ជាតិ
ព្រះរាជអាជ្ញាសាកសួរអតីតអ្នកព័ត៌មានអាស៊ីសេរីទាំង២នាក់ នៅរសៀលនេះ រូបពីហ្វេសប៊ុកលោក អ៊ួន ឈិន (ខាងឆ្វេង) លោក យាង សុជាមេត្តា (ខាងស្ដាំ)
× តំណាងអយ្យការនៃសាលាដំបូងរាជធានីភ្នំពេញ សាកសួរអតីតអ្នកសារព័ត៌មានវិទ្យុអាស៊ីសេរី២នាក់ នៅរសៀលថ្ងៃទី១៧ វិច្ឆិកានេះ ទាក់ទងនឹងករណីដែលសមត្ថកិច្ច សង្ស័យថា លួចផលិតព័ត៌មានពីកម្ពុជា ហើយផ្ញើទៅស្ថាប័នអាស៊ីសេរី ដែលមានមូលដ្ឋាននៅរដ្ឋធានីវ៉ាស៊ីនតោន នៃសហរដ្ឋអាមេរិក ។
មុនចូលបន្ទប់សាកសួរ លោក កែវ វ៉ាន្នី មេធាវីការពារក្តីឲ្យបុគ្គលិកវិទ្យុអាស៊ីសេរីទាំង២នាក់នេះ បានប្រាប់សារព័ត៌មានថ្មីៗថា លោកនឹងតាមដានមើលការសាកសួររបស់ព្រះរាជអាជ្ញារចំពោះកូនក្តីរបស់ខ្លួន។
អតីតបុគ្គលឹកអាស៊ីសេរីយលោក អ៊ួន ឈិន និងលោក យាង សុធារិន ហៅ យាង សុជាមេត្តា ត្រូវបានសមត្ថកិច្ចឃាត់ខ្លួននៅក្នុងផ្ទះសំណាក់ម៉ារ៉ាឌី កាលពីថ្ងៃទី១៤ ខែវិច្ឆិកា ក្រោមហេតុផលថា ពួកគេបានរៀបចំបើកអាជីវកម្មថតរូបមិនបានសុំច្បាប់អនុញ្ញាត និង លួចផលិតព័ត៌មានផ្ញើទៅក្រៅប្រទេស។
ក្រោយឃាត់ខ្លួនបានពីរថ្ងៃ សមត្ថកិច្ចបានបញ្ជូនលោក អ៊ួន ឈិន និងយាង សុជាមេត្តា មកតុលាការដើម្បីបន្តនីតិវិធីច្បាប់។ ស្នងការរងនគរបាលជាតិ លោក ស៊ីម វុទ្ធី បានបញ្ជាក់ប្រាប់សារព័ត៌មានថ្មីៗថា បុគ្គលិកអាស៊ីសេរីទាំង២នាក់ ត្រូវប្រឈមមុខនឹងបទចោទ «ប្រគល់ឲ្យបរទេសនូវព័ត៌មានជាអាទិ៍ ដែលអាចធ្វើឲ្យមហន្តរាយដល់ការការពារជាតិ» តាមមាត្រា ៤៤៥ នៃក្រមព្រហ្មទណ្ឌ។ ប្រសិនជាតុលាការរកឃើញកំហុសមែននោះលោក អ៊ួន ឈិន និងលោក យាង សុធារិន ហៅ យាង សុជាមេត្តា អាចប្រឈមមុខនឹងការជាប់ទោសពី ៧ឆ្នាំ ទៅ១៥ ឆ្នាំតាមខ្លឹមសារនៃមាត្រាច្បាប់នេះ។
វិទ្យុអាស៊ីសេរី ដែលមានវត្តមាននៅកម្ពុជាជិត២០ឆ្នាំ មកហើយនោះ បានប្រកាសផ្អាកការិយាល័យព័ត៌មាន នៅរាជធានីភ្នំពេញមួយរយៈសិន កាលពីថ្ងៃទី១២ ខែកញ្ញា ឆ្នាំ២០១៧ ។ វិទ្យុអាស៊ីសេរី បានអះអាងថា ការចាត់វិធានក្តៅរបស់រដ្ឋាភិបាលកម្ពុជា គឺជាមូលហេតុដែលខ្លួនត្រូវបង្ខំចិត្តផ្អាកការិយាល័យព័ត៌មាន៕
Tag:
RFA
អ៊ួន ឈិន
យាង សុជាមេត្តា
© រក្សាសិទ្ធិដោយ thmeythmey.com