ពីនេះ ពីនោះ
ព័ត៍មានសុខភាព
ចែករំលែកឲ្យគ្នាដឹងផងអំពីអាហារដែលជាមិត្តដ៏ល្អសម្រាប់សុខភាពពោះវៀន
× ប្រព័ន្ធរំលាយអាហារដែលផ្តល់សុខភាពគឺជារឿងសំខាន់សម្រាប់សុខភាពទាំងមូល។ អាហារដែលមានអង់ស៊ីមរំលាយអាហារ បាក់តេរីមានប្រយោជន៍ដែលពង្រឹងដល់ការរំលាយអាហារ ឬជាតិសរសៃដែលផ្តល់ថាមពលដល់ការលូតលាស់បាក់តេរីល្អៗអាចជួយឲ្យប្រព័ន្ធរំលាយអាហារធ្វើការកាន់តែល្អថែមទៀត។
ការហើមពោះ ឈឺពោះ ផោមច្រើន ក្រពះមិនកិនគឺជាបញ្ហាហើយក្នុងប្រព័ន្ធរំលាយអាហារ។ ការដែលមានទម្លាប់ញ៉ាំអាហារផ្តល់សុខភាពដូចជា ញ៉ាំទៀងពេល ញ៉ាំអាហារតិចៗ ញ៉ាំយឺតៗ និងគ្រប់គ្រងស្ត្រេសបានល្អអាចជួយធ្វើឲ្យក្រព័ន្ធរំលាយអាហារធ្វើការបានល្អដែរ។ ជាមួយគ្នានេះដែរ ការដែលជ្រើសរើសអាហារបានត្រឹមត្រូវ ជាពិសេសអាហារដែលត្រូវបានគេចាត់ទុកថាជាមិត្តដ៏ល្អសម្រាប់ប្រព័ន្ធរំលាយអាហារនោះ គឺជារឿងដ៏សំខាន់។ ដូច្នេះតើអាហារទាំងនោះមានអ្វីខ្លះទៅ?
ល្ហុង
ល្ហុងផ្ទុកទៅដោយអង់ស៊ីមមួយឈ្មោះថា Papain ដែលអាចជួយរំលាយជាតិប្រូតេអ៊ីនបាន។ ផ្លែឈើមួយនេះក៏សម្បូរវីតាមីន និងជាតិរ៉ែច្រើនដែរ។ យកល្អគួរទែព្យាយាមញ៉ាំវាឲ្យបានច្រើនជាប្រចាំដើម្បីល្អចំពោះក្រពះពោះវៀន។
យ៉ាអួ
យ៉ាអួនឹងក្លាយទៅជារបស់ល្អវិញនៅពេលនិយាយដល់សុខភាពនៃការរំលាយអាហារ។ តាមពិតទៅ ផលិតផលមួយនេះប្រហែលជាមានប្រយោជន៍ក្នុងការព្យាបាលបញ្ហាក្រពះពោះវៀនតាំងពីសម័យរ៉ូម៉ាំងម្លេះដោយប្រើជាទឹកដោះគោរង។ យ៉ាងអួមានបាក់តេរីល្អ ឬហៅថាប្រូបាយអូទិចដែលអាចជួយដល់ប្រព័ន្ធរំលាយអាហារមនុស្សបាន។ ប្រូបាយអូទិចក៏មានប្រយោជន៍ក្នុងការពង្រឹងដល់មុខងារប្រព័ន្ធភាពស៊ាំ និងការពារមេរោគពីការបង្ករោគដែរ។
ផ្លែចេក
ផ្លែចេកគឺជាអាហារសម្បូរជាតិសរសៃមួយផ្សេងទៀតដែលមានសារធាតុ Inulin ហើយក៏អាចជម្រុញដល់ការលូតលាស់របស់បាក់តេរីល្អៗបានដែរ ប៉ុន្តែមិនទាំងអស់ឡើយ។ ផ្លែចេកអាចធ្វើឲ្យផលិតជាតិរំអិលដែលការពារភ្នាស់របស់ក្រពះពីអាស៊ីតក្រពះបាន។ អាស៊ីតមួយនេះអាចធ្វើឲ្យរលាក និងបង្កការក្រហាយដើមទ្រូងបាននៅពេលក្រពះធ្វើទុក្ខ។
ខ្ញី
ត្រឹមតែខ្ញីមួយដុំជាមួយនឹងទឹកក្រូចឆ្មាប៉ុន្មានដំណក់មុនពេលបាយអាចជួយរក្សាប្រព័ន្ធរំលាយអាហារធ្វើការកាន់តែល្អទៅហើយ។ អ្នកក៏អាចញ៉ាំតែខ្ញីដើម្បីសម្រួលដល់ការមិនរំលាយអាហារ និងផោមច្រើនបានដែរ។ ខ្ញីជួយពង្រឹងដល់ចលនារបស់ពោះវៀនដែលជួយដល់ការរំលាយអាហារ។ ពន្យាពេលការធ្វើការរបស់ក្រពះដើម្បីកុំឲ្យមានបញ្ហាក្រពះមិនកិនទៀត។
បន្លែពណ៌បៃតង
អ្នកបានដឹងរួចទៅហើយថា បន្លែពណ៌បៃតងដូចជាស្ពៃស្ពីណាចអីហ្នឹងគឺមានជីវជាតិច្រើនណាស់ដូចជា វីតាមីន C, A, K និងអាស៊ីតហ្វូលិក។ ប៉ុន្តែវាមិនទាំងអស់ឡើយ។ ការសិក្សាបានបង្ហាញថា បន្លែពណ៌បៃតងមានសារធាតុ Inulin និងជួយពង្រឹងដល់ការលូតលាស់បាក់តេរីល្អៗក្នុងពោះវៀន។
ម្នាស់
ផ្លែម្នាស់មានអង់ស៊ីមរំលាយអាហារមួយឈ្មោះថា Bromelain ដែលជួយដល់ការបំបែកប្រូតេអ៊ីន។ វាក៏ជាប្រភពដ៏ល្អមួយនៃជីវជាតិ Manganese និងវីតាមីន C ដែរក្នុងការជម្រុញដល់ការរំលាយអាហារ។
ផ្លែដូង
តើអាហារសម្បូរជាតិខ្លាញ់ធ្វើឲ្យក្រពះមិនស្រួលមែនទេ? អញ្ចឹងសាកល្បងប្រេងដូងទៅមើល។ វត្តមានខ្លាញ់ Saturated Fat ក្នុងប្រេងដូងគឺជាប្រភេទ Triglycerides ដែលអាចឲ្យរាងកាយប្រើប្រាស់បាន ហើយក៏មិនដាក់សម្ពាធទៅលើថង់ទឹកប្រមាត់ដែរ។ លើសពីនេះទៅទៀត វត្តមាន Lauric Acid ក្នុងប្រេងដូងក៏ប្រហែលជាអាចកំចាត់បាក់តេរីគ្រោះថ្នាក់ចេញពីរាងកាយ និងរក្សាសុខភាពពោះវៀនបានល្អដែរ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com