លោក ឌូទើតេ បើកផ្លូវឲ្យចិនចូលស្រាវជ្រាវនៅ«តំបន់ខ្ពង់រាបបាតសមុទ្រ»របស់ខ្លួន

អន្តរជាតិ

លោក ឌូទើតេ បើកផ្លូវឲ្យចិនចូលស្រាវជ្រាវនៅ«តំបន់ខ្ពង់រាបបាតសមុទ្រ»របស់ខ្លួន

17, Jan 2018 , 3:15 pm

រូបភាព

រូបភាព៖ Rappler

ដោយ:

ប្រធានាធិបតីហ្វីលីពីន លោក រូឌ្រីហ្គូ ឌូទើតេ បានអនុញ្ញាតឲ្យចិន អនុវត្ត និងសិក្សាស្រាវជ្រាវតាមបែបវិទ្យសាស្ត្រនៅតំបន់បាតសមុទ្រប៉ាស៊ីហ្វិករបស់ហ្វីលីពីន ។ ការអនុញ្ញាតនេះ ធ្វើឡើង ក្រោមក្តីបារម្ភមួយ ដោយការស្រាវជ្រាវនេះ អាចគំរាមកំហែងដល់អធិបតេយ្យដែនសមុទ្ររបស់ហ្វីលីពីនផងដែរ ។

លោក Harry Roque អ្នកនាំពាក្យប្រធានាធិបតីហ្វីលីពីន នៅថ្ងៃ១៥ មករា បានលើកឡើងថា លោក ឌូទើតេ ដែលជាប្រមុខគោលនយោបាយបរទេសរបស់ហ្វីលីពីន បានអនុញ្ញាតឲ្យចិន សហការជាមួយសកលវិទ្យាល័យហ្វីលីពីន ដើម្បីចុះស្រាវជ្រាវនៅតំបន់បាតសមុទ្រ Benham Rise ដែលត្រូវបានគេជឿជាក់ថា ជាតំបន់ដែលសំបូរទៅដោយជីវៈចម្រុះ ។ នេះបើយោងតាមការចុះផ្សាយរបស់សារព័ត៌មាន Straits Times ។

តាមប្រភពព័ត៌មានដដែលនោះ ការអនុញ្ញាតឲ្យចិនចុះស្រាវជ្រាវនេះ មិនត្រូវបានផ្សព្វផ្សាយទូលំទូលាយប៉ុន្មាននោះទេ ក៏ប៉ុន្តែអ្នកនាំពាក្យប្រធានាធិបតីដដែលនោះ ក៏បានបញ្ជាក់ដែរថា ប្រសិនបើ មានអ្នកណាជំទាស់ចំពោះការស្រាវជ្រាវរួមគ្នា អាចធ្វើសំណើទៅកាន់សភា និងលើកបញ្ហានៅទីនោះចុះ ។

អ្នកនាំពាក្យសង្កត់ធ្ងន់ថា៖ «ប្រសិនបើការសម្រេចចិត្តរបស់លោកប្រធានាធិបតី មិនមែនជារឿងល្អនោះទេ ដូច្នេះគេគួរបង្កើតច្បាប់ដើម្បីហាមទៅ ។ តែហ្វីលីពីន ផ្តល់ការអនុញ្ញាតឲ្យតែប្រទេសទាំងឡាយណា ដែលអាចបង្ហាញពីផលប្រយោជន៍នៅក្នុងការចុះស្រាវជ្រាវ Benham Rise ប៉ុណ្ណោះ»។

គួរជម្រាបផងដែរថា តំបន់Benham Rise ដែលជាផ្នែកមួយនៃឆ្នេរប៉ាស៊ីហ្វិក ទើបតែត្រូវបានអង្គការសហប្រជាជាតិ ប្រកាសថា ជាផ្នែកមួយនៃតំបន់ខ្ពង់រាបបាតសមុទ្ររបស់ហ្វីលីពីននៅឆ្នាំ២០១២នោះទេ ។ តំបន់នេះក៏ទើបតែត្រូវបានហ្វីលីពីន ប្តូរឈ្មោះមកដាក់ ថា "Philippine Rise" នៅឆ្នាំមុនផងដែរ ៕