ជាតិ
អង្គការជំនាញ វាយតម្លៃថា ប្រសិទ្ធភាពការងាររបស់សភាក្នុងឆ្នាំ២0១៧ ថយចុះខ្លាំង រូបសំណាកព្រះបាទជយវរ្ម័នទី៧ ក្នុងរដ្ឋសភា
× ភ្នំពេញ៖ អង្គការមួយ ដែលមានជំនាញខាងការបោះឆ្នោត បានវាយតម្លៃជារួមថា ក្នុងឆ្នាំ២0១៧ ការងាររបស់រដ្ឋសភា មានប្រសិទ្ធភាពតិចជាងឆ្នាំ២0១៦។ ប៉ុន្តែ តំណាងរាស្ត្រមានមុខមាត់ម្នាក់ មកពីគណបក្សកាន់អំណាច ឆ្លើយតបថា ការវាយតម្លៃនេះ មិនឆ្លុះបញ្ចាំងពីការពិតនោះទេ។
«ប្រសិទ្ធភាពការងាររបស់រដ្ឋសភា ក្នុងឆ្នាំ២0១៧ បានធ្លាក់ចុះ បើប្រៀបធៀបនឹងឆ្នាំ២0១៦»។ នេះគឺជាឃ្លាទីមួយ ក្នុងសេចក្តីប្រកាសព័ត៌មាន ស្តីពី «ការសង្កេតរដ្ឋសភា និងតំណាងរាស្ត្រ ឆ្នាំទី៤ នៃនីតិកាលទី៥» ដែលចេញដោយគណៈកម្មាធិការដើម្បីការបោះឆ្នោត ដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រេល (Comfrel)។
ខុមហ្វ្រេល បានលើកយកព្រឹត្តិការណ៍ជាច្រើន ក្នុងឆ្នាំ២0១៧ ដែលពាក់ព័ន្ធនឹងស្ថាប័នរដ្ឋសភា មកបរិយាយក្នុងសេចក្តីប្រកាសព័ត៌មានរបស់ខ្លួន ហើយក៏វាយតម្លៃជារួមលើកិច្ចការរបស់តំណាងរាស្ត្រនិងរដ្ឋសភា។ បើតាមការវាយតម្លៃរបស់អង្គការជំនាញខាងការបោះឆ្នោតមួយនេះ ក្នុងឆ្នាំ២0១៧ ភាគច្រើននៃកិច្ចការក្នុងរដ្ឋសភា គឺជាចំណុចអវិជ្ជមាន។
ខុមហ្រេ្វល យល់ថា បញ្ហាធ្ងន់ធ្ងរបំផុត គឺតំណាងរាស្ត្រគណបក្សកាន់អំណាច បានកែប្រែច្បាប់ស្តីពីគណបក្សនយោបាយ ដើម្បីកុំឲ្យបុគ្គលណាម្នាក់ ដែលមានឈ្មោះជាអ្នកទោស ធ្វើជាសមាជិក ឬធ្វើជាប្រធានគណបក្ស រួមទាំងផ្តល់សិទ្ធិឲ្យតុលាការកំពូល អាចរំលាយគណបក្សណាមួយបាន ហើយជាលទ្ធផល គណបក្សសង្គ្រោះជាតិ បានរងនូវការរំលាយចោល។ លើសពីនេះ ការដែលរដ្ឋសភា កែប្រែច្បាប់បោះឆ្នោតទាំងបួន ដែលមានខ្លឹមសារជារួមថា «រាល់អាសនៈនៃគណបក្សដែលត្រូវបានរំលាយចោល ត្រូវយកទៅចែកឲ្យគណបក្សដទៃ» ក៏ត្រូវបានខុមហ្វ្រេល ចាត់ទុកថា មានផលប៉ះពាល់ និងភាពអយុត្តិធម៌ ចំពោះសំឡេងម្ចាស់ឆ្នោត។
ការរឹតត្បិតសកម្មភាពការងាររបស់តំណាងរាស្ត្រគណបក្សប្រឆាំង និងការបើកផ្លូវឲ្យសមត្ថកិច្ច ចាប់លោក កឹម សុខា ប្រធានគណបក្សប្រឆាំង ដាក់ពន្ធនាគារ ក៏ត្រូវបានខុមហ្វ្រេល សរសេរចូលក្នុងសេចក្តីប្រកាសព័ត៌មានរបស់ខ្លួនដែរ។ ចំណែកឯ សកម្មភាពរបស់គណៈកម្មការជំនាញរបស់រដ្ឋសភា និងការឡើងបញ្ចេញមតិរបស់តំណាងរាស្ត្រក្នុងអង្គប្រជុំនៃរដ្ឋសភា រួមទាំងការចុះទៅមូលដ្ឋាន ក៏បានធ្លាក់ចុះដូចគ្នា។
