ជាតិ
សេដ្ឋកិច្ច
រដ្ឋមន្ត្រីទេសចរណ៍ ស្នើឲ្យចិនជួយរៀបចំផែនការមេអភិវឌ្ឍន៍វិស័យទេសចរណ៍នៅតំបន់ឆ្នេរ
× ភ្នំពេញ៖ ក្រសួងទេសចរណ៍ បានស្នើឲ្យភាគីចិនជួយរៀបដំផែនការមេក្នុងការអភិវឌ្ឍវិស័យទេសចរណ៍នៅតំបន់ឆ្នេរសមុទ្រកម្ពុជា និងជួយជំរុញការវិនិយោគផលិតផលទេសចរណ៍នៅតំបន់នេះ។
ការស្នើដូច្នេះធ្វើឡើងក្នុងជំនួបពិភាក្សារវាងលោក ថោង ខុន រដ្ឋមន្ត្រីក្រសួងទេសចរណ៍ និងគណៈប្រតិភូចិនមកពីខេត្តសាងទុង ដែលដឹកនាំដោយលោក ជី ចាងឈី អភិបាលរងខេត្តមួយនេះ នៅថ្ងៃទី១៥ខែវិច្ឆិកា។ គណៈប្រតិភូចិនមកបំពេញទស្សនៈកិច្ចលើកនេះ គឺដើម្បីពិនិត្យមើលសក្ដានុពល និងការអភិវឌ្ឍវិស័យទេសចរណ៍របស់កម្ពុជា។
បើតាមព័ត៌មានដែលផ្សាយលើទំព័រហ្វេសប៊ុករបស់ក្រសួងទេសចរណ៍ លោក ថោង ខុន បានស្នើដល់ភាគីចិន តាមរយៈគណៈប្រតិភូខេត្តសាងទុង នេះ ឲ្យជួយសិក្សារៀបចំផែនកាមេក្នុងការអភិវឌ្ឍវិស័យទេសចរណ៍នៅតំបន់ឆ្នេរសមុទ្រកម្ពុជា។ ជាមួយគ្នានេះ រដ្ឋមន្ត្រីទេសចរណ៍រូបនេះ បានស្នើភាគីចិនជួយជំរុញការវិនិយោគផលិតផលទេសចរណ៍ មណ្ឌលកម្សាន្តទេសចរន៍នៅតំបន់ឆ្នេរ ដោយលោកបានដឹងថា ខេត្តសាងទុងមាន ដែលជាខេត្តជាប់មាត់សមុទ្ររបស់ចិន មានបទពិសោធន៍ជោគជ័យ ក្នុងការអភិវឌ្ឍវិស័យទេសចរណ៍នៅតំបន់ឆ្នេររបស់ខ្លួន។
កម្ពុជាបានរៀបចំផែនការយុទ្ធសាស្ត្រ China Ready ដើម្បីទាក់ទាញភ្ញៀវទេសចរណ៍ចិន ខណៈរដ្ឋាភិបាលកំណត់ទិសដៅស្រូបយកភ្ញៀវចិនចំនួន ២លាននាក់នៅឆ្នាំ២០២០ ។ បើតាមតួលេខរបស់ក្រសួងទេសចណ៍ ភ្ញៀវទេសចរចិនបានមកកម្សាន្តនៅកម្ពុជាចំនួន ៨៤ម៉ឺននាក់ ក្នុងចំណោមទេសចរសរុប ៣,៩លាននាក់ នៅក្នុងរយៈពេល៩ខែឆ្នាំនេះ ដែលកើនឡើង ៤៥ភាគរយ ធៀបនឹងរយៈពេលដូចគ្នាកាលពីឆ្នាំមុន ដែលធ្វើឲ្យទីផ្សារចិនឈរនៅលេខរៀងទី១៕
© រក្សាសិទ្ធិដោយ thmeythmey.com