ជាតិ
ចំណូលពីការលក់សំបុត្រចូលអង្គរវត្ត កើនឡើងជិត១០៨លានដុល្លារ ក្នុងឆ្នាំ២០១៧
× សៀមរាប៖ គ្រឹះស្ថានអង្គរ ដែលជាស្ថាប័នរដ្ឋគ្រប់គ្រងលើការលក់សំបុត្រចូលរមណីយដ្ឋានអង្គរ បានចេញផ្សាយរបាយការណ៍ អំពីចំនួនទេសចរ និងចំណូលសរុបសម្រាប់ឆ្នាំ២០១៧។ តាមគ្រឹះស្ថានអង្គរ ក្នុងឆ្នាំ២០១៧ ចំណូលសរុបដែលបានពីការលក់សំបុត្រចូលទស្សនារមណីយដ្ឋានអង្គរ មានចំនួនជាង ១០៧លានដុល្លារ ដែលចំនួននេះមានការកើនឡើងជាង ៧២% បើធៀបនឹងឆ្នាំចាស់។
ទេសចរបរទេស ដែលមកកម្សាន្តរមណីយដ្ឋានអង្គរ និងបានទិញសំបុត្រចូលទស្សនាសរុបក្នុងឆ្នាំ២០១៧ទាំងអស់មានចំនួន ជាង២លាននាក់ គឺស្មើនឹង២ ,៤៥៧,០២៣នាក់ កើនឡើងជាង ១១% ធៀបនឹងឆ្នាំ២០១៦។ ចំណែកចំណូលសរុប គ្រឹះស្ថានអង្គរបានបង្ហាញពីតួលេខ ដែលមានចំនួនសរុប ១០៧,៩៧៦,៤៣៩ដុល្លារ កើនឡើងជាង ៧២% ធៀបនឹងឆ្នាំ២០១៦។
ចាប់ពីខែ កុម្ភៈ ឆ្នាំ២០១៧មក រាជរដ្ឋាភិបាលបានចាប់អនុវត្តន៍លើគោលការណ៍ ការដំឡើងតម្លៃសំបុត្រចូលទស្សនារមណីយដ្ឋានអង្គរថ្មី ក្រោយផ្ទេរការគ្រប់គ្រងពីក្រុមហ៊ុន សុខា អូតែល របស់លោក សុខ គង់។ តម្លៃសំបុត្រមួយថ្ងៃ សម្រាប់ភ្ញៀវបរទេស ឡើងពី២០ ទៅ៣៧ដុល្លារ សំបុត្រដែលមានសុពលភាព៣ថ្ងៃ ឡើងពី៤០ទៅ៦២ដុល្លារ និងសុពលភាពមួយសប្តាហ៍ ឡើងពី៦០ ទៅ៧២ដុល្លារ។ ក្នុងសេចក្តីជូនដំណឹង ចេញផ្សាយនៅថ្ងៃទី៥ សីហា ឆ្នាំ២០១៦ ក៏បានបញ្ជាក់ដែរថា តម្លៃទាំងអស់ នឹងត្រូវបង់ចូលទៅមូលនិធិមន្ទីរពេទ្យគន្ធបុប្ផាចំនួន២ដុល្លារ ហើយវានឹងត្រូវដាក់បញ្ជាក់នៅផ្នែកខាងក្រោយខ្នងសំបុត្រ ដើម្បីបញ្ជាក់ប្រាប់ភ្ញៀវទេសចរ។
សម្រាប់១១ខែ ឆ្នាំ២០១៧ រដ្ឋបានបង់ប្រាក់ឧបត្ថម្ភចូលទៅមូលនិធិគន្ធបុប្ផាចំនួន ៤,៣៣៩,៩៦៤ដុល្លារ ៕
Tag:
គ្រឹះស្ថានអង្គរ
ចំណូលអង្គរ
© រក្សាសិទ្ធិដោយ thmeythmey.com