ជាតិ
សេដ្ឋកិច្ច
កម្ពុជា-ថៃ គ្រោងបង្កើតច្រកទ្វារអន្តរជាតិចំនួន៤បន្ថែមទៀត រូបភាពពីហ្វេសប៊ុកក្រសួងទេសចរណ៍
× រដ្ឋាភិបាលកម្ពុជា-ថៃ បានឯកភាពគ្នា គ្រោងបង្កើតច្រកទ្វារអន្តជាតិចំនួន៤ ទៀត ដើម្បីសម្រួលការធ្វើដំណើរ ការដឹកជញ្ជូនទំនិញ និងដឹកជញ្ជូនភ្ញៀវទេសចរ ពិសេសឆ្លើយតបនឹងកំណើនទេសចរ។ ច្រកទ្វាអន្តរជាតិទាំង៤នោះ គឺច្រក អានសេះ នៅខេត្តព្រះវិហារ ច្រកទ្វារភ្នំជី នៅខេត្តបាត់ដំបង ច្រកទ្វារថ្មដា ក្នុងខេត្តពោធិ៍សាត់ និងច្រកទ្វារជប់គគី ស្ថិតនៅខេត្តឧត្តរមានជ័យ។
រាជរដ្ឋាភិបាល កម្ពុជា-ថៃ គ្រោងបង្កើត ច្រកទ្វារអន្តរជាតិចំនួន៤ បន្ថែមទៀត គឺច្រកទ្វាអន្តរជាតិអានសេះ ច្រកទ្វារភ្នំជី ច្រកទ្វារថ្មដា និងច្រកទ្វារជប់គគី។ នេះបើតាមលោក ថោង ខុន រដ្ឋមន្ត្រីក្រសួងទេសចរណ៍ ដែលថ្លែងនៅក្នុងកិច្ចប្រជុំលើកទី៤ នៃគណៈកម្មការអន្តរក្រសួង ដើម្បីសម្រួលការធ្វើដំណើរ និងការដឹកជញ្ជូនភ្ញៀវទេសចរ និងអ្នកដំណើរទៅតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេស (គ.អ.ប.ទ) កាលពីថ្ងៃទី១១ ខែធ្នូ។
ជាប្រធាន គ.អ.ប.ទផង លោកថោង បានឲ្យដឹងទៀតថា គម្រោងបង្កើតច្រកទ្រារអន្តរជាតិបន្ថែមនេះ គឺ ដើម្បីសម្រួលការធ្វើដំណើរ ការដឹកជញ្ជូនទំនិញ និងដឹកជញ្ជូនភ្ញៀវទេសចរ ពិសេសដើម្បីឆ្លើយតបទៅនឹងកំណើនទេសចរ ដែលកំពុងកើនឡើងជាលំដាប់។
បច្ចុប្បន្នកម្ពុជា មានច្រកទ្វារព្រំដែនអន្តរជាតិ និងច្រកអន្តរជាតិ សរុបចំនួន២៤ ក្នុងនោះច្រកទ្វារអាកាសយានដ្ឋានអន្តរជាតិចំនួន៣ ច្រកទ្វារកំពង់ផែអន្តរជាតិ៤ និងច្រកទ្វារអន្តរជាតិចំនួន១៧ (កម្ពុជា-ថៃមាន៦, កម្ពុជា-វៀតណាម១០ ,កម្ពុជា-ឡាវ១)។
យោងតាមទិន្នន័យឆ្នាំ២០១៦ របស់អង្គការទេសចរណ៍ពិភពលោក មានអ្នកដំណើរប្រមាណ ១,២៣៥ លាននាក់ បានធ្វើដំណើរឆ្លងកាត់ព្រំដែនអន្តរជាតិ។ នេះបើតាមការបញ្ជាក់របស់លោក ថោង ខុន ដែលបន្តដោយមានសុទិដ្ឋិនិយមថា ចំនួននេះ នឹងកើនដល់ ១,៨០០លាននាក់ នៅមុនឆ្នាំ២០៣០។
ដោយឡែកកាលពីឆ្នាំ២០១៦ ភ្ញៀវទេសចរអន្តរជាតិមកកម្ពុជា មានប្រមាណ៥លាននាក់ កើនឡើង៥ភាគរយ ដែលផ្តល់ចំណូលដល់កម្ពុជាបានប្រមាណ ៣,៤០០ដុល្លារ និងបង្កើតការងារ ដោយផ្ទាល់ដល់ពលរដ្ឋខ្មែរ ប្រមាណ៦២ម៉ឺននាក់។ នេះបើតាមលោករដ្ឋមន្ត្រីក្រសួងទេសចរណ៍កម្ពុជា ដែលបញ្ជាក់ទៀតថា ក្នុងរយៈពេល១០ខែ ឆ្នាំ២០១៧នេះ កម្ពុជាទទួលបានទេសចរអន្តរជាតិ ប្រមាណ៤.៣លាននាក់ កើនឡើង ១០,៤ភាគរយ ធៀបនឹងរយៈពេលដូចគ្នាកាលពី ឆ្នាំ២០១៦។
កន្លងមក កម្ពុជាធ្លាប់ព្យាករណ៍ថា នៅឆ្នាំ២០១៧នេះ ខ្លួននឹងទទួលបានទេសចរអន្តរជាតិប្រមាណ ៥.៦លាននាក់ និងប្រមាណ៧លាននាក់ នៅឆ្នាំ២០២០ ដែលអាចនាំចំណូលប្រមាណ ៥ពាន់លានដុល្លារដល់កម្ពុជា និងបង្កើតការងារដល់ប្រជាពលរដ្ឋខ្មែរប្រមាណ ១លាននាក់៕
Tag:
ច្រកព្រំដែន
ទេសចរណ៍
ថោង ខុន
© រក្សាសិទ្ធិដោយ thmeythmey.com