ជាតិ
នយោបាយជាតិ
សម្តេចក្រុមព្រះ សុំឲ្យចិនជួយ ដោយប្រាប់ថា ហ្វ៊ុនស៊ិនប៉ិចក្រខ្លាំងណាស់
× ភ្នំពេញ៖ ថ្វីដ្បិត គណបក្សហ្វ៊ុនស៊ិនប៉ិច មានឱកាសបានឡើងទៅដល់លំដាប់ថ្នាក់ទីពីរ បន្ទាប់ពីគណបក្សប្រជាជនកម្ពុជាក៏ពិតមែន ប៉ុន្តែគណបក្សរាជានិយមមួយនេះ នៅមានភាពក្រខ្សត់នៅឡើយ។ សម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច បានមានបន្ទូលយ៉ាងដូច្នេះ ក្នុងជំនួបជាមួយគណៈប្រតិភូនៃសាធារណរដ្ឋប្រជាមានិតចិន កាលពីថ្ងៃទី២៥ ខែធ្នូ ឆ្នាំ២0១៧។
បន្ទាប់ពីត្អូញត្អែរពីភាពខ្វះខាតបែបនេះហើយ សម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិចដែលមានភព្វសំណាងច្រើនជាងគេ ក្នុងការទទួលបានអាសនៈសភារបស់អតីតគណបក្សសង្គ្រោះជាតិ ក៏បានស្នើសុំជំនួយផ្សេងៗពីប្រទេសចិន ដូចជាកំព្យូទ័រ សៀវភៅសរសេរ និងប៊ិច ជាដើម។ លើសពីនេះ សម្តេចក្រុមព្រះ ដែលធ្លាប់ធ្វើជានាយករដ្ឋមន្ត្រីទីមួយកាលពីអំឡុងទសវត្ស៩០ បានដាក់សំណើដ៏ធំមួយទៅកាន់ប្រទេសចិន គឺសុំឲ្យជួយជ្រោមជ្រែងគណបក្សហ្វ៊ុនស៊ិនប៉ិច នៅក្នុងការបោះឆ្នោតថ្នាក់ជាតិនាឆ្នាំ២០១៨។
យ៉ាងណាក៏ដោយ សម្តេចក្រុមព្រះ ពុំបានបង្ហើបនោះទេថា ព្រះអង្គ ចង់ឲ្យប្រទេសចិនជួយគណបក្សហ្វ៊ុនស៊ិនប៉ិច លើផ្នែកអ្វីខ្លះ នៅក្នុងការបោះឆ្នោតខាងមុខ។ ព្រះអង្គ គ្រាន់តែបញ្ជាក់ថា គណៈប្រតិភូចិន នឹងពាំនាំសំណើរបស់ព្រះអង្គ ទៅប្រាប់លោក ស៊ី ជិនពីង ប្រធានាធិបតីចិន ដើម្បីធ្វើសេចក្តីសម្រេច។
សូមស្តាប់សម្តេចក្រុមព្រះ មានបន្ទូលទៅកាន់ក្រុមអ្នកកាសែត ក្រោយបញ្ចប់ជំនួបជាមួយគណៈប្រតិភូចិន ដែលដឹកនាំដោយលោក វ៉ាង វៃគួង ប្រធានវិទ្យាស្ថានវិទ្យាសាស្ត្រសង្គមនៃសាធារណរដ្ឋប្រជាមានិតចិន៖
បន្ទាប់មក ប្រធានគណបក្សហ្វ៊ុនស៊ិនប៉ិច ក៏ឆ្លៀតមានបន្ទូលពីស្ថានការណ៍នយោបាយចុងក្រោយដែរ។ សម្តេចក្រុមព្រះ បកស្រាយទៅកាន់គណៈប្រតិភូចិនថា ការររំលាយគណបក្សសង្គ្រោះជាតិ និងការបែងចែកការអាសនៈនៃគណបក្សនេះ គឺជាការអនុវត្តច្បាប់នៅកម្ពុជា។ បើតាមសម្តេចក្រុមព្រះ គណៈប្រតិភូចិន បានលើកឡើងជាច្រើនពីលទ្ធផលមហាសន្និបាតលើកទី១៩ នៃបក្សកុម្មុនីស្តចិន ដែលបានប្រារព្ធឡើងកាលពីចុងខែតុលា ឆ្នាំ២0១៧ កន្លងទៅ។
សូមបញ្ជាក់ថា ប្រទេសចិន គឺជាប្រទេសមួយ ដែលបន្តឈរខាងរដ្ឋាភិបាលកម្ពុជា ខណៈរដ្ឋាភិបាលកម្ពុជា កំពុងរងទណ្ឌកម្មផ្ទួនៗ ពីបណ្តាប្រទេសនិងអង្គការអន្តរជាតិនានា ដោយសារតែគណបក្សសង្គ្រោះ ត្រូវបានរំលាយចោល៕
© រក្សាសិទ្ធិដោយ thmeythmey.com