អន្តរជាតិ
នយោបាយអន្តរជាតិ
ប្រមុខការទូតឡាវ៖ ឡាវ មានកិត្តិយស និងមោទកភាពចំពោះដំណើរទស្សនកិច្ចលោកស៊ី ជិនពីង
× រដ្ឋាភិបាលក្រុងវៀងចន្ទន៍ បានត្រៀមខ្លួនរួចជាស្រេចហើយដើម្បីទទួលស្វាគមន៍ប្រធានាធិបតីចិន លោក ស៊ី ជិនពីង ក្នុងដំណើរទស្សនកិច្ចផ្លូវរដ្ឋទៅកាន់ឡាវ ។ ក្រុងវៀងចន្ទន៍ ក៏រំពឹងនឹងចុះហត្ថលេខាលើកិច្ចព្រមព្រៀងជាច្រើនជាមួយនឹងក្រុងប៉េកាំងផងដែរ ។
លោករដ្ឋមន្ត្រីការបរទេសទេសឡាវ Saleumxay Kommasith នៅថ្ងៃ១០ វិច្ឆិកា បានឲ្យដឹងថា ឡាវ និងចិន គ្រោងនឹងចុះហត្ថលេខាលើកិច្ចព្រមព្រៀងកិច្ចសហប្រតិបត្តិការចំនួន១៧ ក្នុងអំឡុងពេលដំណើរទស្សនកិច្ចផ្លូវរដ្ឋរបស់លោកប្រធានាធិបតីចិនទៅកាន់ឡាវ ។ នេះបើយោងតាមការចុះផ្សាយរបស់សារព័ត៌មានឡាវ The Vientiane Times ។
សូមជម្រាបផងដែរថា លោកប្រធានាធិបតី ស៊ី ជិនពីង នឹងបំពេញទស្សនកិច្ចផ្លូវរដ្ឋរយៈពេលពីរថ្ងៃទៅកាន់ឡាវចាប់ពីថ្ងៃទី១៣ដល់ថ្ងៃទី១៤ វិច្ឆិកា តាមការអញ្ជើញរបស់លោក ប្រធានាធិបតីឡាវ Bounnhang Vorachith ។ នេះ គឺជាជាការបំពេញទស្សនកិច្ចផ្លូវរដ្ឋលើកដំបូងបំផុតហើយរបស់លោក បន្ទាប់ពីលោក ជាប់ជាអគ្គលេខាធិការបក្សកុម្មុយនីស្តចិន ។
តាមប្រភពព័ត៌មានដដែល ប្រមុខការទូតឡាវ បានចាត់ទុកដំណើរទស្សនកិច្ចរបស់លោកប្រធានាធិបតី ស៊ី ជិនពីង គឺជាព្រឹតិ្តការណ៍ប្រវត្តិសាស្ត្រមួយដ៏សំខាន់ក្នុងទំនាក់ទំនងនិងកិច្ចសហប្រតិបត្តិការឡាវ-ចិន ។ លោក ថែមទាំងលើកឡើង៖« យើង ពិតជាមានកិត្តិយស មោទកភាព និងរីករាយ ហើយ យើង បានត្រៀមលក្ខណៈរួចស្រេចដើម្បីស្វាគមន៍លោកស៊ី ជិនពីង»៕
© រក្សាសិទ្ធិដោយ thmeythmey.com