កីឡាអន្តរជាតិ
អន្តរជាតិ
ក្រោយឈប់ពីបាល់ទាត់ លោក Mutko បន្តលាលែងពីគណៈកម្មាធិការរៀបចំ World Cup រូបភាព៖ AFP
× ឧបនាយករដ្ឋមន្ត្រីរុស្ស៊ី Vitaly Mutko បានប្រកាសលាលែងពីតំណែងជាប្រធានគណៈកម្មាធិការរៀបចំការប្រកួត World Cup ឆ្នាំ២០១៨ ដែលរុស្ស៊ីធ្វើជាម្ចាស់ផ្ទះ តែ២ថ្ងៃប៉ុណ្ណោះបន្ទាប់ពីព្យួរតួនាទីជាប្រធានសហព័ន្ធកីឡាបាល់ទាត់រុស្ស៊ី (RFU) របស់ខ្លួនរួចមក។ ការលាលែងជាបន្តបន្ទាប់នេះ ធ្វើឡើងក្រោយពីណៈកម្មាធិការអូឡាំពិកអន្តរជាតិ (IOC) ហាមលោកចូលរួមក្នុងព្រឹត្តិការណ៍អូឡាំពិកអស់មួយជីវិតក្រោមបទចោទប្រើប្រាសសារធាតុហាមឃាត់។
លោក Vitaly Mutko ត្រូវបាន IOC ហាមចូលរួមក្នុងព្រឹត្តិការណ៍កីឡាអូឡាំពិកអស់មួយជីវិត ពីបទប្រើសារធាតុហាមឃាត់ (Doping) ដែលជាបទល្មើសប្រឆាំងនឹងបម្រាមក្នុងតុលាការមជ្ឈត្តកម្មកីឡា (CAS)។
ដោយសារការពិន័យពី IOC យ៉ាងធ្ងន់ធ្ងរនេះហើយ ទើបឧបនាយករដ្ឋមន្ត្រីរុស្ស៊ី វ័យ៥៨ឆ្នាំរូបនេះ សម្រេចព្យួរតូនាទីជាប្រធានសហព័ន្ធកីឡាបាល់ទាត់រុស្ស៊ី ដើម្បីទៅតទល់ផ្លូវច្បាប់ជាមួយតុលាការកីឡា ហើយបន្តលាលែងពីតំណែងប្រធានគណៈកម្មាធិការរៀបចំការប្រកួត World Cup ឆ្នាំក្រោយថែមទៀតផង។
បើតាមការផ្សាយរបស់ទីភ្នាក់ងារសារព័ត៌មាន AFP ការសម្រេចចិត្តចុះចេញពីតំណែងនេះ គឺបន្ទាប់ពីកិច្ចប្រជុំរបស់ក្រុមប្រឹក្សាសម្របសម្រួលរបស់រដ្ឋាភិបាលរុស្ស៊ីសម្រាប់ការរៀបចំការប្រកួតកីឡាបាល់ទាត់ពិភលោកឆ្នាំក្រោយ ហើយលោក Alexei Sorokin និងឡើយជំនួសតំណែងនេះវិញ។
Mutko តែងតែបដិសេធរាល់ការចោទប្រកាន់លើការប្រើប្រាស់សារធាតុញៀនពីណៈកម្មាធិការអូឡាំពិកអន្តរជាតិ បើទោះបីជាមានអត្តពលិករុស្ស៊ីមួយចំនួន រួមទាំងលោក ត្រូវបានហាមឃាត់ចូលរួមការប្រកួតកីឡាអូឡាំពិករដូវរងារឆ្នាំ ២០១៨ នៅកូរ៉េខាងត្បូងក៏ដោយ។
Mutko បានប្រាប់ R Sports ថា បើទោះបីលោកលាលែងពីតំណែងទាំងពីរនេះក៏ដោយ ក៏លោកនឹងបន្តតួនាទីក្នុងរដ្ឋាភិបាល និងការងារជាច្រើនដែលលោកត្រូវធ្វើជាបន្តបន្ទាប់ទៀត៕
Tag:
កីឡាអូឡាំពិក
IOC
Vitaly Mutko
© រក្សាសិទ្ធិដោយ thmeythmey.com