ជាតិ
សេដ្ឋកិច្ច
ផ្លែស្រកានាគខេត្តរតនគិរី ដែលដាំដោយក្រុមហ៊ុនវៀតណាម នឹងនាំទៅចិនសប្ដាហ៍ក្រោយ
× ភ្នំពេញ៖ ក្រុមហ៊ុនវៀតណាម Hoang Anh Gia Lai (HAGL) នឹងនាំចេញជាលើកដំបូង ផ្លែស្រកានាគ ដែលដាំនៅខេត្តរតនគិរី ទៅទីផ្សារចិននៅសប្ដាហ៍ក្រោយ។ កន្លងមក ក្រុមហ៊ុនមួយនេះ ក៏បាននាំចេញផ្លែចេក ទៅប្រទេសចិនផងដែរ។
លោក Thach Quanh Tha នាយករដ្ឋបាលក្រុមហ៊ុន Hoan Anh Group បានឲ្យដឹងថា ស្រកានាគ ជាផ្លែកឈើទី២ហើយ បន្ទាប់ពីផ្លែចេក ដែលក្រុមហ៊ុននឹងនាំផ្លែនេះចំនួន ១០០តោនទៅប្រទេសចិន នៅសប្ដាហ៍ក្រោយ។ លោក Thach Quanh Tha ត្រូវបានដកស្រង់សំដីដោយកាសែតភ្នំពេញប៉ុស្តិ៍ នៅថ្ងៃទី១៧ខែវិច្ឆិកាថា ផ្លែស្រកានាគទាំងនោះនឹងត្រូវនាំទៅចិនតាមប្រទេសវៀតណាម។
បើតាមប្រធានមន្ទីរកសិកម្មខេត្តរតនគិរីលោក សយ សូណា ក្រុមហ៊ុននេះ មានផ្ទៃដីដាំដុះស្រកានាគទំហំ ៣៨០ហិកតា ហើយការនាំចេញលើកដំបូងនេះ បានឆ្លងកាត់ការបញ្ជាក់ពីអនាម័យ និងភូតគាមអនាម័យ (SPS) រួចរាល់ហើយ ដោយមន្ត្រីក្រសួងកសិកម្ម។
កម្ពុជាព្យាយាមជំរុញកានាំចេញផលិតផលកសិកម្ម ឲ្យបានច្រើនមុខទៅទីផ្សារក្រៅប្រទេស តែព្រមជាមួយគ្នានេះបញ្ហាដ៏សំខាន់ គឺប្រព័ន្ធអនាម័យ និងភូតគាមអនាម័យ កំពុងជាការប្រឈមរបស់វិស័យឯកជន៕
© រក្សាសិទ្ធិដោយ thmeythmey.com