កីឡាអន្តរជាតិ
អន្តរជាតិ
Wenger អាចរងពិន័យពី FA ក្រោយរិះគន់អាជ្ញាកណ្តាលថាកាត់ក្តីលម្អៀង
×
Arsene Wenger អ្នកចាត់ការទូទៅក្រុមកាំភ្លើងធំ Arsenal ប្រឈមមុខនឹងការដាក់វិន័យបន្ថែមទៀតពីសហព័ន្ធកីឡាបាល់ទាត់អង់គ្លេស (FA) បន្ទាប់ពីរិះគន់ផ្ទួនៗលើកការសម្រេចចិត្តរបស់អាជ្ញាកណ្តាលដែលពិន័យកូនក្រុមលោកក្នុងការប្រកួតកន្លងមក។
BBC បានផ្សាយថា មុនការប្រកួតស្មើ ២-២ រវាង Chelsea និង Arsenal ក្នុងក្របខណ្ឌ Premier League កាលពីរាត្រីថ្ងៃទី៣ ខែមករា លោក Arsene Wenger បានរិះគន់លើការសម្រេចចិត្តរបស់អាជ្ញាកណ្តាលលោក Mike Dean ដែលផ្តល់បាល់ពិន័យប៉េណាល់ទីទៅឲ្យគូប្រជែង ថាមានភាពចំឡែក។
លោកអះអាងថា៖«ប្រសិនបើយើងពិនិត្យមើលម្តងទៀតយើងនឹងដឹងថាវាមិនមែនជាការចៃដន្យទេសម្រាប់អាជ្ញាកណ្តាល តែជារឿងចៃដន្យសម្រាប់ខ្ញុំ»។
អ្នកចាត់ការសញ្ជាតិបារាំង វ័យ៦៨ឆ្នាំរូបនេះ ត្រូវបានចោទប្រកាន់ពី FA ក្រោមបទប្រព្រឹត្តមិនត្រឹមត្រូវក្រោយរិះគន់ការពិន័យបាល់ប៉េណាល់ទីនៅចុងម៉ោងក្នុងការប្រកួតដែល West Brom ស្មើ ១-១ ជាមួយ Arsenal កាលពីថ្ងៃទី ៣១ ខែធ្នូ ដែលបង្កើតកំហុសដោយខ្សែការពារ Calum Chambers។
បន្ទាប់មកទៀត Wenger ក៏បានបន្តរិះគន់អាជ្ញាកណ្តាលបន្ថែមទៀត ដែលផ្តល់បាល់ពិន័យប៉េណាល់ទីឲ្យ Eden Hazard ក្រោយ Hector Bellerin ធ្វើឲ្យមានកំហុស ក្នុងការប្រកួតដែល Arsenal ស្មើ ២-២ ជាមួយ Chelsea។
លោក Wenger មានពេលរហូតដល់ថ្ងៃទី៩ ខែមករាដើម្បីឆ្លើយតមនឹងការចោទប្រកាន់ពីសហព័ន្ធកីឡាបាល់ទាត់ជុំវិញការរិះគន់របស់លោកទៅលើអាជ្ញាកណ្តាលនេះ៕
Tag:
បាល់ទាត់
Arsene Wenger
FA
© រក្សាសិទ្ធិដោយ thmeythmey.com