អ្នកគ្រូ ហ៊ីហ្វូមី ចំណាយពេល២២ឆ្នាំបង្រៀនភាសាជប៉ុនដល់ប្រជាជនកម្ពុជា

ជាតិ

អ្នកគ្រូ ហ៊ីហ្វូមី ចំណាយពេល២២ឆ្នាំបង្រៀនភាសាជប៉ុនដល់ប្រជាជនកម្ពុជា

02, Jan 2018 , 7:59 am

រូបភាព

ដោយ: អុីសា រ៉ហានី (Isa Rohany)

សៀមរាប៖ គ្រូបង្រៀនជនជាតិជប៉ុន អ្នកគ្រូ អូនី ហ៊ីហ្វូមី (ONI Hifumi) ជាមនុស្សម្នាក់ដែលស្រឡាញ់ការងារអប់រំ។ មកដល់បច្ចុប្បន្ន គឺមានរយៈពេល២២ឆ្នាំហើយ ដែលអ្នកគ្រូបានមករស់នៅខេត្តសៀមរាប ហើយក៏ជារយៈពេលដែលអ្នកគ្រូបានបង្រៀនភាសាជប៉ុនដល់ប្រជាជនកម្ពុជាដែរ។ ចំណុចពិសេសមួយទៀត គឺអ្នកគ្រូចេះនិយាយភាសាខ្មែរបានយ៉ាងល្អ និងបានស្វែងយល់ពីវប្បធម៌រស់នៅរបស់ពលរដ្ឋខ្មែរបានយ៉ាងទូលំទូលាយផងដែរ។

អ្នកគ្រូ អូនី ហ៊ីហ្វូមី ជាមនុស្សរួសរាយរាក់ទាក់ និងតែងបង្ហាញនូវស្នាមញញឹម រាល់ពេលទំនាក់ទំនងទៅកាន់អ្នកដទៃ។ បច្ចុប្បន្នអ្នកគ្រូ មានតួនាទីមួយចំនួនដែលផ្តោតសំខាន់លើការងារបណ្តុះបណ្តាល ការអប់រំ និងវប្បធម៌ជប៉ុន។ អ្នកគ្រូ ក៏ជានាយកសាលាភាសាជប៉ុន ហ្វីហ្វូមិ ដ៏ល្បីល្បាញនៅក្នុងក្រុងសៀមរាបផងដែរ។

នៅឆ្នាំ១៩៩៥ អ្នកគ្រូ ហ៊ីហ្វូមី មានឱកាសមករស់នៅខេត្តសៀមរាប ដោយស្វាមីអ្នកគ្រូ ត្រូវមកបំពេញការងារនៅកម្ពុជា។ មកដល់ខេត្តសៀមរាបបានមួយខែ អ្នកគ្រូក៏ចាប់ផ្តើមបង្រៀនភាសាជប៉ុន ដោយបើកថ្នាក់ឥតគិតថ្លៃ។

អំឡុងឆ្នាំ ១៩៩៧ ពេលមានបញ្ហាជម្លោះប្រដាប់អាវុធនៅរាជធានីភ្នំពេញ អ្នកស្រីក៏បានត្រឡប់ទៅជប៉ុនវិញ។ អ្នកគ្រូបានរម្លឹកថា ពេលនោះអ្នកស្រីបានទទួលសំបុត្រពីកូនសិស្ស២នាក់។ សម្រាប់អ្នកគ្រូ គឺមានការភ្ញាក់ផ្អើលមែនទែន ព្រោះកន្លងមកកូនសិស្សទាំងនោះ មិនដែលស្គាល់ទូរប្រៃសនីយ៍កម្ពុជាឡើយ។ ក្នុងសំបុត្រដែលអ្នកគ្រូទទួលបានពីកូនសិស្សនោះ ម្នាក់ប្រាប់ពីស្ថានភាពល្អឡើងវិញនៅកម្ពុជា និងសុំឱ្យអ្នកគ្រូមកកម្ពុជាវិញ។ ចំណែកកូនសិស្សមួយទៀត បានធ្វើលំហាត់ជាភាសាជប៉ុន ផ្ញើដាក់ទៅអ្នកគ្រូជួយកែ ដោយបញ្ជាក់ថា នៅកម្ពុជាពុំមានគ្រូបង្រៀនភាសាជប៉ុនឡើយ។

