កម្ពុជា-ថៃ សម្តែងសិល្បៈរួមគ្នា ដើម្បីស្វែងយល់វប្បធម៌គ្នាទៅវិញទៅមក

ជាតិ

សិល្បះ

កម្ពុជា-ថៃ សម្តែងសិល្បៈរួមគ្នា ដើម្បីស្វែងយល់វប្បធម៌គ្នាទៅវិញទៅមក

05, Dec 2017 , 11:36 am

រូបភាព

ដោយ: ប៉ូ សាគុន

កម្ពុជា និងថៃ បានរៀបចំការសម្តែងសិល្បៈប្រពៃណី និងសហសម័យរួមគ្នា ដើម្បីស្វែងយល់ពីវប្បធម៌គ្នាទៅវិញទៅមក។ ការសម្តែងនេះ ជាលទ្ធផលនៃការសហប្រតិបត្តិការរវាងសាកលវិទ្យាល័យ ភូមិន្ទវិចិត្រសិល្បៈរបស់កម្ពុជា និងវិទ្យាស្ថាន Bunditpatanasila នៃប្រទេសថៃ។

ការសម្តែងសិល្បៈប្រពៃណី និងសហសម័យរួមគ្នារវាងសិល្បករកម្ពុជា និងថៃ នេះ បានប្រព្រឹត្តទៅ នារាត្រីថ្ងៃទី៤ ខែធ្នូ នៅសាលមហោស្រពចតុមុខ។ ជាការសម្តែងរួមគ្នា ដើម្បីស្វែងយល់ពីវប្បធម៌រវាងប្រទេសទាំង២ ដោយកម្ពុជា បានលើកយកទម្រង់សិល្បៈរបាំប្រពៃណីចម្រៀងរបស់ខ្លួនចំនួន៣បទ ឯភាគីថៃក៏បានសម្ដែងសិល្បៈរបាំប្រពៃណីថៃ៣បទដូចគ្នា និងការសម្ដែងរួមគ្នារវាងសិល្បករកម្ពុជា-ថៃ ចំនួន៤បទ។

លោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានថ្លែងក្នុងឱកាសនោះថា ការសម្ដែងសិល្បៈនេះ គឺជាលទ្ធផលនៃការខិតខំប្រឹងប្រែង រវាងសាកលវិទ្យាល័យ ភូមិន្ទវិចិត្រសិល្បៈ និងវិទ្យាស្ថាន Bunditpatanasila។ ការសម្ដែងនេះ គឺជាការផ្លាស់ប្ដូរបទពិសោធន៍ វិធីសាស្ត្រ និងការអនុវត្តការសម្ដែងរវាងសាលាទាំង២។ លោកស្រី ភឿង សកុណា បញ្ជាក់ដូច្នេះថា៖«ប្រទេសទាំង២ មានវប្បធម៌ស្រដៀងគ្នា ដូច្នេះវាអាចធ្វើឱ្យមានទំនាក់ទំនងកាន់តែល្អប្រសើរថែមទៀត សម្រាប់ការសិក្សាស្វែងយល់ពីវប្បធម៌គ្នាទៅវិញទៅមក ពិសេសសម្រាប់យុវជន»។

លោក Vira Rojpojchanarat រដ្ឋមន្ត្រីក្រសួងវប្បធម៌ថៃ ដែលបានចូលរួមក្នុងកម្មវិធីនេះ បានឲ្យដឹងថា នេះជាការសម្ដែងលើកទី១ សម្រាប់កិច្ចសហប្រតិបត្តិការរវាងសាកលវិទ្យាល័យភូមិន្ទវិចិត្រសិល្បៈ និងវិទ្យាស្ថាន Bunditpatanasila។ រដ្ឋមន្ត្រីក្រសួងវប្បធម៌ថៃរូបនេះ បញ្ជាក់ទៀតថា នឹងមានការសម្ដែងផ្សេងៗទៀតរវាងប្រទេសទាំងពីរនៅពេបន្តបន្ទាប់ទៀត ដោយការសម្ដែងត្រូវធ្វើឡើងម្តងម្នាក់ ម្តងនៅកម្ពុជា និងម្តងនៅថៃ៕