ការវាយតម្លៃរបស់ខុមហ្វ្រេលខាងលើ មិនទទួលបានការយល់ស្របសូម្បីបន្តិច ពីលោក ឈាង វុន តំណាងរាស្ត្រលេចធ្លោមួយរូប ពីគណបក្សប្រជាជនកម្ពុជា។ ដោយយល់ថាខុមហ្វ្រេលមានភាពលម្អៀងនិងមនោសញ្ចេតនាទៅរកគណបក្សប្រឆាំង លោក ឈាង វុន ក៏ហ៊ានអះអាងភ្លាមៗថា ការវាយតម្លៃនេះ គឺមិនឆ្លុះបញ្ចាំងពីការពិតនោះទេ។
តំណាងរាស្ត្រគណបក្សកាន់អំណាចរូបនេះ បានប្រាប់សារព័ត៌មានថ្មីៗ តាមទូរសព្ទយ៉ាងដូច្នេះថា៖«តាំងពីរដ្ឋសភា កើតមក យើង ខិតខំធ្វើការបម្រើរាស្ត្រណាស់ ជាពិសេសគណបក្សប្រជាជនកម្ពុជា។ យើង មិនដែលធ្វេសប្រហែសទេ។ គណបក្សនោះ មិនចូលធ្វើការ ហើយមកវាយតម្លៃរដ្ឋសភាទាំងមូល គឺមិនត្រូវទេ»។
លោក ឈាង វុន ថ្លែងការពារថា ចំពោះការកែប្រែច្បាប់ ឬការបង្កើតច្បាប់កន្លងមក គឺដើម្បីឆ្លើយតបនឹងសភាពការណ៍បច្ចុប្បន្ន ដូច្នេះវា គ្មានអ្វីដែលខុសឆ្គងនោះទេ។ ម្យ៉ាងទៀត លោក បកស្រាយថា ការកែច្បាប់ទាំងនោះ តែងឆ្លងកាត់ការពិភាក្សាគ្នា មុននឹងរដ្ឋសភា អនុម័ត។ លោក បញ្ជាក់ចុងក្រោយថា ប្រទេសកម្ពុជា ក៏ដូចប្រទេសនានាដែរ ដែលតែងតែធ្វើច្បាប់ ដើម្បីបម្រើផលប្រយោជន៍ប្រជាពលរដ្ឋ។
នៅពេលនីតិកាលទី៥ នៃរដ្ឋសភា ជិតផុតហើយនោះ ស្រាប់តែស្ថាប័នរដ្ឋសភា មានការផ្លាស់ប្តូរជាគំហុក នៅចុងឆ្នាំ២0១៧ ពោលគឺ តំណាងរាស្ត្រទាំង៥៥រូបរបស់គណបក្សសង្គ្រោះជាតិ ត្រូវអស់សុពលភាព ព្រោះតែគណបក្សនេះ ត្រូវបានរំលាយចោល ហើយអាសនៈទាំង៥៥ ក៏ត្រូវប្រគល់ឲ្យគណបក្សដទៃ។ ចំណែកឯ អាសនៈជាសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ និងអាសនៈជាសមាជិកក្រុមប្រឹក្សាឃុំ សង្កាត់ របស់គណបក្សសង្គ្រោះជាតិ ក៏ត្រូវបានយកទៅចែកឲ្យគណបក្សផ្សេងៗដែរ។
សហគមន៍អន្តរជាតិនានា បានថ្កោលទោសយ៉ាងខ្លាំង ចំពោះព្រឹត្តិការណ៍ទាំងនេះ។ ប៉ុន្តែ គណបក្សកាន់អំណាច នៅតែបន្តប្រកាសជំហរថា អ្វីៗដែលស្ថាប័នជាតិ ដូចជា រដ្ឋសភា តុលាការ និងរដ្ឋាភិបាល បានធ្វើកន្លងមក គឺត្រឹមត្រូវ និងស្ថិតក្នុងដែនអធិបតេយ្យរបស់ខ្លួន ដោយបរទេសមិនអាចលូកដៃចូលបានឡើយ៕
Tag:
រដ្ឋសភា
ខុមហ្វ្រេល
ឈាង វុន
© រក្សាសិទ្ធិដោយ thmeythmey.com