សមាជិកព្រឹទ្ធសភាអាមេរិក ស្នើឲ្យចាត់វិធានការបន្ថែម ដើម្បីឲ្យកម្ពុជា ក្លាយជារដ្ឋឯកោ

ជាតិ

សមាជិកព្រឹទ្ធសភាអាមេរិក ស្នើឲ្យចាត់វិធានការបន្ថែម ដើម្បីឲ្យកម្ពុជា ក្លាយជារដ្ឋឯកោ

28, Jan 2018 , 5:24 pm

រូបភាព

(ពីឆ្វេងទៅស្តាំ) លោក Ben Cardin និងលោក John McCain សមាជិកព្រឹទ្ធសភានៃសហរដ្ឋអាមេរិក

ដោយ: ម៉ៅ សុផា

ភ្នំពេញ៖ សមាជិកព្រឹទ្ធសភាអាមេរិកមួយចំនួន ជំរុញឲ្យដាក់សម្ពាធបន្ថែម មកលើរដ្ឋាភិបាលកម្ពុជា ហើយខិតខំធ្វើយ៉ាងណា ដើម្បីឲ្យរដ្ឋាភិបាលកម្ពុជា ក្លាយជាឯកោ។ អ្នកនាំពាក្យគណបក្សកាន់អំណាច តបវិញថា បំណងនេះ មិនអាចបានសម្រេចឡើយ ព្រោះកម្ពុជា នៅមានប្រទេសជាច្រើនទៀត ដែលបន្តគាំទ្រ។

«សហរដ្ឋអាមេរិក ត្រូវធ្វើកិច្ចការបន្ថែមទៀត ដើម្បីឲ្យរដ្ឋាភិបាលកម្ពុជា នៅឯកោ ហើយបន្តដាក់សម្ពាធលើរដ្ឋាភិបាលនៃប្រទេសនេះ ដើម្បីឲ្យស្ថានការណ៍ ត្រឡប់ទៅរកសភាពដើមវិញ»។ នេះគឺជាការចង់បានរបស់លោក John McCain និង លោក Ben Cardin សមាជិកព្រឹទ្ធសភាដ៏លេចធ្លោនៃសហរដ្ឋអាមេរិក។ សមាជិកព្រឹទ្ធសភាអាមេរិក៦នាក់ផ្សេងទៀត ក៏បានចូលរួមទាមទារជាមួយលោក John McCain និង លោក Ben Cardin ដែរ។

បំណងរបស់ពួកគេ គឺធ្វើឡើងតាមរយៈលិខិតមួយ ដែលចុះហត្ថលេខារួមគ្នា កាលពីថ្ងៃទី២៦ ខែមករា ឆ្នាំ២0១៨ ហើយបានផ្ញើទៅកាន់ស្ថានបេសកកម្មអចិន្ត្រៃយ៍នៃសហរដ្ឋអាមេរិកប្រចាំនៅអង្គការសហប្រជាជាតិ ដើម្បីស្នើឲ្យយកបញ្ហាផ្សេងៗ នៅប្រទេសកម្ពុជា ទៅពិភាក្សាក្នុងក្រុមប្រឹក្សាសន្តិសុខនៃអង្គការសហប្រជាជាតិ។ លើសពីនេះ ពួកគេ ក៏ចង់ឲ្យតំណាងរបស់សហរដ្ឋអាមេរិក សហការជាមួយប្រទេសនានាជាសម្ព័ន្ធមិត្រ ដើម្បីរួមគ្នាដោះស្រាយបញ្ហានៃប្រទេសកម្ពុជា នៅក្នុងក្រុមប្រឹក្សាសិទ្ធិមនុស្សនៃអង្គការសហប្រជាជាតិ ដែលនឹងបើកកិច្ចប្រជុំនាពេលខាងមុខ។

បញ្ហា ដែលសមាជិកព្រឹទ្ធសភាអាមេរិកទាំង៨នាក់ យល់ថា បានធ្វើឲ្យប្រជាធិបតេយ្យនិងសិទ្ធិមនុស្សនៅកម្ពុជាធ្លាក់ចុះ រួមមាន ការរំលាយគណបក្សសង្គ្រោះជាតិ ការមិនឲ្យថ្នាក់ដឹកនាំ១១៨នាក់នៃគណបក្សនេះ ធ្វើនយោបាយរយៈពេល៥ឆ្នាំ ការឃុំលោក កឹម សុខា ការបិទប្រព័ន្ធផ្សព្វផ្សាយ និងការបិទអង្គការក្រៅរដ្ឋាភិបាល ជាដើម។

