កីឡាអន្តរជាតិ
អន្តរជាតិ
Van Dijk ជាខ្សែការពារថ្លៃបំផុតលើលោកដោយ Liverpool ហ៊ានទិញក្នុងតម្លៃ១០០លានដុល្លារ Virgil ក្លាយជាខ្សែការពារថ្លៃជាងគេលើលោក ក្រោយការត្រូវរ៉ូវគ្នាលើតម្លៃផ្ទេរពី Southampton ទៅ Liverpool ។ រូបថត Twitter Liverpool
× Virgil van Dijk នឹងចាកចេញពី Southampton ទៅចូលរួមជាមួយ Liverpool នៅពេលទីផ្សារទិញដូរកីឡាករបើកទ្វារលើកទី២ នៅថ្ងៃទី១ ខែមករា ឆ្នាំ២០១៨ខាងមុខនេះ ក្នុងតម្លៃបំបែកកំណត់ត្រាខ្សែការពារពិភពលោក ៧៥លានផោន ប្រមាណ ១០០លានដុល្លារអាមេរិក។
ខ្សែការពារអន្តរជាតិហូឡង់ វ័យ ២៦ឆ្នាំរូបនេះ ធ្លាប់មានទំនាក់ទំនងផ្លាស់ទៅក្រុមរហស្សនាមហង្សក្រហមម្តងមកហើយកាលពីដើមរដូវកាល ប៉ុន្តែត្រូវ Southampton បដិសេធ ដោយចោតថាបានពិភាក្សាជាមួយកីឡាករខ្លួនស្ងាត់ៗ។ តែយ៉ាងណា អ្នកចាត់ការ Liverpool លោក Jurgen Klopp សុំទោសចំពោះការចោទប្រកាន់នេះរួចរាល់ហើយដែរ។
តម្លៃផ្ទេរ ១០០លានដុល្លារបានធ្វើឲ្យ Van Dijk បំបែកកំណត់ត្រាខ្សែការពារថ្លៃបំផុតរបស់ Benjamin Mendy ដែល Manchester City ទិញពី Monaco តម្លៃ ៥២លានផោន ប្រហែលជាង៦៩លានដុល្លារកាលពីខែកក្កដា។
អតីតខ្សែការពារ Celtic បាននិយាយនៅក្នុងសេចក្តីថ្លែងការណ៍មួយថារូបគេ «រីករាយនិងមានកិត្តិយស» ក្នុងការចុះហត្ថលេខាមកកាន់ទឹកដី Anfield ដែលជាក្លិបដ៏ធំមួនៅអឺរ៉ុប។
Van Dijk បានផ្លាស់ចេញពី Celtic នៃលីកកំពូលស្កុតឡែនកមចូលរួមជាមួយ Southampton កាលពីឆ្នាំ ២០១៥ ក្នុងតម្លៃ ១៣លានផោន ប្រមាណ ១៧លានដុល្លារ។
ការចាកចេញដ៏ជម្រូងចម្រាសរបស់ Van Dijk ក៏មានការសម្រេចចិត្តយ៉ាងតឹងតែងមួយដែរពីសំណាក់អ្នកចាត់ការ Southampton លោក Mauricio Pellegrino ដោយសារឃើញខ្សែការពាររូបនេះបង្ខំចិត្តហ្វឹកហាត់តែម្នាក់ឯងជារឿយៗ៕
Tag:
បាល់ទាត់
Virgil van Dijk
Liverpool
Southampton
© រក្សាសិទ្ធិដោយ thmeythmey.com