អន្តរជាតិ
ចិន-ហ្វីលីពីន សន្យាមិនប្រើកងកម្លាំងដោះស្រាយជម្លោះសមុទ្រចិនខាងត្បូង លោកប្រធានាធិបតីហ្វីលីពីន Rodrigo Duterte (ស្តាំ) ទៅចាប់ដៃនាយករដ្ឋមន្ត្រីចិន លោក Li Keqiang នាជំនួបនៅម៉ានីលកាលពីថ្ងៃទី១៥ ខែវិច្ឆិកា។ រូបថត AFP
× រដ្ឋាភិបាលក្រុងម៉ានីល និងរដ្ឋាភិបាលក្រុងប៉េកាំង បានព្រមព្រៀងគ្នាក្នុងការមិនប្រើប្រាស់កងទ័ពដើម្បីដោះស្រាយភាពចម្រូងចម្រាសនៅក្នុងសមុទ្រចិនខាងត្បូង ។ កិច្ចព្រមព្រៀងនេះធ្វើឡើង ដោយភាគីទាំងពីរ យកផលប្រយោជន៍នៃកិច្ចសហប្រតិបត្តិការជារឿងអាទិភាព ។
លោកនាយករដ្ឋមន្ត្រីចិន លី ឃឺឈាំង និងលោកប្រធានាធិបតីហ្វីលីពីន រ៉ូឌ្រីហ្គូ ឌូទើតេ នៅថ្ងៃ១៦ វិច្ឆិកា បានចេញសេចក្តីថ្លែងការណ៍រួមមួយពាក់ព័ន្ធនឹងរឿងជម្លោះអធិបតេយ្យ ដោយភាគីទាំងពីរ បានអះអាងជាថ្មី ពីសារៈសំខាន់នៃសន្តិភាពនៅក្នុងសមុទ្រចិនខាងត្បូង និងសេរីភាពនៃការធ្វើនាវាចរណ៍ និងការហោះហើរ ។ នេះបើយោងតាមភ្នាក់ងារព័ត៌មានចិន Xinhua ។
តាមប្រភពព័ត៌មានដដែលនោះ ភាគីទាំងពីរ ក៏បានបញ្ជាក់ក្នុងសេចក្តីថ្លែងការណ៍ ដែលបាននៅថ្ងៃចុងក្រោយនៃទស្សនកិច្ចរបស់នាយករដ្ឋមន្ត្រី លី យ៉ាងដូច្នេះថា៖« មិនគួរឲ្យមានឡើយនូវហិង្សា ឬការគំរាមប្រើប្រាស់ហិង្សានៅតំបន់ជម្លោះ ហើយ ជម្លោះនេះ ក៏គួរតែត្រូវដោះស្រាយតាមរយៈកិច្ចសន្ទនារវាងប្រទេសពាក់ព័ន្ធដែលមានអធិបតេយ្យតែម្តង»។
សូមជម្រាបផងដែរថា ជម្លោះសមុទ្រចិនខាងត្បូង គឺជាជម្លោះដែលមានរដ្ឋពាក់ព័ន្ធអាស៊ាន ដូចជា ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន ។ នាជំនួបកំពូលនៃកិច្ចប្រជុំអាស៊ាន-ចិន ដែលមានហ្វីលីពីនជាម្ចាស់ និងទើបតែបញ្ចប់ថ្មីៗនេះ អាស៊ាន-ចិន បានព្រមព្រៀងគ្នាក្នុងការចាប់ផ្តើមការចរចាធ្វើក្រមប្រតិបត្តិសមុទ្រចិនខាងត្បូង ដើម្បីគ្រប់គ្រងស្ថានភាពផ្សេងៗនៅទីនោះ ។
អ្វីគួរកត់សម្គាល់ ពីក្រោយនៃការត្រូវរូវគ្នា នោះគឺផលប្រយោជន៍សេដ្ឋកិច្ចរវាងភាគីទាំងពីរ ។ នៅថ្ងៃ១៥ វិច្ឆិកា លោកនាយករដ្ឋមន្ត្រី លី និងលោកប្រធានាធិបតី ឌូទើតេ ក៏បានព្រមព្រៀងគ្នាក្នុងការពង្រឹងទំនាក់ទំនងទ្វេភាគីឲ្យកាន់តែល្អប្រសើរ និងស៊ីជម្រៅ ។ ប្រមុខដឹកនាំទាំងពីរ ក៏បានចុះហត្ថលេខាលើកិច្ចព្រមព្រៀងកិច្ចសហប្រតិបត្តិការចំនួន១៤ដែលពាក់ព័ន្ធលើពាណិជ្ជកម្ម បច្ចេកវិទ្យា និងហេដ្ឋារចនាសម្ព័ន្ធជាដើម ។
ជាងនេះទៅទៀតនោះ តាមរយៈជំនួបនេះ លោកនាយករដ្ឋមន្ត្រី លី ក៏បានសន្យាផ្តល់ជំនួយប្រមាណ ជាង២០ លានដុល្លារដែលជាជំនួយរបស់រដ្ឋាភិបាលចិនដើម្បីស្តារ និងសាងសង់ឡើងវិញនៅតំបន់រងការវាយប្រហារ Marawi របស់ហ្វីលីពីន ដែលទើបតែត្រូវបានរដ្ឋាភិបាលហ្វីលីពីនរម្តោះបានពីក្រុមឧទ្ទាមកាលពីពេលថ្មីៗនេះ ៕
Tag:
ចិន
ហ្វីលីពីន
សមុទ្រចិខខាងត្បូង
© រក្សាសិទ្ធិដោយ thmeythmey.com