ពីនេះ ពីនោះ
ព័ត៍មានសុខភាព
ចម្អិនសាច់ញ៉ាំអាចធ្វើឲ្យមានការភ្លេចភ្លាំងច្រើនដែរទេ?
× យោងទៅតាមសេចក្តីរាយការណ៍របស់សារព័ត៌មាន BBC News បានឲ្យដឹងថា ការចម្អិនសាច់ញ៉ាំជាអាហារប្រហែលជាប្រឈមកាន់តែខ្ពស់នឹងការភ្លេចភ្លាំងច្រើន។ រឿងនេះធ្វើឡើងក្រោយពីការសិក្សាមួយដែលធ្វើឡើងដោយអ្នកស្រាវជ្រាវរបស់អាមេរិកធ្វើទៅលើសត្វកណ្តុរ និងមនុស្ស ដើម្បីចង់ដឹងទៅលើសារធាតុ Advanced Glycation End Products (AGEs) ហើយថាតើវាមានទំនាក់ទំនងជាមួយនឹងការកើតអាការៈភ្លេចភ្លាំង និងចង្កោមរោគសញ្ញា Metabolic ឬអត់។
ការចម្អិនសាច់ប្រហែលជាប្រឈមកាន់តែខ្ពស់នឹងការបង្កើតជាសារធាតុ AGEs ដែលសារធាតុនេះត្រូវបានគេយល់ថាជា ម៉ូលេគុលអាក្រក់ ព្រោះវាអាចបង្កជាការបំផ្លាញដល់កម្រិតកោសិកា ជាពិសេសដំណើរការមួយឈ្មោះថាការធ្វើអុកស៊ីតកម្មរបស់កោសិកាតែម្តង។
AGEs ត្រូវបានរាងកាយផលិតតាមបែបធម្មជាតិមួយ ប៉ុន្តែវាក៏មានក្នុងអាហារដែរដូចជា សាច់ និងស៊ុត និងវិធីចម្អិនអាហារដូចជា ការបំពង ចៀន និងឆាជាដើម។ អ្នកស្រាវជ្រាវបានប្រៀបធៀបកណ្តុរដែលស៊ីអាហារមានសារធាតុនេះខ្ពស់ និងកណ្តុរដែលស៊ីអាហារមានសារធាតុនេះទាប។ សម្រាប់កណ្តុរចាស់ៗដែលស៊ីអាហារមានសារធាតុនេះខ្ពស់គឺមានការប្រែប្រួលខួរក្បាល ដោយកើនឡើងចំនួនប្រូតេអ៊ីន Amyloid Protein ដែលជារបស់សម្គាល់ដល់ជំងឺភ្លេចភ្លាំងក្នុងពេលចាស់ជរាលើមនុស្ស។ កណ្តុរដែលស្ថិតក្នុងក្រុមដែលស៊ីអាហារមានសារធាតុ AGE ខ្ពស់គឺមានរោគសញ្ញាស្រដៀងគ្នានឹងជំងឺភ្លេចភ្លាំងពេលចាស់ជរាដែរ ដូចជាមានបញ្ហាលើការរក្សាតុល្យភាពរាងកាយ និងប្រើប្រាស់រាងកាយដែលត្រឹមត្រូវ។ កណ្តុរចាស់ៗដែលស៊ីអាហារមានសារធាតុ AGE ខ្ពស់ក៏ធ្លាប់មានការប្រែប្រួលរបៀបនៃការរំលាយអាហារ ដែលរឿងនេះជាលក្ខណៈមួយរបស់ចង្កោមរោគសញ្ញា Metabolic លើមនុស្សដែរ។
បន្ទាប់មក អ្នកស្រាវជ្រាវបានពិនិត្យទៅលើមនុស្សប្រមាណ ៩៣នាក់ ដែលមានអាយុចាប់ពី៦០ឆ្នាំឡើងទៅ។ កាលណាមនុស្សមានកម្រិតនៃសារធាតុ AGE ក្នុងឈាមខ្ពស់គឺជាប់ទាក់ទងនឹងការថយចុះភាពឆ្លាតវៃ និងបន្ថយភាពទទួលយកអាំងស៊ុយលីនក្នុងរយៈពេល ៩ខែក្រោយ។ យ៉ាងណាមិញ ក្នុងចំណោមពួកគេទាំងអស់មិនមាននរណាម្នាក់កើតមានអាការៈភ្លេចភ្លាំង ឬចង្កោមរោគសញ្ញា Metabolic ឡើយ។
សរុបទៅ លទ្ធផលនៃការសិក្សានេះបានឲ្យដឹងថា វាអាចមានទំនាក់ទំនងមួយរវាងសារធាតុ AGEs ជាមួយនឹងភាពភ្លេចភ្លាំង និងចង្កោមរោគសញ្ញា Metabolic ថ្វីបើអ្នកជំនាញបាននិយាយថា វាមិនមានចម្លើយណាមួយពិតប្រាកដក៏ដោយ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com