កីឡាអន្តរជាតិ
អន្តរជាតិ
ប៉េរូ ជាក្រុមចុងក្រោយដែលឡើងទៅ World Cup ក្រោយធ្វើឲ្យ នូវែលសេឡង់ ទឹកភ្នែក
ក្រុមកីឡាករប៉េរូ អបអរការស៊ុតបាល់បញ្ចូលទីលើនូវែលសេឡង់។ រូបថត AFP
×![]()
ដោយ: រួបរួម
ក្រុមកីឡាបាល់ទាត់ជម្រើសជាតិប៉េរូ មកពីតំបន់អាមេរិកឡាទីន បានយកឈ្នះភ្ញៀវ នូវែល សេឡង់ មកពីតំបន់អូសេអានី ក្នុងលទ្ធផល ២-០ សម្រាប់ការប្រកួតវគ្គជម្រុះជើងទីពីរនៅកីឡដ្ឋាន Estadio Nacional។
កីឡាករ Jefferson Farfan បានស៊ុតបាល់បញ្ចូលទីនៅនាទី២៨ ហើយ Christian Guillermo Ramos បន្ថែមគ្រាប់ទី២នៅនាទី៦៥ ដើម្បីនាំប៉េរូ ទៅបង្ហាញវត្តមាននៅក្នុងព្រឹត្តិការណ៍ World Cup ជាលើកទី៥ ខណៈនូវែល សេឡង់ខកឱកាសក្នុងនាមជាក្រុមតែមួយគត់តំណាងឲ្យតំបន់អូសេអានី (OFC) ។ ការប្រកួតជើងទីមួយនៅកីឡដ្ឋាន Westpac Stadium ក្រុង Wellington បញ្ចប់ក្នុងលទ្ធផលស្មើ ០-០ ។
ប៉េរូក្លាយជាក្រុមទី៥តំណាងឲ្យតំបន់អាមេរិកឡាទីន និងជាក្រុមចុងក្រោយ ដែលត្រូវធ្វើដំណើរទៅកាន់ប្រទេសរុស្ស៊ី សម្រាប់ការប្រកួត FIFA World Cup ឆ្នាំ២០១៨៖
ក្រុមទាំង៣២ដែលត្រូវបង្ហាញខ្លួននៅ FIFA World Cup 2018 រួមមាន៖
ក្រុមនៅតំបន់អឺរ៉ុប (UEFA) មាន១៤ក្រុម៖ ម្ចាស់ផ្ទះរុស្ស៊ី បែលហ្ស៊ិក អាល្លឺម៉ង់ អង់គ្លេស អេស្ប៉ាញ ប៉ូឡូញ អ៊ីស្លង់ ស៊ែប៊ី ព័រទុយហ្គាល់ បារាំង ស្វីស ក្រូអាស៊ី ស៊ុយអែត និងដាណឺម៉ាក។
ក្រុមមកពីអាមេរិកឡាទីន (CONMEBOL) មាន៥ក្រុម៖ ប្រេស៊ីល អ៊ុយរូហ្គាយ អាហ្សង់ទីន កូឡុំប៊ី និងប៉េរូ ។
ក្រុមតំណាងឲ្យតំបន់អាស៊ី (AFC) មាន៥ក្រុម៖ អ៊ីរ៉ង់ ជប៉ុន កូរ៉េខាងត្បូង អារ៉ាប៊ីសាអូឌីត និងអូស្ត្រាលី។
ក្រុមពីតំបន់អាហ្វ្រិក (CAF) មាន៥ក្រុម៖ នីហ្សេរីយ៉ា អេហ្ស៊ីប សេណេហ្គាល់ ម៉ារ៉ុក និងទុយនីស៊ី ។
ក្រុមតំបន់អាមេរិកខាងជើង កណ្តាល និងការ៉ាអ៊ីប (CONCACAF) មាន៣ក្រុម៖ ម៉ិកស៊ិក កូស្តារីកា ប៉ាណាម៉ា ៕
Tag:
World Cup
ប៉េរូ
© រក្សាសិទ្ធិដោយ thmeythmey.com
