ការប្រកួតបាល់ទាត់ត្រៀមស៊ីហ្គេម និងក្រោយស៊ីហ្គេម ចាប់ផ្តើមនៅថ្ងៃអាទិត្យនេះ

កីឡាជាតិ

ជាតិ

ការប្រកួតបាល់ទាត់ត្រៀមស៊ីហ្គេម និងក្រោយស៊ីហ្គេម ចាប់ផ្តើមនៅថ្ងៃអាទិត្យនេះ

18, Nov 2017 , 4:59 pm

រូបភាព

ដោយ:

ព្រឹត្តិការណ៍ប្រកួតបាល់ទាត់ចំនួន៣ គឺការប្រកួតជម្រើសជើងឯកយុវជន U14 យុវជន U16 និងការប្រកួតជម្រើសជើងឯកបាល់ទាត់នារីប្រចាំឆ្នាំ២០១៧ នឹងចាប់ផ្តើមនៅថ្ងៃអាទិត្យនេះ។ សហព័ន្ធកីឡាបាល់ទាត់កម្ពុជា ក៏នឹងដាក់ឲ្យប្រើប្រាស់សាលាតម្រង់ទិសកីឡាបាល់ទាត់របស់ខេត្ត នៅថ្ងៃអាទិត្យនេះផងដែរ។

ការប្រកួតបាល់់ទាត់ចំនួន៣ ដែលរៀបចំសម្រាប់ត្រៀមការប្រកួតកីឡាស៊ីហ្គេមឆ្នាំ២០២៣ រួមមានការប្រកួតជម្រើសជើងឯកយុវជន U14, U16 និងជម្រើសជើងឯកនារីឆ្នាំ២០១៧ បើកយុទ្ធនាការប្រកួតវគ្គជម្រុះ នាថ្ងៃអាទិត្យ ទី១៩ ខែវិច្ឆិកា នេះ នៅកីឡដ្ឋានខេត្តកំពត។ នេះបើយោងតាមសេចក្តីជូនដំណឹងរបស់សហព័ន្ធកីឡាបាល់ទាត់កម្ពុជា។

សហព័ន្ធកីឡាបាល់ទាត់កម្ពុជា នឹងប្រកាសដាក់ឲ្យប្រើប្រាស់ សាលាតម្រង់ទិសកីឡាបាល់ទាត់របស់ខេត្តកំពត ដែលជាផែនការអភិវឌ្ឍន៍កីឡាបាល់ទាត់រយៈពេលវែងរបស់ខ្លួន នៅថ្ងៃនោះដែរ។ ពិធីបើកការប្រកួត ដែលមានការចូលរួមពីថ្នាក់ដឹកនាំសហព័ន្ធកីឡាបាល់ទាត់កម្ពុជា ក្រសួងអប់រំ យុវជន និងកីឡា និងអភិបាលខេត្តកំពត នឹងចាប់ផ្តើមពីម៉ោង៣រសៀលតទៅ។

បន្ទាប់ពីពិធីបើកការប្រកួត ក៏មានការប្រកួតបើកឆាករវាងក្រុមយុវជន U16 ខេត្តកំពតជាមួយយុវជន U16 ខេត្តកោះកុង នៅម៉ោង៣កន្លះ។ ព្រឹត្តិការណ៍ដែលបានចាប់ផ្តើមព្រមគ្នា នៅថ្ងៃទី១៩ វិច្ឆិកា ទាំង៣ខាងលើ ដោយគ្រោងបញ្ចប់នៅថ្ងៃទី១១ ខែមីនា ឆ្នាំ២០១៨ ដូចគ្នា។

ថ្នាក់ដឹកនាំសហព័ន្ធកីឡាបាល់ទាត់កម្ពុជា បានចាត់ទុកព្រឹត្តិការណ៍ខាងលើ ជាយុទ្ធសាស្ត្រអភិវឌ្ឍន៍កីឡាបាល់ទាត់រយៈពេលវែង សម្រាប់ត្រៀមការប្រកួតកីឡាស៊ីហ្គេម ឆ្នាំ២០២៣ និងក្រោយឆ្នាំ២០២៣៕