ចិនផ្ដល់ជំនួយគ្លីនិកចល័ត ៤០គ្រឿង និងឡជីវឧស្ម័ន ១៥០០ឡ

ជាតិ

សេដ្ឋកិច្ច

ចិនផ្ដល់ជំនួយគ្លីនិកចល័ត ៤០គ្រឿង និងឡជីវឧស្ម័ន ១៥០០ឡ

10, Nov 2017 , 9:59 pm

រូបភាព

រូបភាពពីក្រសួងសេដ្ឋកិច្ច និងហិរញ្ញវត្ថុ

ដោយ:

ភ្នំពេញ៖ ប្រទេសចិនបានព្រមព្រៀងផ្ដល់គ្លីនិកចល័តចំនួន ៤០គ្រឿង និងឡជីវឧស្ម័នចំនួន ១៥០០ឡ ដល់កម្ពុជា ក្នុងក្របខណ្ឌជំនួយឥតសំណង។ នេះបើតាមសេចក្ដីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ។

លិខិតប្ដូរសារផ្ដល់សម្ភារទាំងនេះ ត្រូវបានចុះហត្ថលេខាដោយលោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ក្នុងនាមរដ្ឋាភិបាលកម្ពុជា និងលោក Wang Bingnan អនុរដ្ឋមន្ត្រីក្រសួងពាណិជ្ជកម្មរបស់ចិន នៅថ្ងៃទី៩ខែវិច្ឆិកា។

ការផ្ដល់ជំនួយរបស់រដ្ឋាភិបាលចិននៅពេលនេះ គឺកើតចេញពីលទ្ធផលដំណើរទស្សនកិច្ចផ្លូវរដ្ឋរបស់លោក ស៊ី ជីនពីង ប្រធានាធិបតីសាធារណរដ្ឋប្រជាមានិតចិន នៅកម្ពុជា កាលពីខែតុលាឆ្នាំ២០១៦ កន្លងទៅ ដែលប្រទេសចិនបានសន្យាផ្ដល់ហិរញ្ញប្បទានឥតសំណងដល់កម្ពុជា នូវទឹកប្រាក់សរុប ៣៦០០លានយ៉ន់ ត្រូវនឹងប្រមាណ ៥៥០លានដុល្លារអាមេរិក សម្រាប់រយៈពេលបីឆ្នាំគឺពីឆ្នាំ២០១៦ ដល់ឆ្នាំ២០១៨ ។

សេចក្ដីប្រកាសព័ត៌មានបានឲ្យដឹងថា គ្លីនិកចល័តចំនួន ៤០គ្រឿង និងសម្ភារបរិក្ខារ នឹងត្រូវយកទៅផ្គត់ផ្គង់តាមរាជធានី ខេត្តទាំង ២៥ ដែលនឹងបង្ខិតសេវាសុខាភិបាលកាន់តែជិត និងមានប្រសិទ្ធភាពជូនប្រជាពលរដ្ឋតាមទីដាច់ស្រយាល។ រីឯ ជំនួយឡជីវឧស្ម័ន ១៥០០ ឡ នឹងត្រូវធ្វើការសាងសង់នៅខេត្តចំនួន ៧ រួមមាន ខេត្តត្បូងឃ្មុំ កំពង់ឆ្នាំង ព្រៃវែង ស្វាយរៀង កំពង់ចាម និងខេត្តពោធិ៍សាត់ ដែលនឹងជួយដល់ប្រជាកសិករក្នុងការបំប្លែងឧស្ម័នពីលាមកសត្វយកមកចំម្អិនអាហារ ហើយកាកសំណល់ក្នុងឡធ្វើជាជីសម្រាប់ដំណាំ៕