ជាមួយតម្លៃផ្ទេរ១៩២លានដុល្លារ Coutinho នឹងបានតម្លៃខ្លួនផ្តាច់កិច្ចសន្យាដល់ទៅ៤៨១លានដុល្លារ

កីឡាអន្តរជាតិ

អន្តរជាតិ

ជាមួយតម្លៃផ្ទេរ១៩២លានដុល្លារ Coutinho នឹងបានតម្លៃខ្លួនផ្តាច់កិច្ចសន្យាដល់ទៅ៤៨១លានដុល្លារ

08, Jan 2018 , 12:15 pm

រូបភាព

ដោយ: ទេព ពិទូរ្យ

Philippe Coutinho បានផ្លាស់ពី Liverpool ទៅចូលរួមជាមួយ FC Barcelona នៅថ្ងៃអាទិត្យទី ៧ ខែមករា ក្នុងតម្លៃផ្ទេរថ្លៃបំផុតទី២ក្នុងប្រវត្តិសាស្ត្របាល់ទាត់ ១៤២លានផោន ប្រហែល ១៩២លានដុល្លារអាមេរិក។ ក្រោយផ្លាស់មកកាន់ទឹកដី Nou Camp ជាផ្លូវការ ក្លិបរហស្សនាមអ្នកមានបុណ្យបានប្រកាសតម្លៃទិញផ្តាច់កិច្ចសន្យា «buyout clause» ៣៥៥លានផោន ប្រមាណ ៤៨១លានដុល្លារឲ្យខ្សែប្រយុទ្ធអន្តរជាតិប្រេស៊ីលនេះ។

ខ្សែប្រយុទ្ធវ័យ ២៥ឆ្នាំ Coutinho បានចុះហត្ថលេខាស្នាក់នៅជាមួយក្លិបយក្យរបស់អេស្ប៉ាញលើកិច្ចសន្យារយៈពេល ៥ឆ្នាំ កន្លះ ជាមួយតម្លៃផ្ទេរថ្លៃបំផុតលើលោកទី២បន្ទាប់ពីមិត្តរួមជាតិ Neymar ដែលបានចាកចេញពី Barcelona ទៅ Paris St Germain តម្លៃ ២០០លានផោន ប្រហែល ២៧១លានដុល្លារកាលពីដើមរដូវកាលនេះ។

អតីតសមាជិកក្រុម Inter Milan បាននិយាយថាការផ្លាស់ទៅកាន់ Barcelona គឺជា «ក្តីសុបិន្តក្លាយជាការពិត»។

«សួស្តីអ្នកគាំទ្រ Barca ខ្ញុំត្រៀមខ្លួនរួចហើយនៅទីនេះ វាជាក្តីសុបិន្តក្លាយជាការពិត ហើយខ្ញុំសង្ឍឹមថាយើងនឹងជួបគ្នានៅថ្ងៃស្អែក»។ Coutinho បានបង្ហោះសារវីដេអូបែបនេះនៅលើបណ្តាញសង្គម Twitter របស់គេមុនបង្ហាញខ្លួជាផ្លូវការនៅថ្ងៃចន្ទ ទី៨ ខែមករានេះ។

រូបគេបានបន្ថែមថាពិតជារំភើបដែលបានលេងរួមក្រុមជាមួយកីឡាករល្បីៗដូចជា Lionel Messi, Luis Suarez, Andres Iniesta, Gerard Pique និង Sergio Busquets ជាដើម ដើម្បីអាចរៀនសូត្រពីពួកគេ ហើយអាចឈ្នះពានធំៗជាមួយគ្នានៅទីនេះ៕