ជាតិ
សេដ្ឋកិច្ច
ការនាំចេញអង្ករក្នុងឆ្នាំ២០១៧ កើនឡើងជិត ១០ម៉ឺនតោន
× ភ្នំពេញ៖ ការនាំចេញអង្កររបស់កម្ពុជាទៅទីផ្សារអន្តរជាតិក្នុងឆ្នាំ២០១៧ កន្លងទៅ សម្រេចបាន ៦៣,៥ ម៉ឺនតោន កើនឡើង ១៧,៣ភាគរយ ធៀបនឹង ៥៤ម៉ឺនតោននៅឆ្នាំ២០១៦ ។ នេះបើតាមរបាយការណ៍របស់លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ។
ទីផ្សារទិញអង្ករកម្ពុជាធំជាងគេ គឺសហភាពអឺរ៉ុប ក្នុងចំនួនជាង ២៧ម៉ឺនតោន តាមពីក្រោយដោយទីផ្សារចិន ២០ម៉ឺនតោន។ ការនាំចេញអង្កររបស់កម្ពុជាក្នុងឆ្នាំ២០១៧ កើនឡើងប្រសើរជាងឆ្នាំមុនៗ ខណៈដែលកម្ពុជាទទួលបានការដំឡើងកូតាទ្វេដង រហូតដល់ ២០ម៉ឺនតោនពីប្រទេសចិន កាលពីឆ្នាំមុន។
គួរបញ្ជាក់ថា នៅឆ្នាំមុននេះ រដ្ឋាភិបាលបានផ្ដល់ឥណទានប្រមាណ ៣០លានដុល្លារដល់វិស័យឯកជន ដើម្បីប្រតិបត្តិការឃ្លាំងស្តុក និងឡសម្ងួត ចំនួន៤កន្លែង។ អ្នកក្នុងវិស័យនេះបានមើលឃើញថា ការបង្កើតឃ្លាំងស្តុកទាំងនេះ នឹងជួយបានមួយផ្នែកដល់វិស័យស្រូវអង្ករកម្ពុជា។ ជាមួយគ្នានេះដែរ រដ្ឋាភិបាលក៏បានទម្លាក់កញ្ចប់ថវិកាពិសេស ៥០លានដុល្លារសម្រាប់ផ្ដល់ឥណទានប្រមូលទិញស្រូវពីកសិករផងដែរ៕
© រក្សាសិទ្ធិដោយ thmeythmey.com