នៅពេលនោះ អ្នកគ្រូ ហ៊ីហ្វូមី បានគិតក្នុងចិត្តថា ប្រសិនបើអ្នកគ្រូមានលទ្ធភាពត្រឡប់មកកម្ពុជាវិញ នោះអ្នកគ្រូគួរតែមក ដើម្បីជួយកូនសិស្សខ្លួន។ នៅចុងឆ្នាំ ១៩៩៧ អ្នកគ្រូក៏សម្រេចចិត្តត្រឡប់មកកម្ពុជាវិញ ដោយបន្តបង្រៀនភាសាជប៉ុនដល់កូនសិស្សនៅក្រុងសៀមរាប។

ដំបូងឡើយ អ្នកគ្រូ ហ៊ីហ្វូមី បើកថ្នាក់បង្រៀនត្រឹមភាសាជប៉ុនតែប៉ុណ្ណោះ តែក្រោយមកដោយគិតថា កង្វះជំនាញមគ្គុទ្ទេសក៍ភាសាជប៉ុន អ្នកគ្រូក៏បើកបង្រៀនថ្នាក់នេះបន្ថែម។ កូនសិស្សដំបូងដែលរៀនជំនាញមគ្គុទ្ទេសក៍ជាមួយអ្នកគ្រូមានចំនួន១៥នាក់ ហើយអ្នកគ្រូ ហ៊ីហ្វូមី ថាបច្ចុប្បន្នពូកគេទាំងនោះ បានក្លាយជាមគ្គុទ្ទេសក៍លំដាប់ វីអាយភី។

«ខ្ញុំមកខេត្តសៀមរាបដំបូង ខ្ញុំបានទៅមើលប្រាសាទអង្គរវត្ត និងប្រាសាទបាយ័ន។ ពេលនោះ ខ្ញុំមិនសូវចាប់អារម្មណ៍ទេ មិនយល់ គ្មានអ្នកណាពន្យល់ពីប្រាសាទ ចម្លាក់ ខ្ញុំគិតថា ប្រាសាទទាំងនោះ គឺដូចជា ភ្នំថ្ម អ៊ីចឹង។ ក្រោយមក ខ្ញុំចាប់ផ្តើមអានសៀវភៅជាច្រើន ហើយគិតថាជំនាញមគ្គុទ្ទេសក៍ គឺពិតជាសំខាន់ណាស់ ដើម្បីប្រាប់ទេសចរឱ្យយល់ បើមិនពន្យល់ទេ ពួកគេបានត្រឹមតែថតរូប ហើយក៏ត្រឡប់ទៅវិញ។ កម្ពុជា ពិតជាអស្ចារ្យមែនទែន»។ នេះជាការរម្លឹករបស់លោកគ្រូ ហ៊ីហ្វូមី ពេលអ្នកគ្រូមកកាន់ខេត្តសៀមរាបដំបូង។

ជាមួយនឹងការងារបង្រៀនជំនាញមគ្គុទ្ទេសក៍នេះដែរ អ្នកគ្រូជប៉ុន ហ៊ីហ្វូមី បានសរសេរសៀវភៅមួយក្បាល សម្រាប់មគ្គុទ្ទេសក៍ទេសចរណ៍។ អ្នកគ្រូបានចំណាយពេលសិក្សាស្រាវជ្រាវ ដើម្បីសរសេរសៀវភៅនេះ អស់រយៈពេល១០ឆ្នាំ ដោយព្យាយាមអានសៀវភៅប្រមាណ ៧០ក្បាល។

