ទិវារត់កម្សាន្តពេលរាត្រីលើកទី២ទាក់ទាញអ្នកចូលរួមប្រមាណ៩០០នាក់

ជាតិ

ទិវារត់កម្សាន្តពេលរាត្រីលើកទី២ទាក់ទាញអ្នកចូលរួមប្រមាណ៩០០នាក់

01, Jan 2018 , 7:19 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ទិវារត់កម្សាន្តពេលរាត្រី ជាកម្មវិធីមួយថ្មី តែមានអ្នកចូលរួមច្រើនគួរឱ្យចាប់អារម្មណ៍។ ទិវានេះធ្វើឡើងពេលរាត្រី ដោយរត់កម្សាន្តជាមួយតន្ត្រី បែបសប្បាយៗ។ កីឡារត់កម្សាន្តពេលរាត្រី ត្រូវបានរៀបចំធ្វើជាលើកទី២ នៅរាត្រីឆ្លងឆ្នាំសកល ថ្ងៃទី៣១ ធ្នូនៅតំបន់ផាប់ស្ទ្រីត ផ្សារចាស់ ក្រុងសៀមរាប ដែលទាក់ទាញអ្នកចូលរួមប្រមាណ ៩០០នាក់។

លោក សែម ផល្លា នាយកចាត់ការទូទៅក្នុងការរៀបចំទិវារត់ប្រណាំងអន្តរជាតិ និងការរត់កម្សាន្តពេលរាត្រី នៃគណៈកម្មការជាតិអូឡាំពិក បានប្រាប់សារព័ត៌មានថ្មីៗឱ្យដឹងថា ក្នុងចំណោមអ្នកចូលរួមប្រមាណ ៩០០នាក់នោះ ភាគច្រើនជាជនបរទេស និងក្រុមយុវជន។ លោកបន្ថែមថា អ្នកចូលរួមមានចំនួនច្រើនហួសពីការស្មានរបស់គណៈកម្មការរៀបចំ ព្រោះពេលវេលាផ្សព្វផ្សាយមានរយៈពេលខ្លី និងមិនទូលំទូលាយ តែអាចទាក់ទាញអ្នកចូលរួមបានច្រើនគួរឱ្យកត់សម្គាល់បែបនេះ។

តាមការបញ្ជាក់ពីលោក សែម ផល្លា តាមពិតទៅទិវារត់កម្សាន្តពេលរាត្រីនេះ គឺមានភាពល្បីល្បាញរួចហើយនៅតំបន់អាស៊ីមានម៉ាឡេស៊ី សហរដ្ឋអាមេរិក និងប៉ែកអឺរ៉ុប។ សម្រាប់ការចាប់ផ្តើមនៅកម្ពុជា គណៈកម្មការរៀបចំបានជ្រើសរើសខេត្តសៀមរាប ព្រោះថាវា ជាគោលដៅទេសចរណ៍ដ៏ធំនៅកម្ពុជា ហើយលោក សែម ផល្លា រំពឹងថា នឹងទទួលបានជោគជ័យ និងមានការចូលរួមច្រើនពីសំណាក់ទេសចរ ដែលនិយមការកម្សាន្តបែបនេះ។ «នៅកម្ពុជា ការយល់ដឹងពីកីឡានេះនៅមានកម្រិតនៅឡើយ យើងសង្ឃឹមថា ទៅថ្ងៃខាងមុខ វានឹងមានភាពល្បីល្បាញដូចការរត់ម៉ារាំតុងយ៉ាងដូច្នោះដែរ»។ នេះបើតាមការលើក ឡើងរបស់លោក សែម ផល្លា។

ជាមួយនឹងការរំពឹងពីភាពជោគជ័យនៃកីឡាបែបកម្សាន្តពេលរាត្រីនេះហើយ នាយកចាត់ការទូទៅក្នុងការរៀបចំទិវារត់ប្រណាំងអន្តរជាតិ ក៏បង្ហើបពីគោលបំណងទៅថ្ងៃអនាគត គឺគណៈកម្មការគ្រោងរៀបចំកីឡានេះ ទៅរាជធានីភ្នំពេញ ក្រុងព្រះសីហនុ និងខេត្ត កែបជាដើម ដើម្បីបំពេញតម្រូវការដល់ទេសចរ ដែលនិយមបែបកីឡាមួយនេះ។

គួររម្លឹកថា ទិវារត់កម្សាន្តពេលរាត្រីលើកទី១ ត្រូវបានធ្វើឡើងនៅដើមខែ វិច្ឆិកា ឆ្នាំ២០១៧ ដោយពេលនោះបានទាក់ទាញអ្នកចូលរួមប្រមាណជិត៧០០នាក់៕