ជាតិ
Ted Cruz ថា អាមេរិក នឹងមិនទទួលស្គាល់ការបោះឆ្នោត បើមិនលែងមេបក្សប្រឆាំង លោក Ted Cruz សមាជិកព្រឹទ្ធសភាអាមេរិក។ រូបថត AFP
× ភ្នំពេញ៖ ក្រៅពីព្រមានរារាំងមន្ត្រីរដ្ឋាភិបាលកម្ពុជាមួយចំនួន មិនឲ្យធ្វើដំណើរចូលទឹកដីអាមេរិក សមាជិកព្រឹទ្ធសភាមួយរូបនៃប្រទេសមហាអំណាចមួយនេះ ក៏ព្រមានបន្ថែមថា រដ្ឋាភិបាលរបស់ខ្លួន រួមទាំងបណ្តាសម្ព័ន្ធមិត្រដទៃទៀត នឹងមិនទទួលស្គាល់លទ្ធផលបោះឆ្នោតឆ្នាំ២០១៨ ប្រសិនបើឯកឧត្តម កឹម សុខា បន្តជាប់ឃុំក្នុងពន្ធនាគារ។ មន្ត្រីជាន់ខ្ពស់រដ្ឋាភិបាល ឆ្លើយតបថា ការព្រមាននេះ គ្មានឥទ្ធិពលអ្វីមកលើប្រទេសកម្ពុជាឡើយ។
ប្រសិនបើឯកឧត្តម កឹម សុខា ប្រធានគណបក្សសង្គ្រោះជាតិ នៅតែជាប់ឃុំក្នុងពន្ធនាគារ រដ្ឋាភិបាលកម្ពុជា នាអាណត្តិទី៦ ដែលកើតចេញពីការបោះឆ្នោតថ្នាក់ជាតិក្នុងឆ្នាំ២០១៨ នាពេលខាងមុខ អាចនឹងមិនត្រូវបានទទួលស្គាល់ដោយសហរដ្ឋអាមេរិក។ នេះជាសារព្រមានថ្មីមួយទៀត ដែលធ្វើឡើងដោយលោក ថេត គ្រូស (Ted Cruz) សមាជិកព្រឹទ្ធសភាដ៏មានឥទ្ធិពលមួយរូបរបស់សហរដ្ឋអាមេរិក។ លោក សង្កត់ធ្ងន់យ៉ាងដូច្នេះថា៖«ជាជំហានដំបូង លោកនាយករដ្ឋមន្រ្តី ហ៊ុន សែន ត្រូវដោះលែងលោក កឹម សុខា ជាបន្ទាន់»។
ក្រៅពីចង់ឲ្យដោះលែងឯកឧត្តម កឹម សុខា លោក ថេត គ្រូស ថែមទាំងទាមទារឲ្យអង្គការផ្នែកប្រជាធិបតេយ្យ បានធ្វើសកម្មភាពដូចមុន ហើយស្ថាប័នព័ត៌មានមួយចំនួន ដែលត្រូវបានបិទកាលពីកន្លងមក អាចបន្តផ្សព្វផ្សាយឡើងវិញ បើពុំដូច្នេះទេ សហរដ្ឋអាមេរិក នឹងលំបាកក្នុងការទទួលស្គាល់លទ្ធផលបោះឆ្នោតនៅកម្ពុជា។ លោក ថេត គ្រូស ដែលជាអតីតបេក្ខជនប្រធានាធិបតីនៃសហរដ្ឋអាមេរិកផងនោះ បានបញ្ជាក់បែបនេះថា៖«បើមិនធ្វើតាមលក្ខខណ្ឌខាងលើ វា នឹងមិនអាចទៅរួចនោះទេ ដែលអាមេរិក និងប្រទេសផ្សេងៗទៀត ជាសម្ព័ន្ធមិត្ររបស់យើង ត្រូវទទួលស្គាល់ពីភាពស្របច្បាប់នៃការបោះឆ្នោត [នៅកម្ពុជា]»។
អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន តបវិញថា ការបោះឆ្នោត រួមទាំងវាសនាប្រទេសជាតិទាំងមូល គឺត្រូវសម្រេចដោយប្រជាពលរដ្ឋខ្មែរគ្រប់រូប មិនមែនសហរដ្ឋអាមេរិកនោះទេ។ លោក ប្រាប់សារព័ត៌មានថ្មីៗថា លោក ថេត គ្រូស គ្រាន់តែជាសមាជិកព្រឹទ្ធសភាម្នាក់ប៉ុណ្ណោះ របស់សហរដ្ឋអាមេរិក ដូច្នេះគ្មានឥទ្ធិពលអ្វី មកលើការសម្រេចចិត្តរបស់ប្រទេសកម្ពុជាឡើយ។
មន្រី្តជាន់ខ្ពស់រដ្ឋាភិបាលរូបនេះ និយាយខ្លាំងៗថា៖«យើង មិនទៅឈឺក្បាលជាមួយបរទេសណាទេ»។
