អន្តរជាតិ
ចិន-រុស្ស៊ី ថ្កោលទោសការបាញ់មីស៊ីល និងបដិសេធទទួលស្គាល់កូរ៉េខាងជើងជាមហាអំណាចនុយក្លេអ៊ែរ
× ក្រុងប៉េកាំង និងក្រុងម៉ូស្គូបានអំពាវនាវឲ្យបណ្តាភាគីពាក់ព័ន្ធក្នុងបញ្ហានុយក្លេអ៊ែរកូរ៉េខាងជើងបន្តអត់ធ្មត់ និងចៀសវាងឲ្យបានរាល់ការបង្កបញ្ហាដែលធ្វើឲ្យមានការប្រឈមមុខគ្នាខ្លាំង។ ភាគីទាំងពីរក៏បានទទូចឲ្យមានការអនុវត្តដំណោះស្រាយក្រុមប្រឹក្សាសន្តិសុខឲ្យបានពេញលេញដើម្បីដាក់សម្ពាធលើកូរ៉េខាងជើងឲ្យបោះបង់អាវុធនុយក្លេអ៊ែរផងដែរ។
ក្រោយកូរ៉េខាងជើងបាញ់សាកល្បងកាំជ្រួចមីស៊ីលជាថ្មីទៀត និងអួតថាខ្លួនជារដ្ឋនុយក្លេអ៊ែរ បណ្តាប្រទេសមហាអំណាចមានចិន និងរុស្ស៊ីបានចេញមុខទទូចឲ្យមានការអនុវត្តវិធានការដាក់សម្ពាធលើកូរ៉េខាងជើង និងមានការអត់ធ្មត់ដើម្បីបញ្ចៀសការប្រឈមមុខគ្នាខ្លាំង។
ថ្ងៃព្រហស្បតិ៍ទី ៣០ ខែវិច្ឆិកានេះ ក្នុងក្រុមប្រឹក្សាសន្តិសុខអង្គការសហប្រជាជាតិតំណាងក្រុងប៉េកាំងនៅអង្គការសហប្រជាជាតិបានបង្ហាញក្តីបារម្ភខ្លាំងចំពោះស្ថានការនៅឧបទ្វីបកូរ៉េ ហើយអំពាវនាវឲ្យមានការបន្តអនុវត្តដំណោះស្រាយក្រុមប្រឹក្សាសន្តិសុខអង្គការសហប្រជាជាតិ និងចាប់ផ្តើមចរចាគ្នាឡើងវិញដែរ។
ទីភ្នាក់ងារព័ត៌មាន Xinhua ស្រង់សម្តីលោក Wu Haitao ភារធារីនៃបេសកកម្មការទូតអចិន្ត្រៃយ៍របស់ប្រទេសចិនប្រចាំអង្គការសហប្រជាជាតិដូច្នេះ៖« ស្ថានការនៅឧបទ្វីបកូរ៉េនៅតែគួរឲ្យបារម្ភខ្លាំង។ រឿងអាទិភាពឥឡូវនេះសម្រាប់រាល់ភាគីគឺរក្សាការអត់ធ្មត់ និងបន្តការអនុវត្តដំណោះស្រាយនានាដែលពាក់ព័ន្ធរបស់ក្រុមប្រឹក្សាសន្តិសុខឲ្យបានពេញលេញដែលវាធានាបាននូវការចាប់ផ្តើមសន្ទនាគ្នាឡើងវិញ»។
ក្រៅពីនេះតំណាងក្រុងប៉េកាំងខាងលើបានបង្ហាញជំហរជាក់លាក់មួយប្រឆាំងនឹងការបាញ់សាកល្បងមីស៊ីលរបស់កូរ៉េខាងជើងជាថ្មីទៀតកាលពីថ្ងៃពុធម្សិលមិញ និងស្នើឲ្យកូរ៉េខាងជើងគោរពច្បាប់អន្តរជាតិ និងឈប់បង្ករឿង។
ដោយឡែ បេសកជនពិសេសរបស់រុស្ស៊ីប្រចាំអង្គការសហប្រជាជាតិក៏បានទទូចឲ្យភាគីនានាអត់ធ្មត់និងចៀសវាងរាល់សកម្មភាពទាំងឡាយណាដែលអាចធ្វើឲ្យបញ្ហាធ្ងន់ធ្ងរកើតឡើងផងដែរ។
«វាជារឿងពិសេសដែលត្រូវដើរថយក្រោយ និងប៉ាន់ស្មានដោយប្រុងប្រយ័ត្នចំពោះរាល់សកម្មភាពទាំងអស់។ ក្រៅពីនេះគេក៏ចាំបាច់ត្រូវកែតម្រូវរាល់គោលនយោបាយគំរាមកំហែង និងសម្លុតគ្នាទៅវិញទៅមកព្រោះវានាំមកតែផលអាក្រក់ និង សម្រេចបានតែអ្វីដែលផ្ទុយពីការចាប់បានរបស់យើងប៉ុណ្ណោះ»។ នេះជាការបញ្ជាក់របស់ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិលោក Vassily Nebenzia ទៅកាន់ក្រុមប្រឹក្សាសន្តិសុខអង្គការសហប្រជាជាតិ។
ក្រៅពីទទូចទៅភាគីពាក់ព័ន្ធ តំណាងក្រុងម៉ូស្គូខាងលើក៏បានថ្កោលទោសការបន្តបាញ់សាកល្បងមីស៊ីលរបស់ក្រុងព្យុងយ៉ាងដែលមិនញរញើតច្បាប់អន្តរជាតិបន្តិចសោះនោះ។ រុស្ស៊ីថា ការបាញ់សាកល្បងមីស៊ីលជាថ្មីនេះធ្វើឲ្យខ្លួនខកចិត្តខ្លាំង និងជាសកម្មភាពដែលធ្វើឲ្យប៉ះពាល់ខ្លាំងដល់ច្បាប់អន្តរជាតិ និងសនិ្តសុខ ស្ថិរភាពតំបន់ផង។ អ្វីដែលសំខាន់នោះ រុស្ស៊ីបានបញ្ជាក់ជាមុនថា ខ្លួននឹងមិនទទួលស្គាល់កូរ៉េខាងជើងជាមហាអំណាចនុយក្លេអ៊ែរជាដាច់ខាត៕
Tag:
ចិន
រុស្ស៊ី
កូរ៉េខាងជើង
Wu Haitao
Vassily Nebenzia
© រក្សាសិទ្ធិដោយ thmeythmey.com