ជាតិ
សង្គមជាតិ
×![]()
សៀមរាប៖ ចំនួនអ្នករត់រ៉ឺម៉កកង់បីនៅខេត្តសៀមរាប មានចំនួនច្រើនលើសលប់ មិនថានៅតំបន់ផ្សារចាស់ ផ្សាររាត្រី ឬនៅតាមប្រាសាទ។ ដោយសារចំនួនច្រើនបែបនេះហើយ ទើបធ្វើឱ្យមុខរបរមួយនេះ ពិបាករកទីផ្សារ មានន័យថា ម៉ូយតិច តែអ្នកចាប់ម៉ូយមានចំនួនច្រើន។ អ្នករត់រ៉ឺម៉កមួយចំនួននៅតាមប្រាសាទ បានរអ៊ូពីបញ្ហានេះដូចគ្នា ដោយពួកគេលើកឡើងថា រ៉ឺម៉ក់កាន់តែកើន ចំណែកភ្ញៀវកាន់តែខ្សត់ទៅៗ។
នៅមុខប្រាសាទអង្គរវត្ត ទីធ្លាសម្រាប់ចតយានយន្ត មានទាំងឡាន និងរ៉ឺម៉កចតព្រោងព្រាត។ នៅម៉ោងប្រមាណ ១២ថ្ងៃត្រង់ នាថ្ងៃទី១០ វិច្ឆិកា ពេលដែលម្ចាស់រ៉ឺម៉កច្រើន កំពុងរង់ចាំភ្ញៀវ ដែលនឹងចាកចេញពីប្រាសាទវិញ។
នៅទីនោះ លោក ចំរើន កំពុងអង្គុយផ្អែកមើលទូរសព្ទនៅលើរ៉ឺម៉ករបស់លោក និងបានឆ្លៀតមកនិយាយជាមួយអ្នកសារព័ត៌មាន។ លោក ចំរើន ប្រកបរបរមួយនេះជិត១០ឆ្នាំមកហើយ ហើយថ្ងៃនេះ លោកជាប់ជូនភ្ញៀវមួយក្រុម ដើរតាមប្រាសាទ។
បុរសសម្បុរសណ្តែតបាយមួយនេះ រៀបរាប់ថា ក្នុងខែ១១នេះ ភ្ញៀវហាក់ងើបបន្តិច។ លោកបន្តថា៖« ខែនេះ មួយថ្ងៃអាចបានមួយក្រុម តែសរុបមួយខែ បានតែ៣ ទៅ៤ក្រុម វាប្រសើរជាងខែមុន ចាប់ពីខែ ៧ដល់ខែ១០ មួយខែបានតែមួយក្រុមអីតែប៉ុណ្ណោះ»។ លោក ចំរើន ដឹកភ្ញៀវចម្រុះ មានទាំងអឺរ៉ុប និងអាស៊ី។ លោកមើលឃើញថា កំណើនរ៉ឺម៉កកាន់តែច្រើន ធ្វើឱ្យលោកពិបាករ។ លោក ចំរើន ថ្លែងមិនលាក់លៀម ដោយលោកថា ពេលទំនេរ ឬខ្សត់ភ្ញៀវ លោកក៏ឆ្លៀតធ្វើសំណង់បន្ថែមផងដែរ។
នៅមិនឆ្ងាយពីរ៉ឺម៉កលោក ចំរើន នោះគឺលោក កី។ លោក កី កំពុងជជែកជាមួយមិត្តភក្តិម្នាក់ទៀត មុនពេលអ្នកសារព័ត៌មានចូលទៅក្បែរគាត់ដើម្បីសាកសួរព័ត៌មាន។ សម្រាប់លោក កី មើលឃើញខុសគ្នាពីលោក ចំរើន នោះគឺថា ខែនេះភ្ញៀវហាក់មិនទាន់ឡើងនៅឡើយ។
តាមការមើលឃើញមួយទៀតរបស់លោក កី គឺថាភ្ញៀវភាគច្រើនទិញសំបុត្រចូលទស្សនារមណីយដ្ឋានអង្គរតែមួយថ្ងៃប៉ុណ្ណោះ។ រឿងរ៉ាវដែលលោកស្តាប់ឮពីភ្ញៀវនោះ គឺទាក់ទងនឹងតម្លៃសំបុត្រថ្លៃ ទើបធ្វើឱ្យភ្ញៀវកាត់បន្ថយពេលវេលានៅតាមប្រាសាទ។
ចំណែកលោក វី ដែលកំពុងនៅក្បែរនោះ ក៏មិនខុសគ្នាដែរ លោកថា ភ្ញៀវច្រើនមកតាមទួរ ឬតាមក្រុមហ៊ុនទេសចរណ៍ ហើយភាគតិចណាស់មកជាលក្ខណៈឯកជន។ ដោយសារខ្សត់ភ្ញៀវដឹកនៅតាមប្រាសាទ លោក វី ឆ្លៀតពេលចាំដឹកភ្ញៀវនៅតាមតំបន់ផាប់ស្ទ្រីត ឬផ្សារចាស់ផងដែរ តែលោកថា តំបន់ទាំងនោះក៏រិតតែពិបាកទៀត ដោយសាររ៉ឺម៉កច្រើន៕
Tag:
រ៉ឺម៉កសៀមរាប
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
