កីឡាអន្តរជាតិ
អន្តរជាតិ
កីឡាករថ្លៃជាងគេលើលោក៖ Kane នៅលេខរៀងទី៣ បន្ទាប់ពី Neymar និង Messi Harry Kane ស្ថិតនៅចំណាត់ថ្នាក់ទីបីក្នុងចំណោមកីឡាករដែលមានតម្លៃខ្លួនខ្ពស់ជាងគេលើលោក។ រូបថត AFP
× Harry Kane ខ្សែប្រយុទ្ធរបស់ក្រុម Tottenham Hotspur ជាកីឡាករមានតម្លៃខ្លួនថ្លៃបំផុតទី៣ លើលោកនាពេលបច្ចុប្បន្ន។ នេះបើយោងតាមការសិក្សាថ្មីមួយរបស់ CIES ។
តួលេខដែលចេញផ្សាយដោយអ្នកអង្កេតការណ៍កីឡាបាល់ទាត់ CIES បានបង្ហាញថា Harry Kane មានតម្លៃខ្លួន ១៧២.៦៥ លានផោន ប្រហែល ២៣៤លានដុល្លារ ស្ថិតនៅចំណាត់ថ្នាក់ទី៣ តាមពីក្រោយកីឡាករថ្លៃបំផុតលើលោក Neymar ខ្សែប្រយុទ្ធរបស់ Paris St Germain ដែលមានតម្លៃ ២១៣លានផោន ប្រហែល ២៨៩លានដុល្លារ និងលេខ២ Lionel Messi របស់ Barcelona មានតម្លៃ ២០២លានផោន ប្រហែល ២៧៤លានដុល្លារ។
ខ្សែប្រយុទ្ធអន្តរជាតិអង់គ្លេស វ័យ២៤ឆ្នាំ ធ្វើបាន ៣៩គ្រាប់ហើយសម្រាប់ការប្រកួតក្នុងក្របខណ្ឌ Premier League ឆ្នាំ២០១៧ ដែលអាចបំបែកកំណត់ត្រាចាស់អតីតខ្សែប្រយុទ្ធឆ្នើមរបស់ Newcastle United លោក Alan Shearer។
Kane ក៏បានក្លាយជាអ្នករកគ្រាប់បាល់ច្រើនជាងគេនៅតំបន់អឺរ៉ុបផងដែរសម្រាប់ការបង្ហាខ្លួនឲ្យក្លិប និងក្រុមជម្រើសជាតិដោយស៊ុតបញ្ចូលទីសរុប ៥៦គ្រាប់កាលពីឆ្នាំមុន នាំមុន Leonel Mess និង Cristiano Ronaldo។
មិត្តរួមក្រុមរបស់ Kane ម្នាក់ទៀតគឺខ្សែបម្រើ Dele Alli ដែលមានវ័យ ២១ឆ្នាំ ស្ថិតនៅចំណាត់ថ្នាក់លេខ ៦ មានតម្លៃខ្លួន ១៧១លានផោន ប្រហែល២៣២លានដុល្លារ និងជាកីឡាករលំដាប់ទី២ ដែលមានតម្លៃខ្លួនថ្លៃក្នុងក្របខណ្ឌ Premier League។
ចំណែក Cristiano Ronaldo ខ្សែប្រយុទ្ធឆ្នើម Real Madrid ដែលបច្ចុប្បន្នមានវ័យ ៣២ឆ្នាំទៅហើយស្ថិតនៅលេខរៀងទី ៤៩ មានតម្លៃខ្លួន ៧១លានផោន ប្រមាណ ៩៦លានដុល្លារ៕
ខាងក្រោមនេះជាកីឡាបាល់ទាត់ទាំង ១០រូប ដែលមានតម្លៃខ្លួនថ្លៃជាងគេបំផុតលើលោក៖
១. Neymar (PSG) - ២៨៩លានដុល្លារ
២. Lionel Messi (Barcelona) - ២៧៤លានដុល្លារ
៣. Harry Kane (Tottenham) - ២៣៤លានដុល្លារ
៤. Kylian Mbappe (PSG) - ២៦១លានដុល្លារ
៥. Paulo Dybala (Juventus) - ២៣៧លានដុល្លារ
៦. Dele Alli (Tottenham) - ២៣២លានដុល្លារ
៧. Kevin de Bruyne (Manchester City) - ២២៧លានដុល្លារ
៨. Romelu Lukaku (Manchester United) - ២២៣លានដុល្លារ
៩. Antoine Griezmann (Atletico Madrid) - ២០៣លានដុល្លារ
១០. Paul Pogba (Manchester Uniteds) - ២០០លានដុល្លារ
Tag:
បាល់ទាត់
Harry Kane
Tottenham Hotspur
CIES
© រក្សាសិទ្ធិដោយ thmeythmey.com