ជាតិ
សេដ្ឋកិច្ច
GIZ កំពុងជំរុញ«ធានារ៉ាប់រងកសិកម្ម»នៅកម្ពុជា
× ភ្នំពេញ៖ វិស័យធានារ៉ាប់រងកសិកម្ម ជាដំណើរការវិវឌ្ឍក្មេងខ្ចីនៅឡើយនៅកម្ពុជា។ អង្គការ និងក្រុមហ៊ុនធានារ៉ាប់រងខ្លះ បានអនុវត្តការលក់ធានារ៉ាប់រងជូនកសិករ តែមានចំនួនតិចតួចប៉ុណ្ណោះ។ យ៉ាងណាមិញ វិស័យនេះទទួលបានការចាប់អារម្មណ៍ពីអង្គការអាល្លឺម៉ង់ GIZ ដែលកំពុងជំរុញលើផ្នែកនេះ។
នៅថ្ងៃទី៣០ខែវិច្ឆិកា GIZ បានរៀបចំសិក្ខាសាលាមួយស្ដីពីវិស័យធានារ៉ាប់រងនៅកម្ពុជា ដើម្បីឈានទៅដល់ដំណើរលក់ធានារ៉ាប់រងកសិកម្មមួយផ្សេងទៀត ដោយទទួលការគាំទ្រពីអង្គការមួយនេះ។
GIZ បានដាក់ឲ្យអនុវត្តគម្រោងធានារ៉ាប់រងកសិកម្មរបស់ខ្លួន ដែលអនុវត្តពីខែកក្កដាឆ្នាំ២០១៧ ដល់ខែធ្នូឆ្នាំ២០១៩ ប៉ុន្តែមកដល់ពេលនេះមិនទាន់មានសកម្មភាពដែលកសិករទិញធានារ៉ាប់រង ដែលកើកចេញពីគម្រោងនេះនៅឡើយទេ។ នេះបើតាមលោកស្រី Anja Erlbeck មន្ត្រីគម្រោងរបស់ GIZ ។ លោកស្រីបន្ថែមថា មុនដាក់អនុវត្តគម្រោងនេះ GIZ បានធ្វើសកម្មភាពផ្សេងៗទាក់ទងនឹងគម្រោងនេះតាំងពីឆ្នាំ២០១២ មកម្លេះ។
មន្ត្រីគម្រោងរបស់ GIZ មួយរូបទៀត គឺលោក Claudius Bredehoeft បានឲ្យដឹងថា នៅក្នុងសិក្ខាសាលានេះនឹងមានការជជែកគ្នារវាងអ្នកពាក់ព័ន្ធ ដែលរួមមានតំណាងពីស្ថាប័នរដ្ឋ ក្រុមហ៊ុនធានារ៉ាប់រង និងតំណាងសហគមន៍កសិករ ដើម្បីឈានទៅដល់ការអនុវត្តគម្រោងជាក់ស្ដែង ដែលមានការជ្រើសរើសក្រុមហ៊ុនធានារ៉ាប់រង និងទំហំចំនួនគ្រួសារក្នុងគម្រោងនេះ ជាដើម។ លោកប្រាប់ថា គម្រោងប្រភេទនេះរបស់ GIZ កំពុងធ្វើនៅប្រទេសជាច្រើនក្នុងតំបន់ គឺមិនមែនតែនៅកម្ពុជានោះទេ។
ធានារ៉ាប់រងកសិកម្ម ដូចគ្នានឹងធានារ៉ាប់រងផ្សេងទៀត គឺជាប្រតិបត្តិការដែល កសិករទិញបណ្ណធានារ៉ាប់រងពីក្រុមហ៊ុនធានារ៉ាប់រងណាមួយ ដើម្បីទទួលបានការធានាសំណងលើការខូចខាតដំណាំជាយថាហេតុ ដូចជាបណ្ដាលពីគ្រោះរាំងស្ងួត ទឹកជំនន់ ជាដើម។
កន្លងមក អង្គការសេដាក បានអនុវត្តកម្មវិធីធានារ៉ាប់រងលើដំណាំស្រូវ ដែលអនុវត្តពីឆ្នាំ២០១៤ និងបានបញ្ចប់ឆ្នាំ២០១៦ ។ លោក សម វិទូ ប្រធានអង្គការនេះ បានថ្លែងថា តាមរយៈកម្មវិធីនេះ បណ្ណធានារ៉ាប់រង ត្រូវបានលក់ដល់កសិករប្រមាណ ១៥០នាក់ ដោយបណ្ណដែលមានតម្លៃខ្ពស់បំផុតគឺ ២៥ដុល្លារក្នុងមួយហិកតា។ លោកថា ការទូទាត់ប្រាក់សំណងកន្លងមក គឺកសិកបានចំណេញពីកម្មវិធីនេះ ដោយសារពីរឆ្នាំនៃកម្មវិធីនេះកម្ពុជាជួបទឹកជំនន់នៅខេត្តមួយចំនួន និងគ្រោះរាំងស្ងួត។
លោក សម វិទូ លើកឡើងថា រដ្ឋាភិបាលគួរជំរុញវិស័យធានារ៉ាប់រងកសិកម្មឲ្យមានវិសាលភាពធំជាងនេះ។ លោកថ្លែងដូច្នេះថា៖«ការអនុវត្តកន្លងមកគឺដោយឡែកៗពីគ្នា យើងចង់ឃើញគម្រោងថ្នាក់ជាតិមួយ ដែលផ្តួចផ្ដើមដោយរដ្ឋាភិបាល ហើយយើងធ្វើការទៅតាមតួនាទីរៀងៗខ្លួន គឺថាល្អ»។
ក្រៅពីអង្គការសេដាក ក្រុមហ៊ុន Forte កំពុងប្រឡូកក្នុងវិស័យនេះផងដែរ។ លោក នី លីហួង អ្នកគ្រប់គ្រងទូទៅក្រុមហ៊ុន Forte Micro Insurance មានប្រសាសន៍ថា ក្រុមហ៊ុនលោកចាប់ផ្ដើមលក់បណ្ណធានារ៉ាប់រងកសិកម្មផ្នែកដំណាំស្រូវចាប់ពីឆ្នាំ២០១៥ ដែលមកដល់បច្ចុប្បន្នមានអ្នកទិញចំនួន ១៥០ ទៅ១៦០គ្រួសារ។ លោកថា ក្រុមហ៊ុនមិនទាន់លក់ធានារ៉ាប់រងប្រភេទនេះនៅទូទាំងប្រទេសនៅឡើយទេ ដោយកំពុងអនុវត្តនៅក្នុងខេត្តបាត់ដំបង និងពោធិសាត់។
ការជំរុញវិស័យនេះ ត្រូវការមានការចូលរួមពីអ្នកពាក់ព័ន្ធ។ លោក នី លីហួង និយាយដូចនេះថា៖«យើង (លក់បាន) តិចតួចមែនទែន បើធៀបនឹងកសិករទូទាំងប្រទេស។ តែយ៉ាងណា យើងចង់ធ្វើឲ្យចេញជារូបរាង។ យកធានារ៉ាប់រង ទៅជជែកជាមួយកសិករ គឺជារឿងពិបាក ដែលត្រូវការអប់រំច្រើន និងការចូលរួមរបស់ភាគីពាក់ព័ន្ធទាំងអស់»៕
Tag:
GIZ
ធានារ៉ាប់រងកសិកម្ម
© រក្សាសិទ្ធិដោយ thmeythmey.com