ក្នុងនាមជាអ្នកចាត់ការទូទៅថ្មីលោក David Moyes បាននិយាយថាលោកមានការខកចិត្តជាមួយនឹងកីឡាករល្បីៗមួយចំនួនរបស់ West Ham បន្ទាប់ពីរងបរាជ័យ ២-០ នៅទឹកដី Watford ក្នុងការប្រកួតក្របខណ្ឌ Premier League កាលពីថ្ងៃអាទិត្យទី១៩ ខែវិច្ឆិកា។
ក្តីសង្ឃឹមរបស់អ្នកចាត់ការទូទៅសញ្ជាតិស្កុតឡែនដើម្បីទទួលបានជ័យជម្នះក្នុងការដឹកនាំ ដំបូងឲ្យ West Ham និងជាលើកទី ៥០០ ក្នុងនាមជាអ្នកចាត់ការទូទៅមួយរូបនៃក្របខណ្ឌលីកកំពូលអង់គ្លេសនោះ ទទួលបានត្រឹមការខកចិត្តប៉ុណ្ណោះ ក្រោយមានការស៊ុតបញ្ចូលទី២គ្រាប់ពីសំណាក់កីឡាកររបស់ Watford ពីររូបគឺ Will Hughes និង Richarlison។
ក្រោយបរាជ័នេះ អតីតអ្នកចាត់ការ Everton, Manchester United, Sunderland រួបនេះបានសម្តែងការខកចិត្តចំពោះកីឡាករល្បីៗមួយចំនួនរបស់ក្រុមរហស្សនាមញញួរធំ ថាលេងមិនសមនឹងភាពល្បីរបស់ពួកគេឡើយ។
លោក Moyes វ័យ៥៤ឆ្នាំត្រូវបានក្លិប West Ham តែងតាំងជាអ្នកចាត់ការថ្មី ជំនួសលោក Slaven Bilic នៅថ្ងៃទី៧ ខែវិច្ឆិកាកន្លងទៅ។
West Ham បច្ចុប្បន្នឈរនៅលេខរៀងទី១៨ក្នុងតារាង Premier League ស្ថិតនៅតំបន់ត្រូវកាត់ចោល មានតែ៩ពិន្ទុប៉ុណ្ណោះ ក្រោយឆ្លងកាត់ការប្រគួត១២លើក ឈ្នះ២ ចាញ់៧ និងស្មើ៣៕