អង្គការសិទ្ធិមនុស្ស ទទូចឲ្យសិង្ហបុរី កែតម្រូវច្បាប់រឹតត្បិតសិទ្ធិសេរីបញ្ចេញមតិនិងប្រមូលផ្តុំ

អន្តរជាតិ

អង្គការសិទ្ធិមនុស្ស ទទូចឲ្យសិង្ហបុរី កែតម្រូវច្បាប់រឹតត្បិតសិទ្ធិសេរីបញ្ចេញមតិនិងប្រមូលផ្តុំ

13, Dec 2017 , 10:39 pm

រូបភាព

ដោយ:

សិង្ហបុរី ត្រូវបានគេស្គាល់ថា ជាប្រទេស ដែលមានការអភិវឌ្ឍ និងជឿនលឿនជាងគេទាំងក្នុងក្របខណ្ឌតំបន់ និងពិភពលោក ។ ប៉ុន្តែ បើតាមរបាយការណ៍របស់អង្គការឃ្លាំមើលសិទ្ធិមនុស្ស (Human Right Watch) ប្រទេសជឿនលឿនមួយនេះ មិនទាន់មានការបើកទូលាយលើវិស័យសិទ្ធិមនុស្សទាំងអស់នៅឡើយទេ ។

អង្គការឃ្លាំមើលសិទ្ធិមនុស្ស នៅថ្ងៃ១៣ ធ្នូ បានចេញរបាយការណ៍មួយ ដោយអះអាងថា រដ្ឋាភិបាលសិង្ហបុរី បានប្រើប្រាស់ច្បាប់ព្រហ្មទណ្ឌ និងបទបញ្ជាមានការរឹតត្បិតខ្លាំង ដែលប៉ះពាល់ និងបន្ទាបតម្លៃសិទ្ធិសេរីភាពនៃការបញ្ចេញមតិ និងការប្រមូលផ្តុំរបស់ប្រជាជន ពាក់ព័ន្ធនឹងកិច្ចការនយោបាយ និងការដឹកនាំរបស់រដ្ឋាភិបាលតែម្តង ។ នេះបើយោងតាមការចុះផ្សាយក្នុងគេហទំព័រផ្លូវការរបស់ Human Right Watch ។

របាយការណ៍ កម្រាស់ ១៣៣ទំព័រ របស់អង្គការវិស័យសិទ្ធិមនុស្សដដែលនោះ ក៏បានលើកឡើងថា បុគ្គលទាំងឡាយណា ដែលរិះគន់រដ្ឋាភិបាល ឬវិស័យតុលាការ ឬនិយាយពីបញ្ហារសើបពាក់ព័ន្ធនឹងសាសនា និងបញ្ហាជាតិសាសន៍ ជានិច្ចកាលប្រឈមនឹងការស៊ើបអង្កេតព្រហ្មទណ្ឌ ឬរងនូវបណ្តឹងស៊ីវិលជាដើម ។

ជាងនេះទៅទៀតនោះ របាយការណ៍ ដែលក្រុមអ្នកឃ្លាំមើល អះអាងថា ធ្វើឡើងដោយផ្អែកលើការវិភាគស៊ីជម្រៅលើច្បាប់ពាក់ព័ន្ធរបស់សិង្ហបុរីស្តីពីសិទ្ធិសេរីភាព នៃការបញ្ចេញមតិ និងការប្រមូលផ្តុំ និងការសម្ភាសន៍ពីអ្នកការសែត អ្នកនយោបាយ បញ្ញាវ័ន្ត និងប្រភពស្រាវជ្រាវផ្សេងទៀត ក៏បានលើកហេតុផល និងឧទាហរណ៍ជាក់ស្តែង ដែលរដ្ឋាភិបាលសិង្ហបុរី បានបំពានមកផងដែរ ។

ក្នុងនោះ ក៏រួមមានការចោទអ្នកសរសេរប្លុករិះគន់ចំណាត់ការ គោលនយោបាយ និងអសមភាពនៅក្នុងសង្គមសិង្ហបុរីរបស់រដ្ឋាភិបាលសិង្ហបុរីផងដែរ ។ ពេលនោះ ឆ្នាំ២០១៤ អ្នកសរសេរប្លុកបានរងបណ្តឹងរបស់នាយករដ្ឋម្ត្រីលី សៀនឡុងពីបទបរិហាកេរ្តិ៍ និងបទធ្វើការប្រមូលផ្តុំខុសច្បាប់ និងរំខានសាធារណៈទៀតផង ។

ទន្ទឹមនឹងការលើកឡើងនេះ Human Rights Watch ក៏បានទទូចឲ្យរដ្ឋាភិបាលសិង្ហបុរី ទម្លាប់ការចោទទាំងឡាយ ដើម្បីធានាឲ្យបានសិទ្ធិពេញលេញនៃការប្រមូលផ្តុំ និងបញ្ចេញមតិ ក៏ដូចជាធ្វើវិសោធនកម្មលើច្បាប់ដែលរឹតត្បិតលើសកម្មភាពទាំងនេះ ដើម្បីស្របតាមស្តង់ដារអន្តរជាតិ ។

លោកអនុប្រធានអង្គការឃ្លាំមើលសិទ្ធិមនុស្សប្រចាំតំបន់អាស៊ី Phil Robertson បានបង្ហាញចំណាប់អារម្មណ៍អមជាមួយនឹងរបាយការណ៍នេះថា៖«សិង្ហបុរី តែងតែលើកតម្កើងខ្លួនថាជាប្រទេសទំនើប និងជាទីកន្លែងដ៏ល្អសម្រាប់ការធ្វើធុរកិច្ច ក៏ប៉ុន្តែប្រជាជននៅក្នុងប្រទេសដែលតែងតែហៅខ្លួនថាប្រជាធិតេយ្យដែរនោះ ក៏មិនគួរមានការភ័យខ្លាចក្នុងការរិះគន់រដ្ឋាភិបាលរបស់ខ្លួន ឬនិយាយពីបញ្ហានយោបាយឡើយ»។

ជុំវិញរបាយការណ៍នេះដែរ អង្គការឃ្លាំមើលសិទ្ធិមនុស្ស ក៏បានធ្វើសំណើសុំការបកស្រាយ និងបំភ្លឺផងដែរ តែមិនមានអង្គការរដ្ឋាភិបាលសិង្ហបុរីណាមួយ តបវិញឡើយ ។ អ្វីគួរកត់សម្គាល់នោះ កន្លងមក រដ្ឋាភិបាលសិង្ហបុរី តែងតែអះអាងថា ច្បាប់ និងបទបញ្ញត្តិនានារបស់សិង្ហបុរី ធ្វើឡើងដើម្បីរក្សាសណ្តាប់ធ្នាប់ និងសន្តិសុខសង្គមប៉ុណ្ណោះ ៕