ជាតិ
នយោបាយជាតិ
បោះឆ្នោត៖ បក្សប្រជាធិបតេយ្យមូលដ្ឋាន នឹងពហិការ បើបរិយាកាសនយោបាយមិនល្អ លោក យ៉ង សាំងកុមារ (ឆ្វេង) និងលោក យ៉េង វីរៈ។ រូបថត GDP Takeo
× ភ្នំពេញ៖ គណបក្សប្រជាធិបតេយ្យមូលដ្ឋាន (GDP) ដែលគេដឹលឮថាជាបណ្តុំពួកបញ្ញវន្ត និងសម្បូរទៅដោយអតីតមន្ត្រីអង្គការក្រៅរដ្ឋាភិបាល អាចនឹងមិនចូលរួមក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅ នៅថ្ងៃទី២៥ ខែកក្កដា ឆ្នាំ២0១៨ នោះទេ ប្រសិនបើទាមទារលក្ខខណ្ឌចាំបាច់មួយចំនួនមិនបាន។ នេះបើតាមលោក យ៉ង សាំងកុមារ ប្រធានគណៈកម្មាធិការនាយកនៃគណបក្សប្រជាធិតេយ្យមូលដ្ឋាន។
លោក យ៉ង សាំងកុមារ ដែលជាបណ្ឌិតផ្នែកកសិកម្ម បានប្រាប់សារព័ត៌មានថ្មីៗតាមទូរសព្ទថា លក្ខខណ្ឌចាំបាច់ ដែលគណបក្សប្រជាធិបតេយ្យ ទាមទារ មានដូចជា សេរីភាពក្នុងការផ្សព្វផ្សាយគោលនយោបាយ ការលើកស្លាកគណបក្សដោយស្មើភាពគ្នា និងឱកាសក្នុងការជ្រើសរើសបេក្ខជនឈរឈ្មោះ ដោយគ្មានការគំរាមកំហែង ជាដើម។ លោក បញ្ជាក់បែបនេះថា៖«បើលក្ខខណ្ឌទាំងអស់នេះ យើងទាមទារមិនបានទេ យើងអាចនឹងដកខ្លួនចេញ ពីការបោះឆ្នោត។ វា មិនមែនជាយោបល់របស់ខ្ញុំផ្ទាល់ទេ គឺយើងបានសម្រេចក្នុងគណៈកម្មាធិការនាយកគណបក្សតែម្តង»។
លោក យ៉ង សាំងកុមារ បន្តថា គណបក្សប្រជាធិបតេយ្យមូលដ្ឋាន មិនសប្បាយចិត្តទាល់តែសោះ ក្នុងរយៈពេលចុងក្រោយនេះ ដោយសារតែទាមទារសុំលើកស្លាកនៅតាមតំបន់មួយចំនួនក្នុងរាជធានីភ្នំពេញ មិនបាន។ លោក បន្ថែមថា ដើមឡើយ គណបក្សរបស់លោក បានដាក់សំណើទៅកាន់សាលាខណ្ឌ ដើម្បីសុំលើកស្លាកគណបក្ស ហើយសាលាខណ្ឌ ក៏ប្រាប់ឲ្យស្នើទៅសាលារាជធានីភ្នំពេញវិញ។ ប៉ុន្តែ លោក អះអាងថា រហូតមកដល់ពេលនេះ អាជ្ញាធរនៃសាលារាជធានីភ្នំពេញ មិនទាន់ផ្តល់ដំណឹងដល់ក្រុមការងាររបស់លោកនៅឡើយទេ ជុំវិញសំណើសុំលើកស្លាកគណបក្ស។
ប្រធានគណៈកម្មាធិការនាយកនៃគណបក្សប្រជាធិបតេយ្យមូលដ្ឋានរូបនេះ ស្នើឲ្យអាជ្ញាធរ ក៏ដូចជារដ្ឋាភិបាល កែលម្អស្ថានការណ៍ឡើងវិញ ដើម្បីធានាការបោះឆ្នោតនាពេលខាងមុខ ឲ្យប្រព្រឹត្តទៅដោយរលូត ស្មើភាពគ្នា និងយុត្តិធម៌។
សហគមន៍អន្តរជាតិមួយចំនួន ចាត់ទុកស្ថានការណ៍នយោបាយបច្ចុប្បន្នក្នុងប្រទេសកម្ពុជា ថាមានភាពយ៉ាប់យឺនយ៉ាងខ្លាំង ក្រោយចាប់លោក កឹម សុខា ដាក់ពន្ធនាគារ និងក្រោយរំលាយគណបក្សសង្គ្រោះជាតិ។ សហគមន៍អន្តរជាតិទាំងនោះ ជាពិសេស សហរដ្ឋអាមេរិក និងសហភាពអឺរ៉ុប វាយតម្លៃជាមុនថា ស្ថានភាពបច្ចុប្បន្ន នឹងមិនអាចធានាការបោះឆ្នោតឲ្យប្រព្រឹត្តទៅដោយស្របច្បាប់ឡើយ។ ហើយប្រទេសធំៗទាំងពីរ នឹងមិនទទួលស្គាល់ការបោះឆ្នោតនោះទេ ប្រសិនបើ អវត្តមានគណបក្សសង្គ្រោះជាតិ។
យ៉ាងណាក៏ដោយ មន្ត្រីជាន់ខ្ពស់របស់រដ្ឋាភិបាល និងគណបក្សកាន់អំណាច ធ្លាប់ថ្លែងការពារថា ប្រទេសកម្ពុជា នៅតែអាចរៀបចំការបោះឆ្នោតជាធម្មតា ទោះជាគណបក្សមួយចំនួន មិនចូលរួម ឬសហគមន៍អន្តរជាតិមិនទទួលស្គាល់ក៏ដោយ។ ភាគីរដ្ឋាភិបាល យល់ថា ប្រទេសកម្ពុជា មិនអាចបាត់បង់ប្រជាធិបតេយ្យ សេរីពហុបក្ស ព្រោះតែអវត្តមានគណបក្សមួយចំនួននោះទេ៕
© រក្សាសិទ្ធិដោយ thmeythmey.com