ជាតិ
នយោបាយជាតិ
ក្រៅពីច្រានសេចក្តីសម្រេចតុលាការ CNRP ដែលទើបតែត្រូវបានរំលាយ ប្តេជ្ញារក្សារចនាសម្ព័ន្ធខ្លួន
× គណបក្សសង្គ្រោះជាតិត្រូវបានរំលាយតាមរយៈសាលដីកាតុលាការកំពូល ក្រោយដំណើរការសវនាការពេញមួយថ្ងៃ នាថ្ងៃព្រហស្បតិ៍ ទី១៦ ខែវិច្ឆិកា នេះ។ ប៉ុន្តែនៅថ្ងៃដដែល ថ្នាក់ដឹកនាំបក្សដែលត្រូវបានរំលាយមួយនេះ បានចេញសេចក្តីប្រកាសព័ត៌មាន ដើម្បីច្រានចោលសេចក្តីសម្រេចរបស់តុលាការជាន់ខ្ពស់ ដែលបានពិន័យមន្ត្រីជាន់ខ្ពស់១១៨នាក់ មិនឲ្យធ្វើនយោបាយរយៈពេល៥ឆ្នាំ។
សេចក្ដីថ្លែងការណ៍ពីរទំព័រដែលបង្ហោះនៅលើហ្វេសប៊ុក លោក កឹម សុខា បានចោទការសម្រេចរបស់តុលាការកំពូលថាមានចរិតនយោបាយ ធ្វើឡើងក្រោមការគាបសង្កត់ និងតាមបំណងរបស់គណបក្សកាន់អំណាច។ សំណេរនោះ បានផ្តោតលើសមាសភាពក្រុមប្រឹក្សាជំនុំជម្រុះតុលាការកំពូល ដែលជាសមាជិករបស់គណបក្សប្រជាជនកម្ពុជា។
សេចក្ដីថ្លែងការណ៍ដដែលនេះបានសរសេរយ៉ាងដូច្នេះទៀតថា«គណបក្សសង្គ្រោះជាតិ មិនទទួលស្គាល់សេចក្ដីសម្រេចរបស់តុលាការកំពូលជាដាច់ខាត និងនៅតែចាត់ទុកខ្លួនជាគណបក្សស្របច្បាប់ ដែលទទួលបានអាណិត្តតាមឆន្ទៈរបស់ប្រជាពលរដ្ឋខ្មែរពាក់កណ្ដាលប្រទេស»។
លិខិតមួយនេះថែមទាំងអះអាងថា អ្នកតំណាងរាស្ត្រ ក្រុមប្រឹក្សារាជធានីខេត្ត ក្រុមប្រឹក្សាក្រុង ស្រុក ខណ្ឌ និងក្រុមប្រឹក្សាឃុំ សង្កាត់ នៅតែជាតំណាងស្របច្បាប់ និងជាតំណាងរបស់ប្រជាពលរដ្ឋខ្មែរ។
ជាមួយនឹងការអំពាវនាវសុំអន្តរាគមន៍ពីអន្តរជាតិ ថ្នាក់ដឹកនាំ CNRP ដែលទើបត្រូវបានរំលាយ បានស្នើដល់សមាជិកទាំងអស់រក្សាភាពស្ងៀមស្ងាត់ និងអហិង្សា ដោយប្តេជ្ញារក្សា និងការពាររចនាសម្ព័ន្ធនយោបាយរបស់ខ្លួន ដោយមានលោក កឹម សុខា ជាប្រធាន៕
© រក្សាសិទ្ធិដោយ thmeythmey.com