សេដ្ឋកិច្ចអន្តរជាតិ
អន្តរជាតិ
ឱនភាពពាណិជ្ជកម្ម៖ កូរ៉េខាងត្បូងបែរជានាំចូល «គីមឈី» ពីចិនដល់ទៅ៩៩ភាគរយ
× ឱនភាពពាណិជ្ជកម្ម «គីមឈី» នៅកូរ៉េខាងត្បូង បានកើនឡើងជាកំណត់ត្រានៅឆ្នាំ២០១៧ ។ នេះបើតាមទិន្នន័យរបស់សេវាកម្មគយកូរ៉េខាងត្បូង (KCS) ដោយលើកឡើងថា ផលិតផលតម្លៃថោកពីចិន ហូរដូចទឹកបាក់ទំនប់ចូលក្នុងទីផ្សារកូរ៉េខាងត្បូង។
បើប្រៀបធៀបតាមទិន្នន័យរបស់ KCS ចាប់តាំងពីឆ្នាំ២០០០មក ឱនភាពពាណិជ្ជកម្ម «គីមឈី» ដែលជាអាហារអត្តសញ្ញាណរបស់កូរ៉េខាងត្បូង កើនឡើងជាកំណត់ត្រានៅឆ្នាំ២០១៧ ជាមួយនឹងទឹកប្រាក់៤៧.២៨លានដុល្លារអាមេរិក។ របាយការណ៍ដែលដកស្រង់ដោយទីភ្នាក់ងារព័ត៌មាន Yonhap បានបង្ហាញថា តួលេខនៃឱនភាពពាណិជ្ជកម្ម «គីមឈី» នៅឆ្នាំ២០១៧ កើន១១ភាគរយ បើប្រៀបធៀបទៅនឹងឆ្នាំ២០១៦។
យោងតាមទិន្នន័យ កាលពីឆ្នាំមុន កូរ៉េខាងត្បូងនាំចូលម្ហូបស្ពៃជ្រក់ប្រពៃណីរបស់ខ្លួនរហូតដល់ទៅ២៧៥ ៦៣១ តោន ហើយនាំចេញតែ២៤ ៣១១តោន។ អ្វីដែលគួរឲ្យកត់សម្គាល់នោះ ៩៩ភាគរយនៃតួលេខនាំចូលនោះ គឺមកពីប្រទេសចិន។
វិទ្យាស្ថានគីមឈីពិភពលោកកូរ៉េខាងត្បូង រួមទាំងក្រុមហ៊ុនកសិ-នេសាទកម្ម និងម្ហូបអាហារកូរ៉េ សុទ្ធតែមើលឃើញពីលំហូរដ៏ខ្លាំងនៃផលិតផលចិនចូលក្នុងទីផ្សារកូរ៉េខាងត្បូង មក ពោលគឺ៨៩.៩ភាគរយនៃគីមឈីនៅភោជនីយដ្ឋានកូរ៉េខាងត្បូង មានប្រភពមកពីចិន។
ចាប់ពីឆ្នាំ២០១៦មក តម្លៃនាំចេញគីមឈីពីកូរ៉េខាងត្បូង មានតម្លៃ៣.៣៦ដុល្លារអាមេរិកក្នុង ១គីឡូ ក្រាម ខណៈការនាំចូលពីចិនមានតម្លៃតែ ០.៥ដុល្លារអាមេរិកប៉ុណ្ណោះក្នុង១គីឡូក្រាម។
គីមឈី ត្រូវដាក់បញ្ចូល ក្នុងបញ្ជីបេតិកភណ្ឌអរូបីនៃមនុស្សជាតិរបស់អង្គការយូណេស្កូ កាលពីឆ្នាំ២០១៣ ។ អាហារប្រពៃណីរបស់កូរ៉េខាងត្បូងមួយនេះ ត្រូវបានផ្សំឡើងពីបន្លែជាច្រើន ក្នុងនោះមានដូចជាស្ពៃស ត្រសក់ ឆៃថាវ ខ្ទឹម ជាដើម៕
Tag:
គីមឈី
ឱនភាពពាណិជ្ជកម្ម
© រក្សាសិទ្ធិដោយ thmeythmey.com