរូបគេបានប្តូរទៅពាក់លេខ២៧វិញ។ ដូចគ្នាផងដែរ ខ្សែប្រយុទ្ធវ័យ២៥ឆ្នាំ កែវ សុខផេង បានព្រមព្រៀងផ្ទេរស្លាកលេខ១០ ទៅ គួច សុគម្ភៈ ដែលជាសិស្សច្បងរបស់ខ្លួន ចំពោះការវិលត្រឡប់មកកាន់ក្រុមជម្រើសជាតិវិញ ក្រោយអវត្តមានអស់រយៈពេល២ឆ្នាំ។
«ជាការពិបាកមួយក្នុងការសម្រេចចិត្តដាក់លេខអាវឲ្យកីឡាករនីមួយៗ ប៉ុន្តែដំបូងខ្ញុំបានឲ្យកីឡាកររើសលេខដែលខ្លួនស្រឡាញ់ដោយខ្លួនឯង ជាពិសេសលេខដែលប្រើនៅក្នុងក្លិប។ ចំពោះករណីលេខ១០ កែវ សុខផេង បានសម្រេចចិត្តជូនសិស្សច្បងរបស់ខ្លួន គឺ គួច សុគម្ភៈ ហើយ សុគម្ភៈ ក៏បានអរគុណដល់សិស្សប្អូនរបស់ខ្លួនផងដែរ»។ នេះជាការបញ្ជាក់របស់លោក ប្រាក់ សុវណ្ណារ៉ា នៅពេលលោកមានភារកិច្ចដឹកនាំក្រុមជម្រើសជាតិកម្ពុជា សម្រាប់ជំនួបមិត្តភាពអន្តរជាតិជាមួយមីយ៉ាន់ម៉ា។
គ្រូបង្វឹកដែលមានឈ្មោះក្រៅហៅថា «ទូច» រូបនេះ មានឱកាសដឹកក្រុមជម្រើសជាតិកម្ពុជាជាលើកទីបី បន្ទាប់ពីការចាកចេញរបស់គ្រូបង្វឹកប្រេស៊ីល លោក Leonardo Vitorino។ លោកបានលើកឡើងប្រាប់សារព័ត៌មានថ្មីៗថា៖ «ខ្ញុំ និងក្រុមការងារពិតជារំភើប ដែលកីឡាករមិនយកលេខអាវជាធំ និងចេះចែករំលែកគ្នា សំខាន់ឲ្យតែខ្មែរឈ្នះគឺល្អបំផុត»។
កែវ សុខផេង បានចូលលេងក្នុងក្រុមជម្រើសជាតិលើកដំបូងនាជំនួបវគ្គជម្រុះ World Cup ជាមួយអាហ្វហ្គានីស្ថាន កាលពីខែមិថុនា ឆ្នាំ២០១៥ ដោយពាក់លេខ២០ បន្ទាប់មកប្តូរទៅលេខ១៤ ។ បន្ទាប់ពី គួច សុគម្ភៈ ត្រូវអវត្តមាន ដោយសារបញ្ហារបួស សុខផេង បានពាក់លេខ១០ ក្រោមការដឹកនាំរបស់គ្រូបង្វឹកកូរ៉េខាងត្បូង Lee Tae Hoon និងគ្រូបង្វឹកប្រេស៊ីល Leonardo Vitorino រហូតមក។
«បងសុគម្ភៈ ក៏ស្រឡាញ់លេខ១០ ខ្ញុំក៏ស្រឡាញ់លេខ១០ ប៉ុន្តែគាត់ជាសិស្សច្បង ដូច្នេះខ្ញុំ និងគ្រូៗ បានព្រមព្រៀងគ្នាប្រគល់លេខជូនទៅគាត់។ អ្វីដែលសំខាន់បំផុតរបស់យើង គឺលេងដើម្បីជាតិ និងប្រជាជនកម្ពុជាទាំងមូល»។ នេះជាការអះអាងរបស់ កែវ សុខផេង ដែលបានប្តូរទៅពាក់លេខ៨ ជំនួស ហូយ ផល្លីន ខណៈ ផល្លីន ដូរទៅពាក់លេខ១៤ដែលនៅទំនេរ ដោយសារតែ សឿត បារាំង មិនទទួលបានការកោះហៅពីសំណាក់លោកប្រាក់ សុវណ្ណារ៉ា។
គួច សុគម្ភៈ វ័យ៣០ឆ្នាំ បានចាប់ផ្តើមចូលលេងក្នុងក្រុមជម្រើសជាតិតាំងពីឆ្នាំ២០១០ នាវគ្គជម្រុះ AFC Challenge Cup ក្រោមការដឹកនាំរបស់លោក ប្រាក់ សុវណ្ណារ៉ា ដដែល ប៉ុន្តែគេបានអវត្តមានរយៈពេល២ឆ្នាំចុងក្រោយ ដោយសារតែការរងរបួសជើងនាអំឡុងពេលបំពេញបេសកកម្មប្រកួតសម្រាប់ក្លិបណាហ្គាវើលរបស់ខ្លួន។ ការកោះហៅសារជាថ្មីនេះ ក្រៅពីមានឱកាសបន្តពាក់អាវលេខ១០ ដែលខ្លួនស្រឡាញ់ពេញចិត្ត គួច សុគម្ភៈ បានទទួលតំណែងជាប្រធានក្រុមជំនួស ឃួន ឡាបូរ៉ាវី ផងដែរ។ បូរ៉ាវី ដែលជាកីឡាករជើងចាស់ម្នាក់ទៀតនោះ មិនទទួលការកោះហៅពីលោក ប្រាក់ សុវណ្ណារ៉ា អតីតគ្រូបង្វឹកក្លិបបឹងកេតរបស់ខ្លួនឡើយ។ កែវ សុខងន ដែលជាបងប្រុសបង្កើតរបស់ សុខផេង ជាអ្នកពាក់លេខ៩បន្តពីបូរ៉ាវីផងដែរ។
«ខ្ញុំសូមអរគុណ ព្រោះអាចនិយាយបានថា វាឲ្យតម្លៃមួយរបស់គាត់ [កែវ សុខផេង] ចំពោះខ្ញុំ។ សំខាន់សម្រាប់ខ្ញុំ គឺពួកយើងចេះស្រឡាញ់ និងឲ្យតម្លៃគ្នាទៅវិញទៅមក»។ សុគម្ភៈ ប្រាប់ពីអារម្មណ៍របស់ខ្លួនក្រោយមានឱកាសចូលរួមក្រុមជម្រើសជាតិវិញ ជាមួយនឹងអាវលេខ១០ដែលខ្លួនតែងតែពាក់កន្លងមក៕
Tag:
បាល់ទាត់
ជម្រើសជាតិ
ប្រាក់ សុវណ្ណារ៉ា
កែវ សុខផេង
គួច សុគម្ភៈ
© រក្សាសិទ្ធិដោយ thmeythmey.com
