គ្រូជម្រើសជាតិកូរ៉េខាងជើងថា ជីវិតនៅព្យុងយ៉ាង ដូចនៅអឺរ៉ុប គ្មានបញ្ហាអ្វីឡើយ

កីឡាអន្តរជាតិ

អន្តរជាតិ

គ្រូជម្រើសជាតិកូរ៉េខាងជើងថា ជីវិតនៅព្យុងយ៉ាង ដូចនៅអឺរ៉ុប គ្មានបញ្ហាអ្វីឡើយ

17, Dec 2017 , 11:39 am

រូបភាព

ដោយ: ទេព ពិទូរ្យ

អ្នកចាត់ការទូទៅក្រុមកីឡាបាល់ទាត់ជម្រើសជាតិកូរ៉េខាងជើងលោក Jorn Andersen ដែលគេឲ្យរហស្សនាមថា «Mourinho of Pyongyang» បានលើកសរសើររដ្ឋកុម្មុយនិស្តមួយនេះថា ជាប្រទេសដែលគួរឲ្យចង់រស់នៅ និងមានភាពសុខសាន្តបំផុត មិនដូចពាក្យតិះទានពីខាងក្រៅនោះទេ។ នេះបើតាមការផ្សាយរបស់ទីភ្នាក់ងារសារព័ត៌មាន AFP។

លោក Jose Mourinho ដែលកំពុងដឹកនាំក្រុម Manchester United និងមានភាពល្បីល្បាញនាពេលបច្ចុប្បន្ន រស់នៅក្នុងសណ្ឋាគារមួយក្នុងទីក្រុង Manchester ប្រទេសអង់គ្លេស ខណៈ លោក Jorn Andersen អ្នកចាត់ការក្រុមជម្រើសជាតិកូរ៉េខាងជើងក៏មានកន្លែងរស់នៅដ៏ល្អមួយដូចគ្នាដែរក្នុងទីក្រុងព្យុងយ៉ាង។

«វាជាទីក្រុងដ៏ស្ងប់ស្ងាត់មួយ (ព្យុងយ៉ាង) ហើយទីនេះពិតជាស្រស់ស្អាតណាស់ និងគ្មានបទឧក្រិដ្ឋអ្វីកើតឡើងទេ»។ នេះជាសម្តីរបស់អតីតសមាជិកក្រុមជម្រើសជាតិន័រវែស ប្រាប់ AFP ក្នុងបទសម្ភាសមួយនៅទីក្រុងតូក្យូ ប្រទេសជប៉ុន។

លោក Andersen មានវ័យ៥៤ឆ្នាំ ដែលបានផ្លាស់ទៅដឹកនាំក្រុមរដ្ឋកុម្មុយនិស្តកាលពីខែឧសភាឆ្នាំ២០១៦ បន្ថែមថា៖«ខ្ញុំរស់នៅក្នុងសណ្ឋាគារដ៏ប្រណិតមួយជាមួយភរិយាខ្ញុំក្នុងទីក្រុងព្យុងយ៉ាង ហើយទីនោះគឺដូចនៅអឺរ៉ុបអ៊ីចឹងដែរ។ ខ្ញុំគិតថារឿងរ៉ាវអវិជ្ជមានជាច្រើនដែលកើតឡើងលើកូរ៉េខាងជើងគឺជាការនិយាយបំផ្លើសពីខាងក្រៅប៉ុណ្ណោះ»។

អ្នកចាត់ការសញ្ជាតិន័រវែសរូបនេះ មានអារម្មណ៍ភ្ញាក់ផ្អើលយ៉ាងខ្លាំង ដែលបានក្លាយជាអ្នកដឹកនាំពីបរទេសរបស់កូរ៉េខាងជើងលើកដំបូងក្នុងរយៈពេលជាងមួយទសវត្សរ៍មកហើយ។

ស្ថិតក្នុងទីក្រុងតូក្យូ ជាទីដែលលោកដឹកនាំក្រុមប្រកួតដណ្តើមពានរង្វាន់ជើងឯកអាស៊ី East Asian championship លោកបានបង្ហាញអារម្មណ៍ថា៖«នៅពេលខ្ញុំទទួលបានតំណែងនេះដំបូងខ្ញុំគិតថាវាជារឿងចម្លែកបន្តិច ប៉ុន្តែឥឡូវនេះខ្ញុំពិតជាសប្បាយចិត្តណាស់ដែលបានមកទីនេះ ហើយវាជាការសម្រេចចិត្តដ៏ត្រឹមត្រូវរបស់ខ្ញុំ»៕