ជាតិ
នយោបាយជាតិ
អតីតតំណាងរាស្ត្រ CNRP ក៏មិនអាចទទួលប្រាក់បំណាច់នៅពាក់កណ្តាលខែវិច្ឆិកានេះដែរ អតីតតំណាងរាស្ត្រ CNRP មួយចំនួន បានថតរូបរួមគ្នានាទិវាបុណ្យឯករាជ្យជាតិកន្លងមក។ រូបថត ហ្វេសប៊ុក លោក ឡុង រី
× ភ្នំពេញ៖ អតីតតំណាងរាស្ត្រគណបក្សសង្គ្រោះជាតិទាំង៥៥រូប ពុំអាចបើកប្រាក់បំណាច់ ក្នុងខែវិច្ឆិកានេះ បានឡើយ។ លោក ឡេង ប៉េងឡុង អ្នកនាំពាក្យរដ្ឋសភា បញ្ជាក់ថា អ្នកទាំង៥៥រូបនោះ លែងមានឈ្មោះជាតំណាងរាស្ត្រទៀតហើយ ក្រោយគណបក្សខ្លួន ត្រូវតុលាការកំពូល រំលាយចោល កាលពីថ្ងៃទី១៦ ខែវិច្ឆិកា ឆ្នាំ២0១៧ ដូច្នេះ ប្រាក់បំណាច់ ត្រូវកាត់ផ្តាច់ ចាប់ពីពេលនោះ តែម្តង។
លោក ឡេង ប៉េងឡុង បន្តថា សូម្បីតែប្រាក់បំណាច់ ត្រឹមពាក់កណ្តាលខែវិច្ឆិកានេះ ក៏មិនអាចបើកបានដែរ។ មុនគណបក្សសង្គ្រោះជាតិ ត្រូវរំលាយចោល ពួកគាត់ បានធ្វើការ ក្នុងនាមជាតំណាងរាស្ត្រ បានកន្លះខែដែរ ដូច្នេះពួកគាត់ អាចបើកប្រាក់បំណាច់ ដោយគិតត្រឹមតែរយៈពេលកន្លះខែនេះបានទេ? លោក ឡេង ប៉េងឡុង ឆ្លើយយ៉ាងដូច្នេះថា៖«បើកមិនបានទេ។ ធ្វើការអី? មិនដែលចូលធ្វើការផងហ្នឹង ធ្វើតែខាងក្រៅ»។
បើតាមលោក ឡេង ប៉េងឡុង ប្រាក់បំណាច់បច្ចុប្បន្នរបស់តំណាងរាស្ត្រ គឺប្រមាណជា១៥លានរៀល ក្នុង១ខែ។ ជុំវិញបញ្ហានេះ សារព័ត៌មានថ្មីៗ មិនអាចសុំការបកស្រាយ ពីអតីតអ្នកនាំពាក្យនៃគណបក្សសង្គ្រោះជាតិបានទេ ដោយសារតែមិនលើកទូរសព្ទ។
មិនត្រឹមតែតំណាងរាស្ត្រនោះទេ សូម្បីតែសមាជិកក្រុមប្រឹក្សាឃុំ-សង្កាត់ទាំងអស់ពីគណបក្សសង្គ្រោះជាតិ ក៏មិនអាចបើកប្រាក់ខែបានដែរ ដោយគិតចាប់ពីថ្ងៃទី១៦ ខែវិច្ឆិកា ឆ្នាំ២0១៧ តទៅ។ ថ្មីៗនេះ ក្រសួងមហាផ្ទៃ បានស្នើឲ្យរតនាគារជាតិ បង្កកប្រាក់ខែរបស់សមាជិកក្រុមប្រឹក្សាឃុំ-សង្កាត់នៃគណបក្សសង្គ្រោះជាតិ ដោយសំអាងថា គណបក្សនេះ ត្រូវបានរំលាយចោលហើយ៕
© រក្សាសិទ្ធិដោយ thmeythmey.com