ជាតិ
សេដ្ឋកិច្ច
ពន្ធដារ ដាក់ឲ្យដំណើរការ E-Payment ចាប់ពីពេលនេះ និង E-Filing នៅឆ្នាំក្រោយ
× ភ្នំពេញ៖ អគ្គនាយកដ្ឋានពន្ធដារ បានប្រកាសដាក់ឲ្យដំណើរការទូទាត់ប្រាក់ពន្ធតាមអនឡាញ (E-Payment) ចាប់ពីពេលនេះតទៅ។ ហើយស្ថាប័ននេះ គ្រោងដាក់ឲ្យអនុវត្តការបំពេញលិខិតប្រកាសបង់ពន្ធតាមអនឡាញ (E-Filing) នៅដើមឆ្នាំ២០១៨ ខាងមុខ។
E-Payment ដែលអនុញ្ញាតឲ្យអ្នកជាប់ពន្ធទូទាត់ប្រាក់ពន្ធតាមអនឡាញលើគណនីធនាគាររបស់ខ្លួន ជាកំណែទម្រង់ថ្មីមួយរបស់អគ្គនាយកដ្ឋានពន្ធដារ។ លោក គង់ វិបុល អគ្គនាយកដ្ឋានពន្ធដារ បានថ្លែងដូច្នេះថា៖«សម្រាប់អ្នកជាប់ពន្ធពេលនេះ លោកអ្នកមានជម្រើសច្រើនក្នុងការទូទាត់សាច់ប្រាក់ពន្ធ គឺអាចបង់តាមបញ្ជរបង់ប្រាក់នៅធនាគារក៏បាន ឬនៅសាខាពន្ធដារ ឬទូទាត់តាមអនឡាញក៏បាន»។
ថ្លែងនៅក្នុងសិក្ខាសាលាស្ដីពីកាតព្វកិច្ចពន្ធលើប្រាក់ចំណូលប្រចាំឆ្នាំ និងការកែទម្រង់ប្រព័ន្ធរដ្ឋបាលសារពើពន្ធ នៅថ្ងៃទី២០ខែវិច្ឆិកា លោក គង់ វិបុល បានបញ្ជាក់យ៉ាងដូច្នេះថា៖«វាជាផ្នែកមួយនៃការធ្វើកំណែទម្រង់ប្រមូលពន្ធរបស់យើង តាមរយៈការបង្កើតប្រព័ន្ធបង់ពន្ធដែលងាយស្រួលជាងមុន»។
បន្ទាប់ពីការដំណើរការទូទាត់អេឡិចត្រូនិក លោក គង់ វិបុល មានប្រសាសន៍ថា អគ្គនាយដ្ឋានពន្ធដារ នឹងដាក់ឲ្យប្រតិបត្តិការ E-Filing មួយទៀតនៅដើមឆ្នាំក្រោយ ដែលអនុញ្ញាតឲ្យអ្នកជាប់ពន្ធបំពេញព័ត៌មានកាតព្វកិច្ចពន្ធ និងដាក់ទម្រង់បែបបទបង់ពន្ធតាមអនឡាញ៕
© រក្សាសិទ្ធិដោយ thmeythmey.com