សិក្ខាកាម៣៥រូបបានការបណ្តុះបណ្តាលបច្ចេកទេសប្រណាំងកង់ពីអ្នកជំនាញមកពីអូស្ត្រាលី

កីឡាជាតិ

ជាតិ

សិក្ខាកាម៣៥រូបបានការបណ្តុះបណ្តាលបច្ចេកទេសប្រណាំងកង់ពីអ្នកជំនាញមកពីអូស្ត្រាលី

18, Jan 2018 , 7:59 am

រូបភាព

សកម្មភាពប្រណាំងកង់អន្តរជាតិអង្គរនៅខេត្តសៀមរាបកាលពីពេលកន្លងទៅ

ដោយ:

សហព័ន្ធខ្មែរកីឡាទោចក្រយានបានរៀបចំវគ្គបណ្តុះបណ្តាលជំនាញកីឡាប្រណាំងកង់ដល់គ្រូបង្វឹកថ្នាល និងអត្តពលិកវ័យក្មេងចាប់ពីថ្ងៃទី១៥ ដល់ថ្ងៃទី១៧ ខែមករា ឆ្នាំ២០១៨ នៅទីស្នាក់ការ NOCC។ វគ្គបណ្តុះបណ្តាលក្រោមបទឧទ្ទេសរបស់អ្នកជំនាញមកពីអូស្ត្រាលីនេះមានសិក្ខាកាមចូលរួមចំនួន៣៥នាក់។ អគ្គលេខាធិការសហព័ន្ធរំពឹងគ្រូបង្វឹកនិងអត្តពលិកវ័យក្មេងទាំងនេះទទួលបានចំណេះដឹងថ្មីៗដើម្បីអភិវឌ្ឍន៍សមត្ថភាពឲ្យកាន់តែប្រសើរឡើង។

គ្រូបង្វឹកថ្នាលនិងអត្តពលិកវ័យក្មេងចំនួន៣៥នាក់ទទួលបានការបណ្តុះបណ្តាលផ្នែកបច្ចេកទេសកីឡាប្រណាំងកង់ពីអ្នកជំនាញមកពីប្រទេសអូស្ត្រាលីដែលមានសញ្ញាបត្រកម្រិត១ពីសហព័ន្ធកីឡាទោចក្រយានអន្តរជាតិនៅប្រទេសស្វីស។ វគ្គបណ្តុះបណ្តាលនេះប្រព្រឹត្តទៅចាប់ពីថ្ងៃទី១៥ ដល់ថ្ងៃទី១៧ ខែមករា ឆ្នាំ២០១៨ នៅទីស្នាក់ការគណៈកម្មាធិការជាតិអូឡាំពិកកម្ពុជា។

បើយោងតាមអគ្គលេខាធិការសហព័ន្ធខ្មែរកីឡាទោចក្រយានលោក វង្ស ខាន់ពៅ វគ្គបណ្តុះបណ្តាលដែលមានទាំងទ្រឹស្តី និងការអនុវត្តនេះ មានបណ្តុះបណ្តាលផ្នែកបច្ចេកទេសកីឡាប្រណាំងកង់ របៀបបង្វឹក វិន័យ របបអាហារ និង Doping។ លោករំពឹងថា សិក្ខាកាមទាំងអស់នឹងទទួលបានចំណេះដឹងថ្មីៗ ដើម្បីអភិវឌ្ឍន៍សមត្ថភាពឲ្យកាន់តែប្រសើរឡើងថែមទៀត។

«វគ្គបណ្តុះបណ្តាលនេះមានសារសំខាន់ណាស់ក្នុងការអភិវឌ្ឍសមត្ថភាពគ្រូបង្វឹកថ្នាល និងកីឡាករវ័យក្មេងរបស់យើង ព្រោះពួកគេជាសរសទ្រូងនៃប្រទេសជាតិនិងជាធនធានសម្រាប់ឆ្នាំ២០២៣។ យើងរៀបចំវគ្គនេះឡើង គឺដើម្បីឲ្យគ្រូបង្វឹកនិងអត្តពលិកវ័យក្មេងស្គាល់ពីរបៀបបង្វឹក ការហ្វឹកហាត់ វិន័យ របបអាហារអនាម័យ និងពិធីការពារកុំឲ្យមានសារធាតុ(Doping)»។ នេះជាបញ្ជាក់របស់លោក វង្ស ខាន់ពៅ ដែលលោកបានបន្ថែមថា តាមរយៈការបណ្តុះបណ្តាលនេះកម្ពុជានឹងសម្បូរធនធានគ្រូបង្វឹក និងអត្តពលិកវ័យក្មេងកាន់តែច្រើននាពេលអនាគត។

វគ្គបណ្តុះបណ្តាលស្តីពី«គ្រូបង្វឹកថ្នាល និងអត្តពលិកវ័យក្មេងកីឡាប្រណាំងកង់»ទទួលបានការឧបត្ថម្ភទាំងស្រុងពីក្រសួងអប់រំ យុវជននិងកីឡាសហការជាមួយសហព័ន្ធខ្មែរកីឡាទោចក្រយាន៕