ទោះខំបង្រៀនភាសាជប៉ុនអស់ជាង ២០ឆ្នាំមកហើយក្តី តែអ្នកគ្រូ ហ៊ីហ្វូមី មិនទាន់មានអគារសិក្សាសមរម្យនៅឡើយ។ ដំបូងឡើយ អ្នកគ្រូបានជួលកន្លែងគេ ដើម្បីបើកថ្នាក់បង្រៀននៅផ្លូវជាតិលេខ៦ ក្រោយមកប្តូរទៅម្ដុំវត្តរាជបូព៌ បន្ទាប់មកទៀត គឺនៅអគារបច្ចុប្បន្នស្ថិតនៅ ក្រោយវត្ត ពោធិ៍លង្កា ក្រុងសៀមរាប។ អគារសិក្សានេះ មានទំហំធំ និងទីធ្លាខាងមុខទូលាយក៏ពិតមែន តែមិនទាន់បៀកស៊ីម៉ង់នៅឡើយ មានន័យថា វាមានរូបរាងត្រឹមជាគ្រោងដុំឥដ្ឋតែប៉ុណ្ណោះ ចំណែកទ្វារ និងបង្អួចក៏គ្មានគ្រប់គ្រាន់ដែរ។

«ដីដែលធ្វើសាលានេះ ខ្ញុំទិញគេប្រហែល២០ឆ្នាំហើយ ដំបូងវាជាស្រះ កាលខ្ញុំទិញវាមានតម្លៃថោក ព្រោះគ្មានអ្នកចង់បាន។ ក្រោយមកមានសប្បុរសជនជប៉ុនជួយ ដោយពួកគេឃើញពីសកម្មភាពរបស់ខ្ញុំ ក៏មានលុយចាក់ដីបំពេញអស់ប្រមាណ ៨០០ឡាន។ តែដូចឃើញស្រាប់ ហើយគឺបានតែប៉ុណ្ណឹង មានលុយបន្តិច យើងធ្វើបន្តិច១៥ឆ្នាំហើយ សាលានេះមិនទាន់រួចទេ។ ខ្ញុំអត់មានលុយទេ (និយាយលាយសំណើច បែបហួសចិត្ត)»។ អ្នកគ្រូ ហ៊ីហ្វូមី និយាយបណ្តើរ សើចបណ្តើរ និងលើកដៃចង្អុលទៅជញ្ជាំងអគារ ដែលមានតែគ្រោងឥដ្ឋ ពណ៌លឿងទុំ។ តាមពិតទៅ អគារនេះ គឺចេញម៉ូដដោយប្អូនប្រុសអ្នកគ្រូ ហ៊ីហ្វូមី ដែលអ្នកគ្រូអះអាងថា ប្អូនប្រុសនោះ ស្រឡាញ់ខាងគូរនេះណាស់។ អ្នកគ្រូបន្ថែមថា នៅសាលានេះ ក្រៅពីបង្រៀនភាសាហើយ ក្នុងនោះក៏មានបង្រៀនជាតន្ត្រី កីឡា និងសិល្បៈ ផងដែរ។

ឆ្នាំនេះ អ្នកគ្រូ ហ៊ីហ្វូមី មានអាយុ ៥៣ឆ្នាំហើយ។ អ្នកគ្រូមានស្រុកកំណើត នៅសង្កាត់មួយក្នុងទីក្រុងតូក្យូ ប្រទេស ជប៉ុន។ អ្នកគ្រូមានបងប្អូនប្រុសស្រីចំនួន ៣នាក់ ហើយអ្នកគ្រូជាកូនទី២។ បច្ចុប្បន្ន អ្នកគ្រូ រស់នៅម្នាក់ឯងនៅកម្ពុជា ក្រោយពេលចែកផ្លូវជាមួយគ្រួសារចំណែកកូនប្រុសអាយុជាង ២០ឆ្នាំ កំពុងរស់នៅជាមួយអតីតស្វាមីនៅប្រទេសជប៉ុន។

