កីឡាជាតិ
ជាតិ
ថ្នាក់ដឹកនាំកីឡាទាញព្រ័ត្ររំពឹងអាចសាងសមិទ្ធផលល្អកម្រិតអាស៊ាន តែអាស៊ីរំពឹងបានបទពិសោធ
× សហព័ន្ធកីឡាទាញព្រ័ត្រកម្ពុជា នឹងបញ្ចូនកីឡាករកីឡាការិនីចំនួន២ក្រុម (ស្រី១ក្រុម) ទៅចូលរួមប្រកួតជើងឯកអាស៊ី លើកទី១១ និងអាស៊ីអាគ្នេយ៍លើកទី២ ដែលធ្វើរួមគ្នា នៅលើទឹកដីថៃ ពីថ្ងៃទី១៨ ដល់ ថ្ងៃទី២២ ខែធ្នូ ឆ្នាំ២០១៧។ ទាំងថ្នាក់ដឹកនាំ និងក្រុមកីឡាករ សុទ្ធតែរំពឹងថា កម្ពុជានឹងទទួលលទ្ធផលល្អ ក្នុងកម្រិតអាស៊ាន និងទទួលបានមេរៀនថ្មី ពីកម្រិតអាស៊ី។
ប្រធានសហព័ន្ធកីឡាទាញព្រ័ត្រកម្ពុជា លោក មាស សារិន លើកឡើងថា ទោះបីសមត្ថភាពកីឡាករកម្ពុជា នៅមានកម្រិតទាបក៏ដោយ តែលោករំពឹងថា ក្រុមអត្តពលិកកីឡាទាញព្រ័ត្រកម្ពុជា នឹងអាចសាងស្នាដៃថ្មីជូនជាតិ សម្រាប់ការចូលរួមប្រកួតជើងឯកអាស៊ានលើកទី២ ដែលរៀបចំនៅលើទឹកថៃពីថ្ងៃទី១៨ ដល់ថ្ងៃទី២០ ខែធ្នូខាងមុខ។
លោក មាស សារិន ប្រធានសហព័ន្ធកីឡាទាញព្រ័ត្រកម្ពុជា
«ទោះបីកម្រិតអាស៊ីអាគ្នេយ៍ យើងមិនទាន់អាចឈានទៅរកលេខ១ លេខ២ ឬលេខ៣បាន ប៉ុន្តែយើងក៏អាចទទួលបានជោគជ័យ លើប្រទេសមួយចំនួនដែរ។ ហើយបើសិនជាប្រទេសខ្លាំងៗមួយចំនួន មិនចូលរួម យើងអាចឈានដល់ចំណាត់ថ្នាក់លេខ៣»។ នេះជាការលើកឡើងរបស់ លោក មាស សារិន ក្នុងសន្និសីទសារព័ត៌កាលពីពេលថ្មីៗ ដោយលោកបន្ថែមថា៖«សម្រាប់ការប្រកួតកម្រិតអាស៊ីយើងគ្មានសង្ឃឹមនោះទេ គឺយើងចូលរួមគ្រាន់តែដើម្បីសាកល្បង និងរៀនសូត្រពីគេតែប៉ុណ្ណោះ»។
ជាមួយគ្នានេះ កីឡាករ យ៉ាន់ ដាម តំណាងក្រុមកីឡាករទាញព្រ័ត្រកម្ពុជាបានប្តេជ្ញាថា នឹងខិតខំប្រឹងប្រែងឲ្យអស់ពីសមត្ថភាព យកជ័យជម្នះពីការប្រកួត។ តាមរយៈឆន្ទៈ និងការតាំងចិត្តធ្វើការជាក្រុមធ្វើឲ្យកីឡាកររូបនេះ ដាក់ក្តីរំពឹងរហូតដល់៧០ភាគរយ សម្រាប់ការចូលរួមលើកនេះ។
ទន្ទឹមនឹងក្តីរំពឹងរបស់អត្តពលិក អគ្គលេខាធិការសហព័ន្ធកីឡាទាញព្រ័ត្រកីឡាកម្ពុជា អ្នកស្រី ប្រាក់ សម្ផស្ស បានបង្ហាញក្តីរំពឹងយ៉ាងដូច្នេះថា៖«ចំពោះការប្រកួតកម្រិតអាស៊ានពួកគាត់សង្ឃឹមតែ៧០ភាគរយប៉ុណ្ណោះ ប៉ុន្តែសម្រាប់ខ្ញុំ មានទំនុកចិត្តលើពួកគាត់រហូតដល់៩០ភាគរយឯណោះ ព្រោះពួកគាត់មានឆន្ទៈខ្ពស់ ក្នុងការហ្វឹកហាត់ ហើយការហ្វឹកហាត់ទៀតសោត ពួកគាត់សហការគ្នាល្អ និងចេះរួមគ្នាជាធ្លុងមួយ»។
សម្រាប់ការចូលរួមប្រកួតជើងឯកអាស៊ី និងអាស៊ាននៅថៃនេះដែរ កម្ពុជាបញ្ជូនអត្តពលិក២ក្រុម (ស្រី១ក្រុម) ឲ្យចូលរួម។ ក្នុងនោះ ក្រុមបុរសត្រូវប្រកួតក្នុងទម្ងន់សរុប៦០០គីឡូក្រាម និងនារីប្រកួតក្នុងទម្ងន់សរុប៥០០គីឡូក្រាម ដោយ១ក្រុម មាន១០នាក់(បង្រុង១នាក់)។ សម្រាប់ការចូលរួមនេះ ក្រុមនីមួយៗ ត្រូវបង់ថវិកា១,២០០ដុល្លារ ក្នុង១ក្រុម តែដោយមានការលើកលែងពីម្ចាស់ផ្ទះថៃ កម្ពុជាបង់ត្រឹមតែ១,២០០ដុល្លារតែប៉ុណ្ណោះ ចំពោះការបញ្ជូនពីរក្រុមឲ្យចូលរួម៕
Tag:
ទាញព្រ័ត្រ
មាស សារិន
ប្រាក់ សម្ផស្ស
© រក្សាសិទ្ធិដោយ thmeythmey.com