អន្តរជាតិ
នយោបាយអន្តរជាតិ
សមាជិកសេសសល់នៃកិច្ចព្រមព្រៀង TPP សម្រេចចិត្តទៅមុខ ដោយគ្មានអាមេរិក
× ប្រទេសសមាជិកកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) បានឯកភាពលើគោលការណ៍គ្រឹះដើម្បីបន្តដំណើរទៅមុខទៀត ទោះជាអាមេរិកសម្រេចចិត្តដើរចេញពីកិច្ចព្រមពៀងនេះហើយក៏ដោយ។ ដំបូងគេគិតថាការដកខ្លួនរបស់អាមេរិក នឹងធ្វើឲ្យកិច្ចព្រមព្រៀងឆ្លងមហាសមុទ្រប៉ាស៊ីហ្វិកមួយនេះបរាជ័យ ប៉ុន្តែសមាជិកនៅសេសសល់មានជប៉ុនជាដើម បានព្យាយាមស្រោចស្រង់ស្ថានការណ៍ ដើម្បីឲ្យកិច្ចព្រមព្រៀង TPP ទៅមុខទៀត។
រដ្ឋមន្ត្រីសេដ្ឋកិច្ច និងពាណិជ្ជកម្មនៃសមាជិកកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) បានជួបប្រជុំគ្នានៅក្រៅជំនួបកិច្ចសហប្រតិបត្តិសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុងដាណាង ប្រទេសវៀតណាម។ ក្រោយការចរចាដ៏តឹងតែងអស់ពេលជាច្រើនថ្ងៃ សមាជិក TPP ទាំង១១ ប្រទេសបានមូលមាត់ក្នុងការបន្តជីវិតរបស់ TPP ដែលស្ទើរតែបាត់បង់ដោយការចាកចេញរបស់អាមេរិកក្រោមរដ្ឋបាលលោកប្រធានាធិបតី ដូណាល់ ត្រាំ ។
រដ្ឋមន្ត្រីពាណិជ្ជកម្មវៀតណាម Tran Tuan Anh បាននិយាយក្នុងសន្និសីទសារព័ត៌មាននៅថ្ងៃទី១១ ខែវិច្ឆកា ថា យើងបានជម្នះឧបសគ្គលំបាកជាងគេហើយ។ បើតាមរដ្ឋមន្ត្រីរូបនេះ កិច្ចព្រមព្រៀង TPP នឹងត្រូវប្ដួរឈ្មោះថ្មីទៅជាកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូរអន្តរប៉ាស៊ីហ្វិក (CPTPP) ។ ចំណែករដ្ឋមន្ត្រីសេដ្ឋកិច្ចជប៉ុន Toshimitsu Motegi សង្ឃឹមថា ការទៅមុខរបស់ប្រទេសទាំង១១ អាចធ្វើឲ្យអាមេរិកត្រឡប់ក្រោយវិញបាន។
ក្រោយការប្រកាសដកខ្លួនរបស់អាមេរិក ជប៉ុនបានប្រឹងប្រែងយ៉ាងខ្លាំងដើម្បីឲ្យកិច្ចព្រមព្រៀង TPP ទៅមុខទៀត ខណៈដែលសមាជិកខ្លះក៏មានការប្ដេជ្ញាចិត្តដូចជប៉ុន គឺគ្មានអាមេរិក ក៏គ្មានបញ្ហា។ ប៉ុន្តែសមាជិកខ្លះទៀតនៅតែចង់ឲ្យអាមេរិកវិលត្រឡប់វិញ។ តាមពិតទៅ មួយផ្នែកនៃការប្រឹងប្រែងរបស់ជប៉ុន គឺដើម្បីទប់ទល់ឥទ្ធិពលរបស់ចិន ដែលកើនឡើងយ៉ាងខ្លាំងនៅក្នុងតំបន់ និងនៅលើពិភពលោកផងដែរ។
លោក Motegi និយាយថា ដើម្បីសម្រេចឲ្យបានកិច្ចព្រមព្រៀងខាងលើ ចំណុចសំខាន់ចំនួន២០ នៃកិច្ចព្រមព្រៀងដើម ត្រូវបានព្យួរសិន។ យ៉ាងណាមិញ កិច្ចព្រមព្រៀងថ្មី ត្រូវរង់ចាំសច្ចាប័នពីសមាជិកចំនួន៦ ក្នុងចំណោម១១ ប្រទេស ទើបអាចអនុវត្តតាម។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
យ៉ាងណាក្ដី ដំណើរការទៅមុខនៃការចរចាក្រោមកិច្ចព្រមព្រៀងថ្មី កំពុងស្ថិតក្នុងស្ថានភាពមិនច្បាស់លាស់ ព្រោះតែកាណាដា ដែលជាប្រទេសមានសេដ្ឋកិច្ចធំទីពីរបន្ទាប់ពីជប៉ុនក្នុងចំណោម១១ប្រទេស ហាក់មានជំហរផ្ទុយពីសមាជិកផ្សេង។ ការធានាការងារសម្រាប់ប្រជាជន ការកាត់បន្ថយរបាំងពន្ធ ការការពារបរិស្ថាន សិទ្ធិកម្មករ និងកម្មសិទ្ធិបញ្ញា គឺជាចំណុចក្ដៅក្នុងការចរចា ក្រោយការដកខ្លួនរបស់អាមេរិក៕
Tag:
TPP
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com