ជាតិ
កម្ពុជា បន្តទទួលរងអាកាសធាតុត្រជាក់ពីថ្ងៃទី១៩ ដល់ថ្ងៃទី២២
× អាកាសធាតុនៅកម្ពុជា នឹងបន្តត្រជាក់ជាថ្មីទៀត ពីថ្ងៃទី១៩ ដល់ថ្ងៃទី២២ ខែធ្នូ។ បើតាមក្រសួងធនធានទឹក ខេត្តឧត្ដរមានជ័យ ព្រះវិហារ ស្ទឹងត្រែង រតនគិរី មណ្ឌលគិរី និងខេត្តប៉ៃលិន នឹងមានសីតុណ្ហភាពអប្បបរមា១៦-១៧អង្សា។ រីឯខេត្តបន្ទាយមានជ័យ បាត់ដំបង់ សៀមរាប ពោធិ៍សាត់ និងខេត្តកំពង់ធំ មានសីតុណ្ហភាពអប្បបរមាពី ១៨ ទៅ១៩ អង្សាខណៈ បណ្ដាខេត្តដទៃ នឹងមានសីតុណ្ហភាពអប្បបរមាពី ២០-២២អង្សា។
បើតាមការព្យាករអាកាសធាតុស្ដីពីការចុះត្រជាក់លើកទី២ របស់ក្រសួងធនធានទឹក និងឧតុនិយម សម្ពាធខ្ពស់ពីប្រទេសចិន នឹងរំកិលមកគ្រប់ដណ្ដប់លើជ្រោយឥណ្ឌូចិន ចាប់ពីថ្ងៃទី១៩ ដល់ថ្ងៃទី២២ខែធ្នូ។ ហើយក្នុងពេលជាមួយគ្នានេះ ខ្យល់មូសុងឦសានខ្លាំង ក៏បង្កើនឥទ្ធិពលមកលើកម្ពុជា។
លក្ខណៈបែបនេះ នឹងធ្វើឲ្យសីតុណ្ហភាពអប្បបរមានៅកម្ពុជាថយចុះខ្លាំង រីឯល្បឿនខ្យល់ជំនោរបក់មកពីទិសខាងជើង ក៏មានឥទ្ធិពលខ្លាំង។ ដូចនេះ ចាប់ពីថ្ងៃទី១៩ ដល់ថ្ងៃទី២២ ខែធ្នូ ខេត្តឧត្ដរមានជ័យ ព្រះវិហារ ស្ទឹងត្រែង រតនគិរី មណ្ឌលគិរី និងខេត្តប៉ៃលិន សីតុណ្ហភាពអប្បបរមា គឺពី១៦ ទៅ១៧ អង្សាសេ។
រីឯ ខេត្តបន្ទាយមានជ័យ បាត់ដំបង់ សៀមរាប ពោធិ៍សាត់ និងខេត្តកំពង់ធំ ចាប់ពីថ្ងៃទី២០ ដល់ថ្ងៃទី២២ សីតុណ្ហភាពអប្បបរមាមានពី ១៨ ទៅ១៩ អង្សាសេ។
ចំពោះបណ្ដាខេត្តដទៃទៀត ចាប់ពីថ្ងៃទី២០ ដល់ថ្ងៃទី២៣ សីតុណ្ហភាពអប្បបរមា មានពី ២០ទៅ២២ អង្សាសេ៕
Tag:
អាកាសធាតុ
ត្រជាក់
© រក្សាសិទ្ធិដោយ thmeythmey.com