អន្តរជាតិ
គ្រាន់តែចេញមុន២០វិនាទី ក្រុមហ៊ុនរថភ្លើងជប៉ុនចេញមុខសុំទោសជាសាធារណៈ
× រថភ្លើងជប៉ុន មានភាពល្បីល្បាញបំផុតចំពោះការទៀងទាត់ពេលវេលាចេញដំណើរ ប៉ុន្តែកំហុសបច្ចេកទេសមួយបានកើតឡើងកាលពីពេលថ្មីៗកន្លងមកនេះ ដោយរថភ្លើងដែលស្ថិតស្ថានីយក្បែរក្រុងតូក្យូ បានចេញដំណើរមុនកាលកំណត់២០វិនាទី។
រថភ្លើង Tsukuba Express ត្រូវចាកចេញពីស្ថានីយ៍ Minami Nagareyama ទៅ Tsukuba នាថ្ងៃអង្គារកន្លងមក នៅព្រឹកម៉ោង៩.៤៤.៤០ ប៉ុន្តែវាបែរបានចេញដំណើរមុន២០វិនាទី ពោលគឺវេលាម៉ោង ៩.៤៤.២០ វិញ។
ចំពោះលឿន២០វិនាទី មុនកាលកំណត់នេះ ក្រុមហ៊ុន Metropolitan Intercity Railway បានចេញសេចក្តីថ្លែងការសុំទោសជាសាធារណៈនៅលើគេហទំព័រផ្លូវការរបស់ខ្លួន ដោយបានអះអាងថា វាជាកំហុសរបស់មន្ត្រីដែលមិនបានផ្ទៀងផ្ទាល់ពេលវេលានៃការចេញដំណើរ។
សេចក្តីថ្លែងការណ៍បានអះអាង ថាពួកគេទទួលខុសត្រូវចំពោះការខូចខាត ឬបញ្ហាអវិជ្ជមាននានា បើទោះបីជាពួកគេមិនទទួលបាននូវបណ្តឹងណាមួយក៏ដោយ។
អ្នកដំណើរទាំងអស់មិនមានប្រតិកម្មអ្វីនោះឡើយ ដោយពួកគេសុទ្ធតែបានទៅដល់គោលដៅរបស់ខ្លួន។ រថភ្លើង Tsukuba Express មានល្បឿនជាង១៣០គីឡូម៉ែត្រក្នុងមួយម៉ោង បានចាប់បើកដំណើរការតាំងពីឆ្នាំ២០០៥មក ដោយផ្ទុកអ្នកដំណើរជាង២៣០ ០០០នាក់ជារៀងរាល់ថ្ងៃ។
ការចេញមុខសុំទោសចំពោះការខុសពេលវេលា២០វិនាទី បង្ហាញពីទំនួលខុសត្រូវរបស់ក្រុមហ៊ុន ដែលមានឈ្មោះល្បីល្បាញលើការទៀងទាត់ពេលវេលានៃការចេញដំណើរ និងការទៅដល់ស្ថានីយ៍៕
© រក្សាសិទ្ធិដោយ thmeythmey.com