ពីនេះ ពីនោះ
ព័ត៍មានសុខភាព
ភេសជ្ជៈ និងទឹកផ្លែឈើផ្អែមៗអាចនាំឲ្យក្មេងកើតជំងឺហឺតបាន
× យោងទៅសេចក្តីកាយការណ៍ពីសារព័ត៌មាន Mail Online បានឲ្យដឹងថា ក្មេងដែលញ៉ាំទឹកផ្លែឈើមានជាតិផ្អែមច្រើនគឺប្រឈមកាន់តែខ្ពស់នឹងការកើតជំងឺហឺត។
អ្នកស្រាវជ្រាវក្នុងប្រទេសអាមេរិកនិយាយថា ក្មេងៗដែលមានម្តាយញ៉ាំភេសជ្ជៈមានជាតិផ្អែមច្រើនខណៈពេលកំពុងតែមានផ្ទៃពោះ ហើយកូនដែលញ៉ាំទឹកផ្លែឈើបែបនេះច្រើនកាលពីកុមារភាពក៏ទំនងជាត្រូវបានគេរកឃើញថាមានជំងឺហឺតក្នុងវ័យ ៧ ទៅ៨ឆ្នាំដែរ។
យើងដឹងហើយថា អ្នកដែលធាត់ៗទំនងជាងាយនឹងមានជំងឺហឺតណាស់ ហើយភេសជ្ជៈមានជាតិផ្អែមច្រើនអាចនាំឲ្យមនុស្សទៅជាធាត់បាន។ ប៉ុន្តែការសិក្សានេះបានបញ្ជាក់ថា ជាតិស្ករក្នុងភេសជ្ជៈ (Fructose) ប្រហែលជាអ្នកនាំឲ្យកើតជំងឺហឺតដោយផ្ទាល់។
កាលពីការសិក្សាមុនៗបានទាយថា របបអាហារមានជាតិ Fructose ខ្ពស់ប្រហែលជានាំឲ្យកើតជាការរលាកដល់ផ្លូវដង្ហើម និងរំខានដល់ការឆ្លើយតបធម្មតារបស់ប្រព័ន្ធភាពស៊ាំ។
អ្នកស្រាវជ្រាវបានផ្តល់ជាកម្រងសំណួរដល់ស្ត្រីប្រមាណ ១០៦៨នាក់ ចាប់ពីមានផ្ទៃពោះដំបូងរហូតដល់កូនពួកគេអាយុបាន ៧ទៅ៨ឆ្នាំ។ ពួកគេបានរកឃើញថា ក្មេងដែលកើតពីស្ត្រីញ៉ាំភេសជ្ជៈមានជាតិស្ករច្រើនខណៈពេលមានផ្ទៃពោះទំនងជាងាយនឹងកើតជំងឺហឺតនៅថ្ងៃក្រោយណាស់។ ហើយក្មេងដែលញ៉ាំជាតិ Fructose ច្រើនពីភេសជ្ជៈផ្អែមៗនៅពេលធំបន្តិចក៏ទំនងជាកើតជំងឺហឺតនៅថ្ងៃក្រោយដែរ។
យ៉ាងណាមិញ ការសិក្សានេះមិនទាន់មានអំណះអំណាងគ្រប់គ្រាន់ដើម្បីអះអាងថាភេសជ្ជៈមានជាតិផ្អែមនឹងធ្វើឲ្យកើតជំងឺហឺតឡើយ។ ប៉ុន្តែវាអាចជាសញ្ញាមួយល្អក្នុងការកាត់បន្ថយការញ៉ាំផ្អែមរបស់ក្មេងជាពិសេសក្មេងតូចៗតែម្តង។ យកល្អគួរតែជ្រើសរើសជាទឹកសាបធម្មតា ឬទឹកដោះគោវិញទើបល្អជាង៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com