លោក សុខ ឥសាន អ្នកនាំពាក្យគណបក្សប្រជាជបកម្ពុជា ចំអកឲ្យសមាជិកព្រឹទ្ធសភាអាមេរិកទាំងនោះថា ធ្វើកិច្ចការ ដោយមិនចេះមើលសភាពការណ៍។ លោក ឆ្លើយតបថា បើប្រទេសមួយ មិនគាំទ្រកម្ពុជា ក៏នៅមានប្រទេសជាច្រើនទៀត ដែលនៅបន្តគាំទ្រ។ លោក បន្តថា បើកម្ពុជា បាត់ជំនួយមួយ នៅមានជំនួយ១0ទៀតឯណោះ។

តាមរយៈបណ្តាញទំនាក់ទំនងតេឡេក្រាម អ្នកនាំពាក្យគណបក្សកាន់អំណាចរូបនេះ បានសរសេរសារទៅកាន់អ្នកកាសែតយ៉ាងដូច្នេះថា៖«មហិច្ឆតា ដែលចង់ធ្វើឲ្យរដ្ឋាភិបាលកម្ពុជាឯកោ ត្រូវបរាជ័យ និងគ្មានប្រសិទ្ធភាពឡើយ»។

ក្នុងចំណោមសហគមន៍អន្តរជាតិ សហរដ្ឋអាមេរិក បានចេញមុខមាត់ខ្លាំងជាងគេ ក្នុងការដាក់ទណ្ឌកម្មនិងសម្ពាធមកលើរដ្ឋាភិបាលកម្ពុជា ក្រោយរំលាយគណបក្សសង្គ្រោះជាតិ និងចាប់លោក កឹម សុខា ដាក់ពន្ធនាគារ។ សហរដ្ឋអាមេរិក បានផ្តាច់ជំនួយលើការបោះឆ្នោតមកកម្ពុជា។ ប្រទេសមហាអំណាចមួយនេះ ក៏បានរឹតបន្តឹងក្នុងការផ្តល់ទិដ្ឋាការដល់មន្ត្រីកម្ពុជាមួយចំនួនផងដែរ។

ចំណែកឯសហភាពអឺរុប បានចូលរួមជាមួយសហរដ្ឋអាមេរិក ក្នុងការផ្តាច់ជំនួយផ្នែការបោះឆ្នោត មកឲ្យកម្ពុជា។ សហភាពអឺរុប ធ្លាប់ព្រមានថា នឹងព្យួរការអនុគ្រោះពន្ធក្នុងការនាំផលិតផលពីកម្ពុជា ចូលទៅទីផ្សារអឺរ៉ុប។

ក្រៅពីសហរដ្ឋអាមេរិក និងសហភាពអឺរ៉ុប សហគមន៍អន្តរជាតិផ្សេងទៀត មិនទាន់ចេញមកដាក់សម្ពាធនិងទណ្ឌកម្មជាក់ស្តែង មកលើរដ្ឋាភិបាលកម្ពុជានោះទេ ដោយពួកគេ គ្រាន់តែចេញសេចក្តីថ្លែងការណ៍ ដើម្បីសម្តែងការមិនពេញចិត្ត ហើយថ្កោលទោសប៉ុណ្ណោះ។

បច្ចុប្បន្ននេះ ក្រុមអ្នកនយោបាយគណបក្សប្រឆាំង បានរត់ទៅប្រមូលផ្តុំគ្នា នៅក្រៅប្រទេស ដើម្បីតស៊ូ និងធ្វើចលនាតាមរូបភាពផ្សេងៗ ក្នុងគោលបំណងជំរុញឲ្យសហគមន៍អន្តរជាតិ បន្តចាត់វិធានការជាក់ស្តែង មកលើរដ្ឋាភិបាលកម្ពុជា។ ថ្មីៗនេះ លោក សម រង្ស៊ី រួមទាំងសហការី បានរួមគ្នាបង្កើតចលនាសង្គ្រោះជាតិ នៅក្រៅប្រទេស ដើម្បីបន្តការទាមទាររបស់ខ្លួន។ បំណងរបស់ពួកគេ គឺចង់ឲ្យដោះលែងលោក កឹម សុខា និងអនុញ្ញាតឲ្យគណបក្សសង្គ្រោះជាតិ រស់ឡើងវិញ ដើម្បីចូលរួមក្នុងការបោះឆ្នោត នៅឆ្នាំ២0១៨។

យ៉ាងណាក៏ដោយចុះ ភាគីរដ្ឋាភិបាល និងគណបក្សកាន់អំណាច បានប្រកាសជាញឹកញាប់ហើយថា គណបក្សប្រឆាំង មិនអាចរស់ឡើងវិញឡើយ។ រដ្ឋាភិបាល និងគណបក្សកាន់អំណាច ក៏មិនខ្វល់ដែរ ចំពោះការដាក់ទណ្ឌកម្ម ឬការមិនទទួលស្គាល់នូវការបោះឆ្នោត ពីសហគមន៍អន្តរជាតិ៕