រថយន្ត
សិង្ហបុរីដំណើរការ App សម្រាប់អ្នកចង់ជួលរថយន្តអគ្គិសនីបើកដោយខ្លួនឯង
× ក្រោមគំនិតផ្តួចផ្តើមរបស់អាជ្ញាធរដឹកជញ្ជូនផ្លូវគោកសិង្ហបុរី (LTA) និងក្រុមហ៊ុនដឹកជញ្ជូនបារាំង BlueSG សេវាជួលរថយន្តអគ្គសនីដើម្បីបើកកម្សាន្តក្នុងតម្លៃ៤ដុល្លារអាមេរិករៀងរាល់១៥នាទី ឬ០.២៤ដុល្លារអាមេរិកក្នុង១នាទី។ នេះបើយោងតាមការផ្សាយរបស់សារព័ត៌មានបច្ចេកវិទ្យា e27.co របស់សិង្ហបុរី។
ចាប់ដំណើរការពីថ្ងៃទី១២ ខែធ្នូ តទៅ អ្នកបើកបររថយន្តនៅសិង្ហបុរី ដែលចង់ផ្លាស់ប្តូរបរិយាកាសទៅបើករថយន្តអគ្គិសនី អាចទាញយកកម្មវិធី App របស់ក្រុមហ៊ុន BlueSG ដើម្បីជួលរថយន្ត Bluecars បើកដោយខ្លួនឯងផ្ទាល់។
ចំពោះដំណើរការដំបូងនៃសេវាកម្មនេះ អាជ្ញាធរ LTA និង BlueSG រៀបចំបន្ថែមនូវស្ថានីយ៍បញ្ចូលអគ្គសនីចំនួន៣០កន្លែងបន្ថែមទៀតដែលឡើងសរុបដល់ទៅ១២០កន្លែង រួមទាំងរថយន្ត Bluecars ៨០គ្រឿង។
ក្រុមហ៊ុន BlueSG ដែលជាបុត្រសម្ព័ន្ធក្រុមហ៊ុនដឹកជញ្ជូនដ៏ធំរបស់បារាំង Bollore Group រំពឹងថា ការដាក់សេវេកម្មជួលរថយន្តអគ្គិសនីដើម្បីបើកបរនេះ អាចទទួលបានជោគជ័យដូចនៅបណ្តាក្រុងធំៗមួយចំនួនដូចជា ប៉ារីស ឡូសអេនជឺឡែស តូរីណូ និងឡុងដ៍។
ទាក់ទងនឹងតម្លៃសេវាកម្ម អ្នកបើកបរត្រូវចំណាយប្រាក់យ៉ាងហោចណាស់៥ដុល្លារសិង្ហបុរី (៤ដុល្លារអាមេរិក) រៀងរាល់១៥នាទីម្តង ឬ០.២៤ដុល្លារអាមេរិកក្នុង១នាទី។ អាជ្ញាធរសិង្ហបុរី និងក្រុមហ៊ុនឯកជន ក៏រៀបចំឲ្យមានការចុះឈ្មោះចូលជាសមាជិក ដើម្បីទទួលបានតម្លៃសេវាកម្មថោកជាងនេះផងដែរ។ អ្នកដែលអាចប្រើប្រាស់សេវានេះបានត្រូវបានអាយុលើសពី២១ឆ្នាំ និងមានបណ្ណបើកបរត្រឹមត្រូវ។
នៅត្រឹមឆ្នាំ២០២០ ក្រុមហ៊ុន BlueSG គ្រោងដាក់ដំណើរការរថយន្តអគ្គិសនីឲ្យ១០០០គ្រឿង និងតំឡើងទីតាំងបញ្ចូលអគ្គិសនីឲ្យបាន២០០០កន្លែង។ នៅឆ្នាំ២០២១ ពួកគេរំពឹងថា នឹងបង្កើតការងារជំនាញ២៥០បន្ថែមទៀតនៅទូទាំងសិង្ហបុរី៕
© រក្សាសិទ្ធិដោយ thmeythmey.com