អន្តរជាតិ
រដ្ឋាភិបាល ស៊ូជី ទទួលស្គាល់ថាសេដ្ឋកិច្ចជាតិ មិនសូវលូតលាស់ដូចការរំពឹងទុកឡើយ
× រដ្ឋាភិបាលក្រុងណៃពិដោរ បានទទួលស្គាល់ថា សេដ្ឋកិច្ចរបស់មីយ៉ាន់ម៉ា មិនសូវមានការរីកលូតលាស់ល្អដូចការរំពឹងទុកឡើយ ខណៈរបាយការណ៍ស្ទាបស្ទង់របស់អ្នកជំនាញ អះអាងថា ដោយសារតែភាពទន់ខ្សោយ និងកង្វះខាតនៃការអនុវត្តគោលនយោបាយសេដ្ឋកិច្ចច្បាស់លាស់របស់រដ្ឋាភិបាលលោកស្រី អ៊ុងសាន ស៊ូជី ។
រដ្ឋមន្ត្រីផែនការ និងហិរញ្ញវត្ថុមីយ៉ាន់ម៉ា លោក Kyaw Win នៅថ្ងៃ១៣ ធ្នូ បានថ្លែងក្នុងកិច្ចប្រជុំស្តីពីការអភិវឌ្ឍសហគ្រាសធុនតូច និងមធ្យមនៅក្នុងក្រុងណៃពិដោរយ៉ាងដូច្នេះថា៖« មានការផ្តល់យោបល់មួយចំនួន បញ្ជាក់ថា សេដ្ឋកិច្ចរបស់ប្រទេស មិនសូវមានលក្ខណៈល្អប្រសើរ ដូចអ្វីដែលរដ្ឋាភិបាលបានរំពឹងឡើយ ។ ... យើង ត្រូវតែទទួលស្គាល់ ថានេះគឺជាការពិត»។ នេះបើយោងតាមការចុះផ្សាយរបស់សារព័ត៌មានមីយ៉ាន់ម៉ា The Irrawaddy ។
ការអះអាងទទួលស្គាល់ពីការដើរយឺតនៃសេដ្ឋកិច្ចជាតិរបស់មន្ត្រីជាន់ខ្ពស់នៃរដ្ឋាភិបាលលោកស្រី អ៊ុងសាន ស៊ូជី បានដើរបញ្ច្រាសទៅនឹងការលើកឡើងរបស់លោក ក្នុងវេទិកាសេដ្ឋកិច្ចជាមួយនឹងអ្នកវិនិយោគកាលពីខែមិថុនាកន្លងទៅ ។
នាពេលនោះ លោករដ្ឋមន្ត្រីបានអះអាងថា៖« សេដ្ឋកិច្ចមីយ៉ាន់ម៉ា ប្រៀបដូចទៅនឹងយន្តហោះដែលកំពុងតែនៅលើផ្លូវ ត្រៀមហោះចេញយ៉ាងដូច្នេះឯង ហើយការអភិវឌ្ឍសេដ្ឋកិច្ចរបស់មីយ៉ាន់ម៉ា នឹងបន្តលូតលាស់ ដូចនឹងពេលដែលយន្តហោះ បានរត់ផុតពីផ្លូវជាប់ដីរបស់ខ្លួន»។ តែការពិតមិនដូចការរំពឹងរបស់លោកឡើយ ។
បើតាមកាសែតមីយ៉ាន់ម៉ាដដែលនោះ ការអះអាងរបស់លោករដ្ឋមន្ត្រី ធ្វើឡើងក្រោយពីមានការចេញផ្សាយរបាយការណ៍ស្ទាបស្ទង់មួយរបស់របស់ក្រុមហ៊ុនប្រឹក្សាអាល្លឺម៉ង់ និងសភាពាណិជ្ជកម្មនិងឧស្សាហកម្មមីយ៉ាន់ម៉ា ដោយបានបញ្ជាក់ថា ទំនុកចិត្តនៃការធ្វើធុរកិច្ចនៅមីយ៉ាន់ម៉ាមានការធ្លាក់ចុះគួរឲ្យកត់សម្គាល់ ។
របាយការណ៍ដដែលនោះ ក៏បានបញ្ជាក់បន្ថែមដែរថា ហេតុផលសំខាន់នៃការធ្លាក់ចុះនៃទំនុកចិត្តក្នុងការធ្វើធុរកិច្ចនៅមីយ៉ាន់ម៉ា ក៏ដោយសារតែភាពមិនប្រាកដប្រជានៃគោលនយោបាយសេដ្ឋកិច្ចរបស់រដ្ឋាភិបាល និងមួយផ្នែកទៀត ការរាំងស្ទះក្នុងការគ្រប់គ្រងសេដ្ឋកិច្ចរបស់រដ្ឋាភិបាលនៃបក្សសម្ព័ន្ធជាតិដើម្បីប្រជាធិបតេយ្យ ដែលមានលោកស្រី អ៊ុងសាន ស៊ូជីជាប្រមុខ ៕
© រក្សាសិទ្ធិដោយ thmeythmey.com