ពានបាល់ទាត់រដ្ឋមន្ត្រីអប់រំនឹងរៀបចំលើកដំបូងដើម្បីបង្កើនស្មារតី មិត្តភាព និងប្រសិទ្ធភាពការងារ

កីឡាជាតិ

ជាតិ

ពានបាល់ទាត់រដ្ឋមន្ត្រីអប់រំនឹងរៀបចំលើកដំបូងដើម្បីបង្កើនស្មារតី មិត្តភាព និងប្រសិទ្ធភាពការងារ

11, Jan 2018 , 11:22 am

រូបភាព

ក្រុមបាល់ទាត់អគ្គនាយកដ្ឋានកីឡាកំពុងហ្វឹកហាត់ដើម្បីត្រៀមចូលរួមពានរង្វាន់ឯកឧត្តមសភាចារ្យ ហង់ ជួនណារ៉ុន, រូបភាពហ្វេសប៊ុកលោក ទុយ វិច្ឆិកា

ដោយ:

ក្រសួងអប់រំយុវជននិងកីឡានឹងរៀបចំការប្រកួតពានរង្វាន់បាល់ទាត់«ឯកឧត្តមបណ្ឌិតសភាចារ្យ ហង់ ជួនណារ៉ុន»ជាលើកដំបូងចាប់ពីថ្ងៃទី៥ ខែកុម្ភៈ ដល់ថ្ងៃទី៦ ខែមេសា ឆ្នាំ២០១៨ នៅពហុកីឡដ្ឋានជាតិ។ ការប្រកួតនេះមានក្រុមបាល់ទាត់ដែលតំណាងអគ្គនាយកដ្ឋាន និងអគារធិការដ្ឋានចំណុះឲ្យក្រសួងចំនួន៧ក្រុមចូលរួម។ នេះបើយោងតាមសេចក្តីប្រកាសព័ត៌មានក្រសួងអប់រំ យុវជន និងកីឡាកាលពីថ្ងៃទី៨ មករា កន្លងទៅ។

ដើម្បីលើកកម្ពស់សុខមាលភាពផ្លូវកាយ បញ្ញា ស្មារតី សីលធម៌ មិត្តភាព សាមគ្គីភាព ភាពសប្បាយរីករាយ និងប្រសិទ្ធភាពការងារដល់មន្ត្រីក្រោមបង្គាប់ ក្រសួងអប់រំ យុវជន និងកីឡានឹងរៀបចំការប្រកួតបាល់ទាត់ពានរង្វាន់របស់ខ្លួនជាលើកដំបូងដែលមានឈ្មោះថា«ពានរង្វាន់ឯកឧត្តមបណ្ឌិតសភាចារ្យ ហង់ ជួនណារ៉ុន»។ សម្រាប់ការរៀបចំជាលើកដំបូងនេះ ដោយទទួលបានក្រុមតំណាងអគ្គនាយកដ្ឋាន និងអគារធិការដ្ឋានចំនួន៧ក្រុមចូលរួមប្រកួតប្រជែង។

សេចក្តីប្រកាសប្រកាសព័ត៌មានដែលចុះហត្ថលេខាដោយលោករដ្ឋមន្ត្រីក្រសួងអប់រំ ហង់ ជួនណារ៉ុន ជំរុញឲ្យអគ្គនាយកដ្ឋាននិងអគារធិការដ្ឋានរៀបចំក្រុមបាល់ទាត់របស់ខ្លួនឲ្យបានរួចរាល់ទាំងសម្លៀកបំពាក់ និងស្បែកជើង ខណៈរាល់ការចំណាយផ្សេងៗជាបន្ទុករបស់អគ្គនាយដ្ឋាន និងអគាធិការដ្ឋានទាំងនេះ។

ទន្ទឹមនឹងនេះ ក្រសួងជំរុញឲ្យអគ្គនាយកដ្ឋានកីឡា និងនាយកដ្ឋានហិរញ្ញវត្ថុរៀបចំទីកន្លែង គណៈកម្មការ និងបទបញ្ជានៃការប្រកួត ព្រមទាំងពាន និងប្រាក់រង្វាន់សម្រាប់ម្ចាស់ជ័យលាភី។ ការប្រកួតនេះនឹងប្រព្រឹត្តទៅចាប់ពីថ្ងៃទី៥ ខែកុម្ភៈ ដល់ថ្ងៃទី៦ ខែមេសា ឆ្នាំ២០១៨ នៅពហុកីឡដ្ឋានជាតិ៕