ដើម្បីកុំឲ្យអង្ករឡើងថ្លៃ ឥណ្ឌូណេស៊ី សម្រេចនាំចូលអង្ករពីថៃ និងវៀតណាម ៥០ម៉ឺនតោន

អន្តរជាតិ

ដើម្បីកុំឲ្យអង្ករឡើងថ្លៃ ឥណ្ឌូណេស៊ី សម្រេចនាំចូលអង្ករពីថៃ និងវៀតណាម ៥០ម៉ឺនតោន

17, Jan 2018 , 8:19 am

រូបភាព

រូបភាព៖ Jakarta Globe

ដោយ:

រដ្ឋាភិបាលក្រុងហ្សាការតា នឹងនាំចូលអង្ករច្រើនម៉ឺនតោនពីបណ្តាមិត្តអាស៊ានថៃ និងវៀតណាមជាថ្មី។ ការនាំចូលអង្ករក្នុងបរិមាណជាច្រើនរបស់បងធំអាស៊ានមួយនេះ ដើម្បីទប់ស្កាត់ការឡើងថ្លៃអង្ករនៅក្នុងស្រុក ដែលបានអូសបន្លាយជាច្រើនខែហើយនោះ ។

បើមិនមានការប្រែប្រួលនោះទេ នៅចុងខែមករាខាងមុខនេះ អង្ករប្រមាណ ៥០០,០០០ តោន ដែលជាផលិតផលរបស់ថៃ និងវៀតណាម នឹងត្រូវនាំចូលទៅក្នុងទីផ្សារបស់ឥណ្ឌូណេស៊ីហើយ ។ នេះបើ តាមការអះអាងរបស់រដ្ឋមន្ត្រីពាណិជ្ជកម្មឥណ្ឌូណេស៊ី Enggartiasto Lukita ដែលបានចុះផ្សាយដោយសារព័ត៌មាន The Jakarta Post នាពេលថ្មីនេះ ។

លោករដ្ឋមន្ត្រី បានបញ្ជាក់ថា ការនាំចូលអង្ករ ដែលមានកម្រិតស្តង់ដារមធ្យមនេះ ដើម្បីបន្ទាបតម្លៃផលិតផលអង្ករនៅក្នុងប្រទេស ដែលបាននិងកំពុងតែឡើងថ្លៃតាំងពីចុងឆ្នាំ២០១៧ ដ្បិតការផ្គត់ផ្គង់មិនគ្រប់គ្រាន់ ។

នេះមិនមែនជាលើកដំបូងឡើយ ដែលរដ្ឋាភិបាលឥណ្ឌូណេស៊ី សម្រេចនាំចូលអង្ករបរទេស ដើម្បីរក្សាស្ថិរភាពតម្លៃនៅក្នុងស្រុកនោះ ។ នៅឆ្នាំ២០១៥កន្លងទៅ លោកប្រធានាធិបតីឥណ្ឌូណេស៊ី ក៏បានបញ្ជាទិញអង្ករពីមិត្តអាស៊ាន រួមមាន វៀតណាម និងថៃ ដ្បិតបញ្ហាកង្វះការផ្គត់ផ្គង់ ក្រោយឥណ្ឌូណេស៊ី បានជួបវិបត្តិគ្រោះរាំងស្ងួតធ្ងន់ធ្ងរនោះ ។

គួរជម្រាបផងដែរថា ដោយសារតែបញ្ហានៃការកើនឡើងតម្លៃរបស់អង្ករ រដ្ឋាភិបាលឥណ្ឌូណេស៊ី បានកំណត់ថ្លៃអតិបរមារបស់អង្ករតាមតំបន់មួយចំនួន ក្នុងតម្លៃប្រមាណ ០.៧០ ដុល្លារអាមេរិកក្នុងបរិមាណអង្ករ ១ គីឡូក្រាម ៕