លោក ប្រាក់ សុខុន នឹងទៅប្រជុំរដ្ឋមន្ត្រីការបរទេសអាស៊ី-អឺរ៉ុប នៅមីយ៉ាន់ម៉ា នៅថ្ងៃចន្ទ

ជាតិ

លោក ប្រាក់ សុខុន នឹងទៅប្រជុំរដ្ឋមន្ត្រីការបរទេសអាស៊ី-អឺរ៉ុប នៅមីយ៉ាន់ម៉ា នៅថ្ងៃចន្ទ

18, Nov 2017 , 8:19 pm

រូបភាព

ដោយ: ថ្មីៗ

លោក ប្រាក់ សុខុន នឹងទៅចូលរួមកិច្ចប្រជុំរដ្ឋមន្ត្រីការបរទេសអាស៊ី-អឺរ៉ុប លើកទី១៣ ដែលប្រព្រឹត្តទៅនៅថ្ងៃទី ២០និងទី២១ ខែវិច្ឆិកានេះ នៅក្រុងណៃពីដោ ប្រទេសមីយ៉ាន់ម៉ា។ ក្នុងឱកាសនេះ លោករដ្ឋមន្ត្រីក្រសួងការបរទេសកម្ពុជា នឹងជួបទ្វេភាគីជាមួយរដ្ឋមន្ត្រីការបរទេសមីយ៉ាន់ម៉ា,ចិន,អនុរដ្ឋមន្ត្រីការបរទេសជប៉ុន និងប្រមុខប្រតិភូនៃប្រទេសផ្សេងទៀត។

លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា នឹងដឹកនាំប្រតិភូទៅចូលរួមកិច្ចប្រជុំរដ្ឋមន្ត្រីការបរទេសអាស៊ី-អឺរ៉ុបលើកទី១៣ ដែលនឹងប្រព្រឹត្តទៅនៅថ្ងៃទី ២០និងទី២១ ខែវិច្ឆិកានេះ នៅក្រុងណៃពីដោ ប្រទេសមីយ៉ាន់ម៉ា។ នេះបើតាមសេចក្តីជូនព័ត៌មានរបស់ក្រសួងការបរទេសកម្ពុជា ដែលបន្តបញ្ជាក់ថា កិច្ចប្រជុំនេះ មានប្រធានបទ«ការពង្រឹងភាពជាដៃគូដើម្បីសន្តិភាព និងការអភិវឌ្ឍប្រកបដោយចីភាព»។ ប្រធានបទនេះ នឹងផ្តល់កាលានុវន្តភាព ដើម្បីស្វែងរករបៀប និងមធ្យោបាយ ក្នុងការលើកកម្ពស់ភាពជាដៃគូ សម្រាប់ការជំរុញសន្តិភាព សុខដុមភាព ការអភិវឌ្ឍ និងវិបុលភាព នៅទ្វីបអាស៊ី និងអឺរ៉ុប។

ក្នុងឱកាសនៃកិច្ចប្រជុំនេះ លោក ប្រាក់ សុខុន និងលោក Kyaw Tin អនុរដ្ឋមន្ត្រីការបរទេសមីយ៉ាន់ម៉ា នឹងចុះហត្ថលេខាលើអនុស្សារណៈនៃការយោគយល់គ្នា ស្តីពីការប្រឹក្សានយោបាយ រវាងក្រសួងការបរទេសនៃប្រទេសទាំង២។ បន្ថែមពីលោករដ្ឋមន្ត្រី ប្រាក់ សុខុន នឹងជួបពិភាក្សាទ្វេភាគីជាមួយ លោកស្រី អ៊ុងសាន ស៊ូជីទីប្រឹក្សារដ្ឋ និងរដ្ឋមន្ត្រីការបរទេសមីយ៉ាន់ម៉ា, លោក វ៉ាង យី រដ្ឋមន្ត្រីការបរទេសចិន, លោក កាហ្ស៊ុយគី ណាកាណេ អនុរដ្ឋមន្ត្រីការបរទេសជប៉ុន និងប្រមុខគណៈប្រតិភូនៃប្រទេសមួយចំនួនទៀត។

សូមបញ្ជាក់ កម្ពុជាបានចូលជាសមាជិកកិច្ចប្រជុំអាស៊ី-អឺរ៉ុប នៅឆ្នាំ២០០៤ នាកិច្ចប្រជុំកំពូលអាស៊ី-អឺរ៉ុបលើកទី៥នៅក្រុងហាណូយ ប្រទេសវៀតណាម និងធ្លាប់ជាសម្របសម្រួលកិច្ចប្រជុំអាស៊ី-អឺរ៉ុប សម្រាប់អាស៊ាននៅឆ្នាំ២០០៨ និងឆ្នាំ២០១០ ៕