អន្តរជាតិ
អ្នកការទូតព្រុយណេ លោក Lim Jock Hoi ក្លាយជាអគ្គលេខាធិការថ្មីអាស៊ាន
× កិច្ចប្រជុំកំពូលពាក់ព័ន្ធរបស់អាស៊ាន ដែលមានហ្វីលីពីន ជាម្ចាស់ផ្ទះ បានបិទបញ្ចប់ជាផ្លូវការនិងដោយផ្លែផ្កាផងដែរ ។ ជាមួយនឹងការបិទបញ្ចប់នេះ ប្រធានអាស៊ានត្រៀមកាន់តំណែងសិង្ហបុរី ក៏បានណែនាំអគ្គលេខាធិការថ្មីរបស់អាស៊ានផងដែរ ។
ឆ្លៀតឱកាសនៃការបង្ហាញចំណាប់អារម្មណ៍ និងទទួលញញួរប្រធានអាស៊ានពីប្រធានាធិបតី រ៉ូឌ្រីហ្គូ ឌូទើតេ នៅថ្ងៃ១៤ វិច្ឆិកា លោកនាយករដ្ឋមន្ត្រី លី សៀនឡុង ដែលនឹងត្រូវធ្វើជាប្រធានអាស៊ានឆ្នាំ២០១៨នោះ ក៏បានណែនាំប្រតិភូពាក់ព័ន្ធនៃកិច្ចប្រជុំអាស៊ានឲ្យបានស្គាល់អគ្គលេខាធិការអាស៊ានថ្មីផងដែរ ។
« ខ្ញុំ សូមអរគុណលោកអគ្គលេខាធិការអាស៊ាន Le Luong Minh និងសហការីរបស់លោកចំពោះកិច្ចប្រឹងប្រែងកន្លងមកក្នុងការជ្រោមជ្រែងកិច្ចប្រជុំអាស៊ានជាច្រើន ។ ហើយខ្ញុំ សូមស្វាគមន៍ចំពោះ លោកអគ្គលេខាធិការអាស៊ានត្រៀមកាន់តំណែង Lim Jock Hoi ផងដែរ ។ » នេះគឺជាសេចក្តីថ្លែងការណ៍របស់លោកនាយករដ្ឋមន្ត្រី លី នៅថ្ងៃទទួលញញួរប្រធាន ដែលចុះផ្សាយនៅគេហទំព័រផ្លូវការនាយករដ្ឋមន្ត្រីសិង្ហបុរី ។
សូមជម្រាបថា លោក Le Luong Minh ដែលជាអតីតរដ្ឋមន្ត្រីការបរទេសវៀតណាមនោះ ត្រូវបានតែងតាំងជាអគ្គលេខាធិការអាស៊ានសម្រាប់អាណត្តិប្រាំឆាំ្ន ២០១២ដល់២០១៧ ។ សម្រាប់ លោក Lim Jock Hoi ដែលជាជនជាតិព្រុយណេនោះ ក៏ជាមន្ត្រីជាន់ខ្ពស់នៃក្រសួងការបរទេសព្រុយណេផងដែរ ។ លោក Lim នឹងត្រូវបន្តតំណែងជាអគ្គលេខាធិការអាស៊ានចាប់ពីឆ្នាំ២០១៨ដល់២០២៣ ។
យោងតាមមាត្រា ១១ នៃធម្មនុញ្ញអាស៊ាន អគ្គលេខាធិការអាស៊ាន ត្រូវបានតែងតាំងដោយកិច្ចប្រជុំកំពូលអាស៊ាន សម្រាប់អាណត្តិប្រាំឆ្នាំ ដែលអាណត្តិនេះ មិនអាចបន្តទៀតបានទេ ។ សម្រាប់ការតែងតាំងនេះ ត្រូវជ្រើសរើសចេញពីចំណោមជនជាតិ នៃរដ្ឋសមាជិកអាស៊ាន ផ្អែកទៅលើការប្តូរវេនគ្នាតាមលំដាប់អក្ខរក្រមនៃឈ្មោះរដ្ឋសមាជិកដោយពិចារណាល្អិតល្អន់ទៅលើសុច្ចរិតធម៌ សមត្ថភាព និងបទពិសោធន៍វិជ្ជាជីវៈ និងសមភាពយេនឌ័រផងដែរ ។
សមាជិកអាស៊ានទាំងអស់មានដប់ប្រទេស ក្នុងនោះ បើរាប់តាមលំដាប់អក្ខរក្រមនៃឈ្មោះជាភាសាអង់គ្លេសមានដូចជា ព្រុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម ៕
Tag:
អាស៊ាន
ព្រុយណេ
សិង្ហបុរី
© រក្សាសិទ្ធិដោយ thmeythmey.com