កាលពីឆ្នាំ២០១៥ អ្នកគ្រូ ហ៊ីហ្វូមី ធ្លាប់បានទទួលរង្វាន់ចំណាត់ថ្នាក់លេខ២ ផ្នែកជនបរទេស ដែលនិយាយភាសាខ្មែរបានល្អ។ បែបនេះក្តី អ្នកគ្រូអះអាងថា អ្នកគ្រូមិនដែលគិតថា ការនិយាយភាសាខ្មែររបស់ខ្លួនបានល្អនោះដែរ គឺត្រូវការរៀនសូត្របន្ថែមទៀត។ សម្រាប់អ្នកគ្រូ ភាសាខ្មែរគឺសំខាន់សម្រាប់អ្នកគ្រូដែលជាជនបរទេស។ អ្នកគ្រូយល់ថា ការមិនរៀនពី អក្សរ និងភាសារបស់ប្រទេសដែលកំពុងរស់នៅ ហាក់មិនគោរពគេយ៉ាងដូច្នោះដែរ។

និយាយពីការរៀនភាសាជប៉ុនវិញ អ្នកគ្រូ ហ៊ីហ្វូមី មើលឃើញថា កូនសិស្សរៀនភាសានេះហាក់ធ្លាក់ចុះបន្តិចមែនក្នុងពេលបច្ចុប្បន្ននេះ ដោយសារមានគ្រូច្រើន ហើយតម្រូវការភាសាដទៃ ក៏មានច្រើនដែរ ដូចជាភាសាចិន កូរ៉េជាដើម។ យ៉ាងណា អ្នកគ្រូយល់ថា ការរៀនរបស់កូនសិស្សពីមុន និងឥឡូវ គឺមានបំណងផ្សេងគ្នា។ ពីមុនកូនសិស្សច្រើនរៀនដើម្បី ធ្វើជាមគ្គុទ្ទេសក៍ ចំណែកសព្វថ្ងៃ រៀនដើម្បីប្រឡងទៅធ្វើការនៅប្រទេសជប៉ុនទៅវិញ។

ជារៀងរាល់ឆ្នាំ អ្នកគ្រូជប៉ុន ដែលចូលចិត្តសើច តែងទៅលេងប្រទេសជប៉ុនម្តង អំឡុងខែ កក្កដា។ អ្នកគ្រូថា គ្មានសាច់ញាតិដែលអ្នកគ្រូចាំបាច់ត្រូវទៅលេងនោះទេ តែបំណងដើម្បីចង់ដឹងពីស្ថានការណ៍ និងការអភិវឌ្ឍប្រទេសជាតិតែប៉ុណ្ណោះ។

មើលទៅជីវិតរស់នៅក្នុងប្រទេសកម្ពុជារបស់អ្នកគ្រូ ហ៊ីហ្វូមី ដូចស្រស់ស្រាយណាស់ បើទោះអ្នកគ្រូមិនមានសញ្ជាតិខ្មែរក៏ដោយ។ ជីវិតអ្នកគ្រូ គឺដូចតែប្រជាជនកម្ពុជាមួយចំនួនដូច្នោះដែរ គឺសាមញ្ញ។ អ្វីដែលពិបាកសម្រាប់អ្នកគ្រូ តាំងពីដើម រហូតដល់បច្ចុប្បន្ន នោះគឺ ពិបាករកគ្រូបង្រៀនភាសាខ្មែរ។ ទម្រាំចេះនិយាយខ្មែរដូចសព្វថ្ងៃនេះ គឺអ្នកគ្រូស្វះស្វែងចង់ចេះ ចង់ដឹង សួរគេឯង។ រយៈពេល២ឆ្នាំ អ្នកគ្រូក៏សម្រេចប្រាថ្នា អាចនិយាយភាសាខ្មែរបាន។

ជប៉ុន និងកម្ពុជា ជាជម្រើសចុងក្រោយសម្រាប់ជីវិតអ្នកគ្រូ ហ៊ីហ្វូមី។ «បើសិនមានកូនសិស្ស ចង់រៀនភាសាជប៉ុន សូម្បីតែម្នាក់ ក៏ចង់បង្រៀន។ បើអត់មានអ្នកណាចង់រៀនភាសាជប៉ុនសោះ ខ្ញុំគិតថា ខ្ញុំអត់ន័យសោះនៅកម្ពុជា អ៊ីចឹងមានតែទៅស្រុកជប៉ុនវិញ»។ អ្នកគ្រូ ហ៊ីហ្វូមី និយាយដោយទឹកមុខរឹងមាំ លាយនឹងស្នាមញញឹមមិនដាច់៕