ការចាប់ផ្តើមព្រមានសាជាថ្មីរបស់លោក ថេត គ្រូស ខាងលើ គឺធ្វើឡើងចំថ្ងៃទី៩ ខែវិច្ឆិកា ឆ្នាំ២0១៧នេះ ជាថ្ងៃផុតកំណត់ ដែលលោក បានស្នើដល់រដ្ឋាភិបាលកម្ពុជា កាលពីកន្លងមក ដើម្បីឲ្យដោះលែងឯកឧត្តម កឹម សុខា។ កាលនោះ លោក បានអះអាងក្នុងសំណើថា លោក នឹងធ្វើកិច្ចការជាមួយនឹងស្ថាប័នព្រឹទ្ធសភា និងរដ្ឋបាលរបស់លោកប្រធានាធិបតី ដូណាល់ ត្រាំ ដើម្បីជំរុញឲ្យរារាំងមន្ត្រីរដ្ឋាភិបាលកម្ពុជាមួយចំនួន ដែលបម្រើការងារនៅក្រសួងការបរទេស មិនឲ្យធ្វើដំណើរទៅកាន់សហរដ្ឋអាមេរិក ក្នុងករណីឯកឧត្តម កឹម សុខា មិនត្រូវបានដោះលែង។ ការព្រមានលើកទីពីររបស់លោក ថេត គ្រូស ធ្វើឡើងតាមរយៈសារ ដែលបង្ហោះលើបណ្តាញទំនាក់ទំនងធ្វីតធើ (Twitter) និងនៅលើគេហទំព័ររបស់ខ្លួន ។
ឯកអគ្គរាជទូតកម្ពុជា ប្រចាំសហរដ្ឋអាមេរិក លោក ជុំ ប៊ុនរ៉ុង បានផ្ញើលិខិតដែលមានចំនួនពីរទំព័រ ទៅកាន់លោក ថេត គ្រូស ដើម្បីពន្យល់ពីការចាប់ខ្លួនឯកឧត្តម កឹម សុខា។ មិនខុសពីមន្ត្រីរដ្ឋាភិបាលនៅក្នុងប្រទេសប៉ុន្មានទេ លោក ជុំ ប៊ុនរ៉ុង ប្រាប់លោក ថេត គ្រូស ថា មូលហេតុ ដែលនាំឲ្យចាប់ខ្លួន ព្រោះឯកឧត្តម កឹម សុខា ជាប់សង្ស័យនឹងអំពើក្បត់ជាតិ។
ឯកអគ្គរាជទូតរូបនេះ បានបកស្រាយក្នុងលិខិតថា៖«ការចាប់ឯកឧត្តម កឹម សុខា គឺត្រឹមត្រូវយ៉ាងពេញលក្ខណ តាមច្បាប់របស់ប្រទេសកម្ពុជា»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ក៏បានឆ្លើយតបនឹងលោក ថេត គ្រូស ដែរ ទាក់ទងនឹងការដាក់ឱសានវាទ មកលើរដ្ឋាភិបាលកម្ពុជា ដើម្បីឲ្យដោះលែងឯកឧត្តម កឹម សុខា។ លោក បានសរសេរសារក្នុងបណ្តាញទំនាក់ទំនងតេឡេក្រាម (Telegram) ទៅកាន់ក្រុមអ្នកកាសែតថា តុលាការកម្ពុជា នៅតែបន្តដំណើរការជាធម្មតា ដោយគ្មានឧបសគ្គអ្វីឡើយ ទោះជាថ្ងៃទី៩ ខែវិច្ឆិកា ឆ្នាំ២0១៧នេះ ជាឱសាទវាទចុងក្រោយ ដែលលោក ថេត គ្រូស កំណត់ឲ្យដោះលែងឯកឧត្តម កឹម សុខា ក៏ដោយ។
អ្នកនាំពាក្យគណបក្សកម្ពុជា ដែលកំពុងដឹកនាំរដ្ឋាភិបាលរូបនេះ បានសរសេរយ៉ាងដូច្នេះ៖«ការដាក់ឱសានវាទរបស់ព្រឹទ្ធសមាជិកអាមេរិក ជាការប្រមាថធ្ងន់ធ្ងរដល់ឆន្ទៈរបស់ប្រជាជនកម្ពុជាទូទាំងប្រទេស ហើយក៏ជាសកម្មភាពជ្រៀតជ្រែកចូលកិច្ចការផ្ទៃក្នុងកម្ពុជាផងដែរ ដែលប្រជាជនកម្ពុជាមិនអាចទទួលយកបានជាដាច់ខាត»។
សូមបញ្ជាក់ថា មិនមែនតែសហរដ្ឋអាមេរិកប៉ុណ្ណោះទេ ប៉ុន្តែសហគមន៍អន្តរជាតិផ្សេងទៀត ក៏បានប្រតិកម្មនឹងការចាប់ខ្លួនឯកឧត្តម កឹម សុខា ដែរ។ យ៉ាងណាក៏ដោយ រដ្ឋាភិបាលកម្ពុជា នៅតែប្រកាសជំហរថា តុលាការ នៅតែចាត់វិធានការចំពោះឯកឧត្តម កឹម សុខា ទៅតាមនីតិវិធី ដោយមិនខ្លាចសម្ពាធពីសហគមន៍អន្តរជាតិឡើយ។ រហូតមកដល់ពេលនេះ ឯកឧត្តម កឹម សុខា បានជាប់ឃុំក្នុងពន្ធនាគារត្រពាំងផ្លុង ក្នុងខេត្តត្បូងឃ្មុំ អស់រយៈពេលជាងពីរខែហើយ ក្រោមការសង្ស័យរបស់តុលាការថា ជាប់ពាក់ព័ន្ធនឹងអំពើក្បត់ជាតិ៕
Tag:
កឹម សុខា
សុខ ឥសាន
ផៃ ស៊ីផាន
Ted Cruz
© រក្សាសិទ្ធិដោយ thmeythmey.com